«Илчилул» редакциялул ва ттула чулуха барчаллагь тIий буру, кказитрал цалчинма редактор, революционер, Дагъусттаннай цалчинсса драма чивчусса драматург, публицист, шаэр Гьарун Саэдовлул гьайкал цIу дуккан давриву ва му тIитIаврил мажлисрал сий гьаз давриву чIарав бавцIусса Ваччиял жяматрахь, Лакрал райондалул администрациялул зузалтрахь, школардал учительтурахь ва дуклаки оьрчIахь, Дагъусттаннал Халкьуннал Мажлисрал Лакрал ва Ккуллал районнаясса депутатътурахь, хъамаллурахь ва цинявппагу ва ихIсандалул ххуллийсса давриву гьуртту хьусса лакрал агьалинахь.

 
Зул бивхьусса захIмат кIилийну зана хьуннав. Зул аьрххи-ххуллу ххаришиврийн бакъа къабагьаннав, хъинмур, ххуймур бакъа къахьуннав, дуллалимуниву кабакьиннав.

 
Жува куннал кув цIакьну бугьарчан, чIарав бацIарчан, ка-кумаг булларчан, жущара дан къашайсса дакъассар.
P.S. Жу бусраврай кказитрал редколлегиялувун кьамул буллай буру: Зураб ХIусайнович Куччаев – Лакрал райондалул бакIчи, Артур Михайлович Амуттинов – Дагъусттаннал Халкьуннал Мажлисрал депутат, Зайнуллагь Нуруллагьович Мирзоев – ЦIуссалакрал ихIсандалул фондрал хъунама.

 
Жущава цачIу «Илчилул» сий жула миллатрал дянив бюхттулсса даражалийн гьаз дан бюхъанссар тIисса умудрай буру.
Руслан Къардашов, «Илчи» кказитрал хъунама редактор