Москавливсса Дагъусттаннал Культуралул центрданул ва Мариян Илиясовал цIанийсса «Дараччи» фондрал Москавливмур филиалданул дуллалисса давурттаву ца яла чялишну гьуртту шаймурди Цалчинмур ЦIувкIратусса Исял душ ПатIимат Садикьова. Цивппа зузисса коллективрдал дянив ххишала бакъа бусравну оьрму бувтсса нитти-буттал душри.
Бувссар ва 1965-ку шинал мартрал 16-нний МахIачкъалалив. Дуклай бивкIссар 26-мур школалий. 1979-ку шинал ва школалий 8 классгу къуртал бувну, МахIачкъалаллал Балугъирттал промышленность лахьхьин дувайсса техникум къуртал бувссар марцIсса ххювардай. Ва техникум къуртал бувсса шиналва шяравучунан, МахIаммадрамазаннул арс МухIуттиннун щар хьуну, Москавлив бивзссар.1990-ку шинал дуклан бувхссар Аьрасатнал паччахIлугърал Машлул-экономикалул институтравун (уттисса В. Плехановлул цIанийсса РГТЭУ). ПатIимат зий бивкIссар аудиторну, хъунама бухгалтерну Москавливсса хъуни-хъунисса идарарттай: Москавуллал областьрал газралсса буллалисса «Аналит-С» тIисса фирмалий, мукунма строительствалул давуртталсса буллалисса «Евроимпериалстройинвест» ва «Трио строй» фирмардай. Давриву ва бур карчI дакъасса, куклусса, дирисса. ХьхьичIунну зузаврихлу ва лайкь хьуну бур Москавуллал ХIукуматрал цIаниясса хIурматрал лишаннан ва барчаллагьрал чагъардан. Даврил уртакьтурал ккураннал дянив ванил хIурмат бур, даву ххуйну кIулсса буну тIий, цIу-цIусса кIулшивуртту куртIгу, цIакьгу дуллай, хъирив багьнувасса буну тIий. Хъинну хIарачат бусса, дан-дитан кIулсса буну тIий. Яла захIмат-жапами давуртту ванин вихшала дувайсса дур. ПатIиматлул гьарзат сантирай низамрайн рутансса кIулну. Ванил хIурмат-кьимат ххишала бакъа хъунмасса бур архIал зузиминнал дянив хIакьинусса кьинигу. Лавайсса даражалул пишакар хIисаврай, ванил куртIсса кIулшивуртту ва магьирсса опыт тIалавну бур мудангу, гьарца кьинигу.
Каялувчинал гьунар ирсирай къабиярчагу, цивппа зузисса кIанттурдай каялувшиву дуллалисса нитти-буттал хасиятирттава кьянкьашиву, захIмат ххирашиву, даву капливун руртун дуван ччишиву ласайхьунссар оьрчIалгу. ПатIиматлул ппу, Оьмархъал арс Ися, жагьил заманнай Каспийск шагьрулий комсомол организациялул хъунаману уссия, яла — МахIачкъалаллал Сепараторду бай заводрал директорнал хъиривчуну. ХIакьинусса кьинигу даврил уртакьтуран, заводрай зий бивкIцириннан ва кIулссар бюхъу-бажар бусса хъунама хIисаврайгу, даву куртIну кIулсса пишакар хIисаврайгу. «Щалва завод Ися Оьмаровичлуйри бавцIуну бусса» тIисса калимагу цIакь хьуну диркIссар. ДачIи шинайсса ва заводрай зий бивкIсса навагу барара, бигьалагай кьинирду, перерыврду къакIулсса инсан икIайва, цаярагу тIалавшинна дусса, циняв зузалтраягу. ХьхьичIа-хьхьичI заводрайн учIаймагуя, махъа-махъ заводрая лагаймагуя. ПатIиматлул нину Нураниятгу, институт къуртал байхту, зий бивкIссар МахIачкъалаллал Аьшвашханардал ва рестораннал трестраву хъунмур бухгалтерну. Вагу совет заманнай хъунмасса идарая. ЦIими бусса, инсаннал чIарав бацIан, кумаг бан хIадурсса хъамитайпа бикIайва.
