Вирттаврал ниттихъул дунияллий ца яла бусравмур, яла аьркинмур даву дурмири: дакIру хъинсса, захIмат ххирасса, итххявхсса, аькьлу-кIулшилул ва мяърипатрал бувччусса оьрчIру тарбия баврицIун, чувшиву ххисса, Ватандалул цIаний иш багьувкун жанну дулунгу махъаллил къашайсса жагьилтал тарбия бувмири. Аьрайн нанинал дакIниву зана къахьун бюхъайссарахха тIисса илгьан бакъа къабикIайссар, дяъвилия, бивкIулия нигь дакъа къадикIайссар. Аьраличунал пиша язи бувгьуманангу цува ци ххуллийн увкссарив кIулссар. КIулссар ччимур ппурттуву ярагъ кIунттил бугьан багьантIишиву. Укун сивсусса, савсъсса арсру тарбия бувсса Аьрасатнал ниттихъул цачIун хьунни апрель зурул махъсса гьантрай, спецоперациялул цIу лещан дурасса кIанай.

Мелитопольлал «Аьрасат – ттул тарихри» тIисса мультимедийный тарихрал паркраву кIанттул агьлу хьунабавкьунни СВО-лий шагьидталну жанну кьурван дурсса Аьрасатнал Вирттаврал ниттихъащал. НурмахIаммад ХIажимахIаммадовлул нину Сапижат Мазаева ва Андрей Ковтуннул нину Мария Костюк Запорожскаллал областьрайн бивну бур, цивппа кунма виртталсса арсрурваврацIа, ласурваврацIа, уссурваврацIа хьусса душваврал чIарав бацIан. Аьмсса къювулул гъан бувсса душваврал дакI хьунмур бусан. «Нацизмалущалсса талатавриву язинацIа хьусса хъаннил щавурдай ка дишин бувкIунни Сапижат Мазаева ва Мария Костюк. На вайннайн дазу дакъа барчаллагьрай ура мюнпатсса хьунабакьавурттахлу», – увкуна Запорожскаллал областьрал губернатор Евгений Балицкийл. Ванал кIицI лавгуна, цачIава региондалийгу бушиву хIасул бувну «Защитники Отечества» фондрал филиал ва чIун-чIумуй ва филиалданул кумагру байшиву аьралий бурж бартбигьлай жанну дуллусса вирттаврал кулпатирттан. Сапижатлул, бавтIцириннал тавакъюрайн бувну, бувсуна НурмахIаммад цукунсса арсгу, инсангу ивкIссарив. «Гьар ишираву чул бищай ттарцIъя. Дуккавривугу хIарачат бия, спортралгу итххявхсса уссия. Цувагу спортрал ца журалий гьашиву дайсса акъая. Гьармунивух гьурттуну ия. На махIатталгума хъанан бикIайвав, цукун ка хъирив лаяйривав тIий: карате, кикбоксинг, бокс…Хасият мукунсса дия, гьарзат лахьхьин ччисса, кIулшивурттал хъирив агьсса. Инсантуравугу ххуймур гьаз байва, къаххуймуних къулагъас къадайва, ялтту-лултту гьан байва. Даврил хIакъиравугу, хьхьичIра-хьхьичI цаятурасса тIалавшинна ххисса ия.

Арснал рота ца яла хьхьичIунмуръя. Цалагу хьхьичI ххуттайн ласайва гьарцагу цала талаталал цIуллушиву, щинчIав зарал бивну ччисса акъая». Бувсуна Сапижатлул СВО-лий ливтIуцириннан цуку-цукунсса кумагру буллай буссарив. «Жулвами кьакъабитайссар» тIисса калимагу так чIурду бавкьуну экьинанисса лозунг дакъашивуча, хIакьсса национал идея бушиву. «Аьрасатнал Вирттаврал ниттихъал бувсмунил бюххансса асарду биян бунни бавтIцириннайн. Мюнпатсса ихтилатру хьунни. Вайннул опытрал жул социал координатортурангу лахьхьин бувссар, укунсса къумашиву ялун дирсса инсантурал чIарав цукун бацIан аьркинссарив, ци журалул кумаг буван аьркинссарив. Яла-яла, ва батIаврил ниттихъал ва ща­хъаннил дакIурдивун цивппа цала дардирдащал кьабивтун бакъашиву, Ватандалул мурадру буручлай жанну дуллусса вирттаврал цIарду Аьрасатнал агьалинал дакIурдиву личIантIишиву исват бувссар», – увкуна Запорожскаллал областьрал «Защитники Отечества» фондрал каялувчи Евгений Маркеловлул. Вирттаврал яхIлувсса ниттихъул хьунабавкьунни Халкьуннал Советрал председатель Артем Жогащалгу. «Аьрасат – кьянкьасса инсантурал билаятри. Ватандалул мурадру буруччаврил ххуллий СВО-лий жанну дуллусса вирттаврал кулпатирттахгу, аьрай талатиминнах ичIува ялугьлагьиминнахгу дагьайкунсса къулагъас дикIан аьркинссар. Дяъвилуллив язими зеххай. Мария Федоровнал арснал жан дуллуссар аьралий гьалмахтал ххассал буллай. Сапижат Исяевнал арс НурмахIаммадгу цалва талаталтрал бару буван цIаравун ххявххунни. ЯхIлувсса ниттихъул СВО-лул гьурттучитурал кулпатирттан ва ветерантуран кумагру буллай бур», – увкуна ванал. Артем Жогал Вирттаврал ни­ттихъайн оьвкуна батальондалул «Спарта» тIисса музейравунгу. «Донбассрайсса хьунабакьавуртту, гьай-гьай, жул дакIру гьулусан дуллалисса дия, хъювсул буклай бияв жувагу, тайннал душругу.

