Ниттил мазурдил кьини шадлугърал тагьарданий кIицI ларгунни ДГУ-лул филологиялул факультетрай. Оьрус ва дагъусттан мазру лахьхьин буллалисса отделениялий преподавательталгу, студентъталгу бувккунни микрофондалучIан миллатирттал шаэртурал назмурду бюхттулну дуккин.

ЧIявуми студентътал цивппагу миллатирттал лаххиялуву бия, унгу-унгунусса байрандалул хIахI бия.
Филологиялул деканнал къуллугъ чIумуйну бартбигьлагьисса Эльмира Ширвановал кIицI лавгунни, ДГУ-лул филфак мудангу миллатирттал мазру ябуллалисса ца цIакьсса кюру бивкIшиву ва му ябансса хIарачат хIакьинусса кьинигу хьхьичIунну бушиву.

– Ттун хъинну ххуй бивзунни хIакьину студентътал пасихIну, бюхханну, гъирарай назмурду ккалаккисса куц. Багьандаран къаувккунни сахIналийн цучIав, ххуйну хIадур хьуну, ниттил мазрал ва автортурал хIурмат буну бувккунни. Ва иширавугу чIалай бур, ниттил мазурдил сий жагьилтурал дянив дакъа дакъашиву, цалва бава-ттаттахъал цанма пишкаш бувсса мазрал кьадру кIулну бушиву, – увкунни ванил.

– Ттун ниттил маз анжагъ махъру, гъалгъа бакъар. Ниттил маз – му аьзизсса ва язисса ниттил чIур, миллатрал ­аькьилшивур, куртIшивур. Ниттил мазрал кIулшивуртту куртI дуван ччисса жагьилтураща ДГУ-луву ниттил мазру хIасул шаврил тарих, миннул грамматика, лексика лахьхьин хъанай бур, фольклор ва литература лахьхьин хъанай бур. Жунма кIулмур жулва наслулунгу лахьхьин буваншиврул», – увкунни 3-мур курсирал студентка Имара ХIасанбаговал.
ПатIимат Рамазанова