Августрал 16-нний Самаралий къуртал хьунни Аьрасатнал Премьер-Лигалул 4-мур турданул тIуркIу. Микку ччаллий дурккунни Самараллал «Крылья Советов» ва МахIачкъалаллал «Динамо». Хъунама арбитрну ия Петрозаводскалиясса Никита Новиков, 4-1 счетрай ххув хьунни МахIачкъалаллал команда.

ТIуркIулул 6-мур минутIраву «Динамолул» защитник Андрес Аларконнул бакIрах ттуп бавкьуну, тIиртIунни счет. 22-мур минутIраву Никита Глушковлул бавкьунни 2-мур гол муттаэтурал къапулувун. 28-мур минутIраву Самараллал футболчи Иван Олейниковлул жулла командалул къапулувун бавкьунни ттуп. 77-мур минутIраву аххана уван майданнив увксса Даниил Лесовойлул бавкьунни 3-чинмур гол муттаэтурал къапулувун. 85-мур минутIраву «Крыльярдал» гьужумчи Джеффери Чинедул ккаккан дунни «ятIулсса карточка» гьужумраву фол баврихлу. 90+3 минутIраву жула гьужумчи ХIамид Агъаларовлул дацIан дурунни ахир-счет – 4:1. Утти МахIачкъалаллал «Динамо» лархъунни РПЛ-лул турнирданул таблицалул 3-мур ххуттайн. Жулла командалул 4-мур тIуркIулуву хьунни 9 очко. Микссава бур «Зенитралгу». «Крылья Советов» лирчIунни 14-мур ххуттай, мунил бур бувагу 2 очко.

ХI. Аьдилов