Каялувчинал кьянкьашиву дусса бушивруцIун, ПатIимат хIалимсса, ттюнгъасса, чIу тIааьнсса, цIимилийсса, ихтилат кIукIлусса душри. БакIралгу ххуйсса. Шиккува кIицI къалавгун битан къахьунссар, лахъисса хIаллурдугу бусса ПатIимат жагьил заманнайва я щунал ябацIайсса авурсса душ бивкIшиву, ва буцин къаччисса шяравучу къаивкIшиву. Шагьрулий бувсса, хъуни хьусса бунугу, миллатрал мазгу, аьдатругу ххирасса бушиву ПатIимат, ванил хъунмур ссу Аьйшат ва уссу Оьмар. Исял ва Нураниятлул аслийсса лакку ужагърай хъуни хьусса оьрчIру цамур куццуйссагу бикIан къабюхъайссия.
Москавливгу МухIуттиннул ва ПатIиматлул ужагъ хIакьсса лакку ужагъну буссар вайннаннин буххай-буккайцириннан. Мандолинагу бивщуну, лакку макьанну дуцлай, лакку балайрду экьинани бувну, ичIува дуссухун бавтIцири тяхъа-шад бувайссар МухIуттиннул. Вайннан ххаллилсса даражалий миллатрал фольклор, багьу-бизу кIулссар, махъ бакъа, бучIи лякъайссар лакрал культуралул мероприятияртту дуллалийни. ПатIиматлулгу, лакку дукрарду дурну, хъин битайссар хъамал. Ванил бувсса аьрайн-гьавккурттуми Москавливсса лакрал культуралул мероприятиярттай, бириян къабитлай, хъямала байссар. Ларайсса кIулшивурттугу дуллуну, узданну чивун буккан бувссар МухIуттиннул ва ПатIиматлул душру, кIивагу щар хьуну, лас-къатлулсса, оьрчIалсса буллай бур, арс школа къуртал буллай ур.
«Дараччилул» Москавливсса филиалданул душваврал ккурандалул вирдакIри, ца чул бищай ттарцIри. Цуксса мажал бакъасса даву дунугу, ванил лякъай чIун фондрал дикIу, МЦК-лул дикIу сипталийну, хIарачатрайну дуллалисса давурттаву иширайну гьуртту хьунсса, сахаватлувну ка кIидахIай. Хъинну хасиятрал ххуйсса, гьарманащал бавкьусса, дакI ххуйсса душ бур. Ттун ва «Дараччи» фондрал давурттавух хIала бухханнинма кIулссия, ва ттул хъунмур ссил Зираятлул хьхьичIунсса дус бур. Ци журалул масъала тапшур буварчагу, кIу къабивзун, бартбигьинсса хIарачат бувай, хъуннасса ххаришиврущал дуллалимунил чIарав бацIай, укунсса душру ккурандалуву бушиву хъунмасса тIайлабацIур», – тIий бур Басират Билалова.
Душвавращал архIал ПатIимат чIун-чIумуй бияйссар госпитальлайн, шикку хъин хъанахъисса аьралийтуран аьркинмур ларсун. СВО байбивхьуния шийнмай гуманитар кумаг буллай буссар. Амма ПатIимат кумаг лявкIуну, итталун къабагьанну буван ччисса буссар. «Армия ва агьали цачIу бушиву исват бувансса, Аьрасатнал мурадру буручлачисса вирттаврал чIарав бацIансса ттула чулухасса чIивисса бутIар, талатиминнал дакIру чанссарагу гъили лаган дуваншиврулсса», – учайссар мудан ПатIиматлул. Оьрмулуву яла хъунмур бахшишнугу ккалли дуллай бур цищава кумаг бан бювхъусса инсантурал барчаллагьру.
Мартрал 16-нний ванил юбилейри. Ва юбилей барча дуван, цаппара хIалал бувсса, гъилисса махъру къаувкуну бацIан къавхьунни. ЧIа тIий бура бургъил чани дакIниву бусса ПатIимат Садикьован оьрмулия щалихханнин битаву, цIуллушиву. Ттининнин кунма, ттинияр тихунмайгу ина мукунма бусравну, ххирану личIаннав тIий буру. БуллалимуницIун кабакьиннав. Душваврал, арснал ва вайннал наслулул ххари буллай битаннав.
ПатIимат Рамазанова
