Хар-хавар бакъасса апатI савав хьуну, оьрмулул дурагу 39 шинаву жуятува батIул хьуссия, ваца аьщун куна, гьарца чулуха оьвхъусса, итххявхсса инсан, культуралул аралуву чIявуссаннан итталусса пишакар, Дагъусттаннал телевидениялул зузала, Ибрагьиннул арс Къараев Казбек.
Махъ бакъа, Заннал биялсса пагьму буллусса инсан ия Казбек поэзиялул чулухагу. Ванал кIунттила дурксса, цирдагу лакку мазрай ххуйну дагьан дурсса (Лаккуяту яувцун яхъанай ивкIсса унува) назмурду чанну-ххину рирщуну диркIссар «Илчи» кказитрай хьхьичIрагу, ва цува сагъсса чIумалла.
Зул хьхьичIун ласлай буру ванал архивраву яхьуну лирчIсса назмурдавасса цаппара. Жул пикрилий, Казбек Къараевлул назмурдаву дур поэзиялуву цинияргу хьхьичI дикIан аьркинсса рухI, ссихI, паракьат дакъасса дакIнил хъит, къявхъ тIутIаву. Вайннуву дур цIугу, вайннуй бур цIугу.
Р. Башаев
Дагъусттан – ттул кьадар
Дагъусттан, Гулисттан,
Чарий ххярх тIутIий,
Ттул дардирдал дарман,
Ччаврил сававчий.
Дагъусттан, зунчай ав,
Барзунттай жайран,
Хъахъи къуннал карав
НякI хьхьирил майдан.
Дагъусттан, банавшай,
Ххяллай хъя кусса
Дагъусттан, аьнтIикIай,
Ттун эшкьи хьусса.
Дагъусттан, ттул кьадар,
Вирттаврал минай,
Аьрайн найни чайсса
Буттахъал балай.
Дагъусттан, Гулисттан,
Чарий ххярх тIутIий,
Ттул дардирдал дарман
Ччаврил сававчий.
Вихра
КIусса ттуруллава гъарал дур хьхьицIлай,
Пахъ дагьсса хьхьунил цIан гьулусан дуллай,
Гъарал, вища бювхъур на уван пашман,
Хьунни ттул пикрирду гьанавиххи бан.
Амма къавхьур вища дакI гъав лаган дан,
Жагьилшиврул лама ттуву лещан бан,
ДакIниву лявхъусса чанна хияллу
Вила вирххулувух бявххун гьан буван.
Вихра дукканшиврийн бургъил туранну,
Мусил тIинттах тIутIайн хъямала дагьлай,
Щюллисса урттуя хьхьемал макь хIачIлай,
Пахъ дагьсса дакIнивун тирхханну рутлай.
Барчаллагь
Ссавнийсса цIурттахсса ччаврия бусав,
Ина бакъа дунъял жагьаннамри чав,
Вища жула ччаву, — цанъяв къакIула, —
Къархьуну тIий дачIин, на миннат къабав.
Амма барчаллагь вин, хьунабавкьун тIий
Ттул кьадарданувух гьуртту хьуну тIий,
Оьрмулул ца бутIа, бити чIивисса,
Ттул авдал ччаврингу хас бан бювхъун тIий.
КIулну бикIу, аьзиз, ттул хъазамраву
Жаваб дакъа ччаву дуссар ядурну,
Хъин къашай щавуну абадлий цIалай,
Ина махъ учирча, хъин хьун хIадурну.
Уча балай, саз
Нану ттул кIунттихьхьун, синтту мусил саз,
Бюххан ба чурххавун барзунттал аьяз.
Дути, дакIнийн дути вирттаврал Ватан,
Хан зунттал аьнтIикIа – Лакку билаят.
Уча балай, уча зунттал хъачIаха,
Хьамаран нанисса гьалак неххаха,
Муруллайх лирчусса лакрал щархъаха,
Лачинтран уртакьсса цил халкьуннаха.
УчIанна на вичIан, ттул Лакку улчай,
Заннал ттун буллусса оьрмулул бальзам.
Вил зунчал чассаг на ккашин буканна,
Дяркъу щинал шарав мякьлин хIачIанна.
Ттула хъазамраву ччаву яданна,
Шаврий яруннащал му кIидачIинна.
На вихсса эшкьилул савлугъиндаран
Дултти-Зунттул мицIлий ссувхIат буванна.
ВичIату нанийни арх ссапарданий,
Ттун азихъран диша хъункIултIутIул кьанкь.
Биша ттун цалчинсса ажарттал чIурду.
Гьулусан Хъуннеххал жиндралсса ххурхху.
