Филармониялул Гъинтнил майданнив

МахIачкъалалив Дагъусттаннал паччахIлугърал филармониялул Гъинтнилмур майданнив хьунни Республикалул Конституциялул кьинилун хас дурсса шадлугъ. Ванил дайдихьу дурна Дагъусттаннал опералул ва балетрал театрданул хорданул ва симфониялул оркестрданул, республикалул гимн щаллу даврийну.

Ва хьхьуну залданувун бавтIми республикалул халкьуннал ихтиярду, паракьатшиву дуручлачисса закондалун хас дурсса кьинилущал региондалул бакIчи Сергей Меликовлул, Халкьуннал Мажлисрал ва ХIукуматрал чулуха барча буллалисса, ва байрандалул тарихрая бусласисса ихтилат бувна ДР-лул ХIукуматрал председатель Аьбдулмуслим Аьбдулмуслимовлул.
– ХIакьину жулла чIяву миллатру бусса республикалул кIицI лаглай дур жулва тарихраву хъуннасса агьамшиву дусса иширал 30 шин. Жулва билаятран бигьа дакъасса чIумал кьамул дурсса закондалул кабакьу буллалиссар чIяву миллатру бусса Дагъусттаннай дакьаву, паракьатшиву, цашиву дуруччаврицIун, республикалул политикалул ва экономикалул саргъуншиву ядаврицIун, – увкуна премьер-министрнал.
Гихуннай ванал чIурчIав дуруна ванияр 25 шинал хьхьичI республикалул тарихраву хьусса бала-апатIсса аьралий иширттай, вайннуву жулва халкьуннал ккаккан дурсса виричувшиврий, цашиврий.
«Живая классика» конкурсрал финалист Тамерлан Хизриевлул дюхханну дурккуна Роберт Рождественскийл «Что же такое «мы»?» тIисса назму.
Хъирив республикалул творчествалул коллективирттал ва таксса гьурттучитурал ккаккан дурна хъуннасса концерт.