Абумуслиннул арс Багъатиров Гьарун

Апрельданул 19-нний оьрмулул 76 шинаву жуятува личIи хьунни ЧIяйннал шяравасса Абумуслиннул арс Багъатиров Гьарун.
Гьарун увну ур 1948-кусса шинал цIанихсса Багъатирхъал Абумуслиннул ва ХIамзахъал ПатIиматлул кулпатраву.
1966-ку шинал хьхьичIунсса кьиматирттай ЧIяйннал дянивмур даражалул школагу къуртал бувну, захIматрал ххуллу байбивхьуну бур машгьурсса «Дагдизель» заводрай.
1967-ку шиная 1969 шинайн бияннин къуллугъ бувну бур Совет Аьралуннаву.

Гания махъ зун айивхьуну ур «Дагрыба» объединениялул, авто-транспортрал компаниялий ученикну, хъунама экономистну, 1984-ку шиная шийнай — хъунама инженерну.
1986-ку шинал кьамул ув­ссар партиялувун. 1988-ку шинал коллективрал тIалавшиннайн бувну, ивтссар АТК-лул начальникну, шикку зий унува къуртал бувссар Дагъусттаннал университетрал физикалул вечернее отделениялул факультет. Совет ХIукумат бири-бат шайхту, вайннал идара буллуссар Налоговый полициялул Департаментра­хьхьун, 2003-ку шинал ва АТК буллуссар РФ-данул Госнаркоконтрольданухьхьун, Гьаруннунгу дуллуссар полковникнал чин. Вай захIматсса шиннардий Гьаруннул хIарачатрайну ва предприятие саргъунну, лекьан къадиртун, цуя ца зузала укьан къаувну ядурссар.

Гьарун Багъатиров ия ххуйсса каялувчи, цащала зузиминнал хIурмат бувайсса, ваналгу хIурмат лахъсса бия идарарттал хъуниминначIа, дустурачIа.
Хъярчру бан, цIу бусса ихтилатру бан, куртIсса мяъналул хаварду бусан кIулсса, мяърипатрал увччусса, мачча-гъаннан ххирасса, ларайсса маданиятрал зунтталчу ия Гьарун. Гьарица даймуниву, дитаймуниву итххявхсса ва цинявннан ххирасса ия.

Гьаруннул хIалал дурну дур Аьрасатнал Рыбный хозяйствалул чулуха ХIурматрал грамота, дур «ДР-лул транспортрал лайкь хьусса зузала тIисса» цIа, Да­гъусттаннал ХIукуматрал грамота, АьФ-лул ФСКН-лул чулуха личIи-личIисса бахшишру.
Ванал цала кулпат Ханзадащал хъунигу бувну, ларайсса кIулшивурттугу ласун бувну, чивун буккан бунни кIия ххаллил­сса арс ва душ. Нитти-буттал яла багьа бищун къашайсса ххазина – тарбия дусса кулпатри.

Гьарун аьпалухьхьун лагаврил кьурчIишиву кIидачIлай, жижара буллай буру кулпатрахь Ханзадахь, арсурваврахь Саидлухь, Султаннухь, душнихь Асиятлухь, уссихь МахIаммад-Рашидлухь, ссурваврахь Рукьижатлухь, Сагъиратлухь, Насибатлухь, куявнахь Рустамлухь, ссурахъаврахь, цинявппагу гъан-маччаминнахь, дустурахь.
Цал бунагьирттал аьпа баннав, алжаннул ххари аннав, махъ­нал оьрмурдай барачат бишиннав.

ЧIяйннал жямат

---

ХIаммакIухъал ХIусман Рамазаннул арс

Апрель зурул 13-нний аьпалухьхьун лавгунни ххаллилсса лаккучу, хIурмат бусса вихьличу, ХIаммакIухъал ХIусман Рамазаннул арс.
Увну ур ХIусман 1937-ку шинал май зурул 6-нний Вихьуллал шяраву.

Бусса оьрмулий зий ивкIун ур Вихьуллал колхозраву.
ХIусман ия захIмат ххирасса, инсаншиву дусса, аьмал-хIал бавкьусса адамина, хъунмасса яхIирал заллу.
1984-ку шинал арулва оьрчIал ялату кулпат ахиратравун лавгукун, ХIусманнул цала оьрму оьрчIан хас бувссар. Хъунмасса захIмат бивхьуссар вай ччаннай бацIан бан, дуллуссар ххуйсса тарбия.

Кулпатрал кIалазуруй чивчусса: «хIарачат буванна оьр­чIарал ялув, инсаншиврул хIур­мат лавай гьаз банна», – тIисса цала махъру бацIан бунни ХIусманнул.
Лайкьсса тарбия ларсъсса ванал оьрчIругу цивппа-цивппа бусса кIанттурдай хьхьичIунну бур.
ХIусманнул хIурмат хъунмасса бия райондалул жяматрачIа, бусравну ия шяраваллил халкьуннан. ОьрчIалгу хъуннасса дия буттахасса аякьа.
ХIусманнул бувтссар цала оьрму лайкьну, эбратну.
Ва аьпалул шаврил кьур­чIишиву кIидачIлай, жижара буллай буру арсурваврахь, душваврахь, махъсса гъан-маччанахь. Алжаннул ххари аннав, рухI хъинний дишиннав, гьав нурданул дуцIиннав.

Вихьуллал, ЧIяйннал,
Ваччиял жяматру