Нану ттул кIунттихьхьун, синтту мусил саз,
Бюххан ба чурххавун барзунттал аьяз.
Дути, дакIнийн дути вирттаврал Ватан,
Хан зунттал аьнтIикIа – Лакку билаят.
Жагьилшиву
Жагьилшиву – му дур талихIирал аргъ,
Хъя куннасса тIутIи, бивтунмасса баргъ.
Жагьилшиву – му дур эшкьилул чапар,
КIукъакIулсса цIарал цалчинсса асар.
Жагьилшиву – му бур дакьаврил балай,
Дяъви къаччиминнал баянну учай.
Жагьилшиву – му дур тархъаншиврул занг,
Бурив му занглил чIу, халкь, зунгу баллай?
Жагьилшиву. Мунил кьимат буссарив?
Му дур щаращину щин дакъа арив,
Гьалак зунттал неххал вяйливсса щатIи,
Уртту дакъа ххяллай гуламан тIутIи.
* * *
Эшкьи-ччаврил цIарал ччувччун нанимий,
Тти ччаврил ссакарат нагу кIухIланна,
Балайлул багъраву бакI кIяла хьумий,
Аьшукьнал Буракьрай нагу щяивкIра.
Инт лухччинул чурххайн хъямала дагьайх,
Бизанттай дараччи хъяхъа увкунни,
Вил ттюнгъа яруннай яру бацIайхту,
ОьрчI эшкьилул сирру ашкара хьунни.
Жагьилсса хъазамрав ччаву дур лешлай,
Вил идавсил яру бур му ттухь буслай:
ХIавий, на учIанна му ччаву кIикIин,
Ттула ччаврил асар вищал кIибачIин.
Мусил цIурттал яха ссавнийх бувтунни,
Жунма хьунабакьин, аьзизмур, чIунни…
ЦIузурул гургагу ттуруллал дургьур –
Ашкара къабуван эшкьилул кьюлтIмур.
Якьутрал кIисса
Лаххи, дадай, вила якьутрал кIисса,
Сунуврал ккуккуну ляълу пар тIисса.
Бюхъай дакIнийн багьан вин ттива-ттигу
Ларгсса жагьилшиврул карамат кьисса.
Лаххайхьунссия му ина жагьилний
Ттюнгъану кIяласса исвагьи каний.
Бургъил тIиму ларсун бюхттул ссавния,
КъавтIи дайхьунссия ятIул ляълулий.
Дяркъугу, дяъвигу, ккашигу, мякьгу
Лавгунни. Ларгунни жагьилшивугу…
ЛивчIунни так вичIа якьутрал кIисса,
ХIайп бакъа оьрмулул гьайчали хьусса.
Вил дакIгу муданна пар тIисса дурча,
Кару, жигдартIнугу, ттюнгъана дурча,
Лаххи, дадай, лаххи, якьутрал кIисса,
Му лаххайхту, ина жагьил шарача.
Кьамул да ттул ччаву
Дагъусттан, аьрххилий на тIайла увксса,
Ттула дакI кьариртсса на вил зунттавур,
НякI яру — банавша вил барзунттайсса
Германнал вацIраву макIра ккаклай дур.
Итталух занай дур вил шархь ттуруллив —
Тунтну някIсса ссавнийх ссапар бавхIусса.
КIюрххицIун пахъ багьсса Каспилул щатIив –
Ххяххабургъил тIинттал туранну щусса.
Хьурдай чара лавхъун щамарал хъачIайн,
Дулттияллил зунчай тамаша буван,
Ялагу увчIуну щюллисса марщайн,
Неххал ххурххулухун щугълурдайн агьан.
Дагъусттан, оьрмулул чун утарчагу,
На махъ булав вия батIул къахьунсса.
Так ина кьамул да солдатнал ччаву,
Вил талихI буруччин чил дазуйн лавгсса.
Оьрмулул бухкIуллух
авцIуну ура
ОьрчIшиврул заманай, лавгунна ина,
АцIния мяйра инт хьунадакьав на.
Ша ласун сикъаслай, чIивиний куна,
Оьрмулул бухкIуллух авцIуну ура.
ТалихIрал жалин бур ссапарданий най,
Щюлли хьхьирил щатIайх хъарасру дихьлай.
Жамий, нагу уца – урача мякьну
Гьалаксса оьрмулул хIакьсса уртакь хьун.
ТалихI, талихI, талихI циняв чIа тIий бур,
ТалихI ссав буссарив ттун кIул хьун ччай бур.
Халкь, на та-бунугу талихI лякъинна,
Ттущава бюхъарча, му зуйх бачIинна.