Амма, циксса захIматсса кьинирду бакIрачIан дуркIун духьурчагу, Донбассрал агьлу яхI буллай, кьянкьану бавцIуну бия. Жун хъинну асар хъанай бия жулва арсурваврал аьпалул хIурматгу бюхттулну бушиву, минналгу, дагъусттанлувтуралгу, Аьрасатнал вирттаврал цIардугу хIурматрай зумух ласлай бушиву. Гьар кIанай жу гъилину, дакIру тIиртIуну хьунабакьлай бияв, жух ялугьлай бия, жу бучIаврия ххарину, бакIра-бакIрах, гъан хъанай, барчаллагьрал махъру тIий бия. Цинявппагу цIуллуну битаннав, хаварду ххуйсса баяннав, чара бакъа ххувшаву ларсъсса кьинигу дучIантIиссар, Донбассрал агьалинал къумасса дакIругу гьарта хьунтIиссар», – увкуна Сапижатлул. Ванил цилва ихтилатраву чIурчIав дурна, цуппа ва Мария Костюк аьмсса къювулул гъангу, дусгу бувшиврий. «Ларгсса шинал декабрь зуруй кIул хьура на «Защитники Отечества» ПаччахIлугърал фондрал регионнащалсса даврил управлениялул каялувчи Мария Федоровнащал. Телефондалувух буллалисса ихтилатравура ттун хIисав хьуна ванил дакIцIуцIаврийсса чIунил гъилишиву.

Яла, махъ хьунабавкьукун, ванил иттав ттун ттулламур къюву ккарккуна дагьанттуву кунна. Ва дазу дакъасса цалархьхьусса къювулул, яла къалагайсса мякьлил жу ккаккайхтува гъан бувнав. ДукIу декабрь зурул мяйнний Ватандалул Вирттаврал кьини, нагу, вагу хъачIрайн хъачI дургьуну Кремлилуву цачIу чIарав бавцIуну буссияв. Тания мукьах даврил иширттал ялув ччя-ччяни хьунабавкьуру, мукIру хъанайгу бура ялу-ялун ва хъамитайпалул, цилва яхI буваврицIун, лагма-ялттумигу цилва дакIнил чаннал тIинттай гъили лаган буллалишиву. Цинма цуксса захIматну бунугу, дакIнил куртIниву кIучI дурну хъин къашай щавугу, инсантурал хьхьичIун буклай бур ва бургъил тIиму кунма. Ванищалсса аьрххигу, гьарца бивзсса шагу, къуркъасса къумашиву лариртуну, чаннамур къявхъатIи бувсса дия. Щалва аьрххигу мукунма», – увкуна Сапижатлул. «Агарда жу жулла хажалатирттавунгу бувххун, жувунма жува лавгун къуццу тIурча, жул дакIру къумашиврул ялунгу чIулларча дакъа, пайда бакъассар. Жул мурад утти, агьалинан жулва асрурваврал чувшиву хъамакъаританмур буллалавур. СВО-лий жанну дуллусса вирттаврал аьпалун хасну мурхьру бугьлай бур, багъру ххяххан буллай бур, цаймигу давуртту дуллай бур. Жуща ми давурттавух хIала къабувххун бацIан къашайссар. Жува буссаксса шаймур буллантIиссару», – тIий бур яхIлувсса зунттал душ Сапижат Мазаева. Бюхттулсса зунттал билаятрай бувсса арсру ва ниттихъуллихха! Жува цIакьссару!

ПатIимат Рамазанова