Апрельданул 17-нний Ма­хIач­къа­лалив хьунни давурттах луглагиминнан ххуллурду тIитIлатIисса «Работа России. Время возможностей» тIисса щалагу Аьрасатнал ярмарка.
Шикку гьуртту хьунни ДР-лул захIматрал министрнал хъиривчу Жабраил Жабраилов, ДР-лул транспортрал ва ххуллул хозяйствалул министрнал хъиривчу Саэд Рамазанов, Дагъусттаннал профсоюзирттал федерациялул председательнал хъиривчу Муса Билалов. Ярмаркалул даву дайдихьлахьисса мажлис тIивтIуна Жабраил Жабраиловлул.
– ХIакьину Аьрасатнал цинярдагу регионнай архIал дайдирхьуссар агьали давурттал дузал буллалисса ярмаркалул лагрулийсса мероприятияртту. Вакансиярттал ярмарка даврил мурад хъанахъиссар давурттах луглагими ва давурттал щаллу буллалими цачIун баву. Шикку давурттах луглагиминнан хIасул дурну дур республикалул ва Аьрасатнал регионнайсса чIирисса ва хъунисса предприятиярттал ва бизнесрал каялувчитуращал хьунабакьинсса, цIухху-бусу бансса къулайшиннарду. Пишакартал тIалав буллалиминнангу цала идаралия балжину бусан ва кадрардал масъала щаллу бансса сант ххишала хъанахъиссар. Гьашину вакансиярттал ярмарка цалархIал най диркIссар республикалул шагьрурдайсса ва районнайсса 46 площадкалий. Республикалий дуллалисса ярмаркарттай гьуртту хьуну ур 15 азара инсан, 500 предприятие. МахIачкъалив дуллалисса ярмаркалий гьуртту хьунни МахIачкъала ва Каспийск шагьрурдаясса 50 предприятие. Вайннал тIивтIуну бур 1000 пишакар тIалав уллалисса вакансияртту.
Ярмаркалий личIиссара къулагъасрайн лавсун буссар хасъсса аьралий операциялул гьурттучитал ва миннал кулпатру. ТIивтIуну буссар хасъсса аьралий операциялул гьурттучитуран маслихIатру буллалисса «Годекан для СВОих» тIисса ва «Очаг для СВОих» тIисса, аьралий операциялул гьурттучитурал ниттихъал ва миннал кулпатирттал чIарав бацIлацIисса клубру, – увкунни Жабраил Жабраиловлул.
– Ххирасса оьрчIрув, хIа­кьину шикку хIасул дурну дур зула оьрмулул ххуллу язи бугьансса каширду. Хъунисса ва хьхьичIунсса компаниярттал баян буллай бур цачIавасса вакансиярттая ва дуллай бур карьералул лавай хьунсса сант. Гьурттучитуран кIул хъанай бур цIусса вакансиярттая ва даврийн кьамул буллалиминнансса хIукуматрал чулухасса ка-кумаграя. Му бакъассагу, бюхълай бур давурттал дузал буллалиминнащал собеседование дурну, жула региондалий дакъассагу, республикалул кьатIувгу давуртту лякъин. Чялиш буккияра зула бюхъугу, гьунаргу, кIулшивурттугу зунна мюнпат буну ишла дан, – увкунни Муса Билаловлул.
Авадансса дия ярмаркалул программа. Хьунни шикку давурттал дузал буллалиминнал чулухасса презентацияртту, тренингру, семинарду, личIи-личIисса пишардал сферардавусса мастер-классру ва хъуними классирттал дуклаки оьрчIансса «Вакансия» тIисса тIуркIу. Шиккува бия давурттал дузал буллалими ва давурттах луглагими хIала-гьурттуну зунсса ва агропромышленный предприятиярттал пишакартал цачIун буллалисса хасъсса майданну.
Ярмаркалий гьурттучитурахь бувсунни «Кадры» тIисса миллатрал программалул лагрулий уква пиша лахьхьинсса ва пишалул даража гьаз бансса шартIирдаягу.
Ярмаркалул сакиншинначитурал кIицI лавгунни цIанасса ппурттуву тIалавсса пишардал квалификация гьаз даву мурадрайсса ххуллу-чаранну. Давурттал дузал буллалиминнал бувсунни даврийн кьамул баврил шартIирдая ва пишакартурал чулухуннайсса тIалавшиннардая.
Гьурттучитураща бюхълай бия республикалул Агьали давурттал дузал буллалисса центрданул чулухасса хIаллихшиннардал хIакъиравусса балжисса информация кIул бан. Ва кьинисса ярмаркалий мукунма бия жяматийсса идарарттал ва политикийсса центрдал вакилтуращал хIала-гьурттуну зунсса ихтиярду дусса майдан.
ХIасил, ярмарка хьунни студентътуран, дуклаки оьрчIан ва давурттах луглагисса инсантуран ххуллурду тIитIлатIисса агьамсса ишну. Ярмарка наниссаксса хIаллай дуклаки оьрчIал ва студентътурал ккаккан дунни концертрал программа.