ДГУ-лул хьхьичIуннайшивуртту ва бивщусса кьимат
Дагъусттаннал паччахIлугърал университет республикалул бакъагу, щалагу Ухссавнил Ккавкказуллал просвещениялул, элмулул ва культуралул центр хьуссар. ВУЗ-рал оьрму байбивхьуссар 1931 шинал 10 преподавательнаяту ва 75 студентнаяту. Цуппа хIасул хьуния махъ итабавкьуссар 150 азарунния ливчусса студентътал. ХIакьинусса кьини университетраву дуклай бусса бур 18 000 студент. Преподаватель – 800.
Университетрал филиаллу буссар Дарбантлив, Избербашрай, Къизлярдай ва Хасавюртлив. 1979 шинал Ухссавнил Ккавкказуллал республикарттал ВУЗ-ирдаву гьамин ДГУ-лли хьхьичIва-хьхьичI кьатIаллил билаятирттаясса студентътал дуклан кьамул бувсса. Махъсса шиннардий дуклай бур 50-нния ливчусса билаятирттаясса студентътал.
Ва ВУЗ къуртал бувсса Заур Аскандаровлул, республикалул парламентрал каялувчинал кIицI лавгсса куццуй, университетрал элмийсса потенциал Халкьуннал Мажлисращал уртакьну зузиссар социал-экономикалул агьамсса масъалартту ххал бигьлагьисса ва бартбигьлагьисса иширттаву. ВУЗ-рал выпускниктал бюхъулий зий буссар элмийсса идарарттай, промышленностьраву, кIулшиву дулаврил системалуву, паччахIлугърал органнаву. «Университетрал выпускник чув зий ухьурчагу, Дагъусттаннал цIа-кьини гьаз даврихар зузисса!» – тIий ур парламентрал председатель.
«ДГУ-лул ттул оьрмулуву агьамсса кIану бувгьуссар, на студентну, аспирантну, Комсомолданул комитетрал секретарьну ивкIссара, яла махъату лекциярду ккалай, семинарду дуллай ивкIра. Нава «университетский человек» ушиврия мудангу пахрулий уссара», – тIий ур Дагъусттаннал цалчинма президент Муху Аьлиев.
«Республикалул агьаммур ВУЗ-ри, халкьуннал шаэр Расул ХIамзатовлул увкусса куццуй, «Дагъусттаннал яла чаннамур ужагъри» тIий ур юбилейрал шадлугърай гьуртту хьусса республикалул Парламентрал комитетрал каялувчи Артур Исрапилов.
ХIукуматрал къуллугъчитураву, элмулул ва творчествалул зузалтраву чансса бакъар, личIи-личIисса ппурттуву къуртал бувсса университетрал юбилей цалагу байранни тIутIисса. Ттулгу байранни. Нагура Муху Гьимбатовичлул тIийкунсса «университетрал инсан».
1991 шинал филологиялул факультетрай тIивтIуссар лакрал отделение. Яла махъату личIину дагъусттан филологиялул факультет. Му цалчинсса лакрал отделение къуртал дурсса ряхва душвавравасса цара нагу. ХIакьину «Илчилий» зузисса сайки циняв душру ДГУ къуртал бувмири. Хъунама редактор – журналистикалул факультетрай лекциярду ккалай уссия. Гьаннайсса, жулгур юбилей.
Жула университетран чIа тIий буру цIу-цIусса яргсса хьхьичIуннайшивуртту тарихрал даптарданий!
ПатIимат Рамазанова