Дагъусттаннал халкьуннал сипатру

Вай гьантрай Кулпатрал кьинилун хас дурну республикалий най диркIсса мероприятиярттавасса ца хьунни «Нити» тIисса цIанилусса суратирттал выставка.

«Нити» хъанай бур суратирттайну Аьрасатнал чIяву миллатру цачIун буллалисса искусствалул проект. Ванил каялувчи ур кинодокументалист Родион Исмяилов.
Ва цала командалущал Да­гъусттаннайн увкIсса чIумал, тIабиаьтрал караматшивурттал суратирттацIун, ришлай ивкIун ур зунттал щархъаву ялапар хъанахъисса жула халкьуннал суратругу.
Ванал проектрал агьаммур мурадгу хъанай бур Ккавкказуллал халкьуннал культуралийхчIин, багьу-бизулийхчIин ва аьдатир­ттайхчIин миллатирттал дянивсса дахIавуртту цIакь даву.
Выставкалий гьурттушинна дурна Дагъусттаннал Художниктурал союзрал председатель Кьурбанаьли МахIаммадовлул, ДР-лул Миллатирттал политикалул ва диндалул иширттал министерствалул, культуралул, жяматийсса идарарттал вакилтурал.
Выставкалия буслай, Родионнул кIицI лавгуна тамашалий дирхьусса цинярдагу портретру агьамсса душиву.
«Вай укуннасса суратру да­къарча, вай инсантуращал нава кIулгу хьуну, вайннащал хIакьинусса кьинигу ттула цIакьсса дахIаву душиврияссар. Утти вай цинявппагу ттул дусталли», – увкуна Родионнул.
Шиккура ккаккан дурна Родионнул Дагъусттанная ларсъсса документал кино. Шиву ванаща ккаккан бан бювхъуну бур республикалий ялапар хъанахъисса цинявппагу миллатру, миллатирттал мазру, аьдат-эбадатру.
«Ттун пикри хьуна жула билаятрал халкьуннал сипат ккаккан дуллалисса документал кино ласун. Му пикри дузрайн буккан баншиврул хъунмасса хIаллай луглай ивкIра кино ласунсса кIанттурдах. Ца ппурттуву, Дагъусттаннайн кинофестивальданийн увкIсса чIумал, бувчIуна, ттула хиял ца кулпат кунма чIявусса миллатру ялапар хъанахъисса Дагъусттаннал аьрщарай бартлаган буван бюхъантIишиву. Мунияту на, Дагъусттаннайн увкIун, ларсъссия кино. Ттун ччива щала билаятрал агьулданухь бусан макьанну кунма экьи нанисса Дагъусттаннайсса миллатирттал мазурдил ва ца аьрщарай уссурвалшиврий ялапар хъанахъисса Дагъусттаннал халкьуннал караматшиврия. Чуври бусса цаймигу укун чумартсса, уздансса хасиятру дусса инсантал, – увкуна Родион Исмяиловлул. Кинораву ур жула СунбатIлиясса захIматрал ветеран, аькьилсса инсан МахIмуд Аьлиловгу.
«Цала культура ва тарих ххирасса инсантуранни миллатгу ххирасса бикIайсса. Проект бур просвещениялул, тарбиялул, политикалул зумунусса хасиятру дусса. Художниктураща бювхъуну бур Дагъусттаннал чулухунмайсса гъилисса асарду ккаккан буван. ХIатта, проектрал кумаграйну дагъусттанлувтуран цаятува, цала багьу-бизулия, аьдат-эбадатирттая, масъаларттая уттинин къакIулну бивкIсса затругу аьлтту хьуну бур», – увкуна Кьурбанаьли МахIаммадовлул.
Ванал цала ихтилатраву кIицI лавгуна Дагъусттаннал халкьуннал цайми миллатирттаха къалархьхьусса ляличIисса лаххи-ликкия душиву.
Дагъусттаннаясса асардая Родионнул бувсуна: «Кино ласласийни хъинну бигьану бия, цанчирча ттул лагма лавгун бивкIун тIий кумаг бан, хIала буххан хIадурсса ххаллилсса инсантал. Гъирарай хIала бухлахисса, чIарав бацIлацIисса инсантурал ттувун кино ласунсса шавкь ххишала рутлай дия. ДакIнийхтуну барчаллагьрай ура Дагъусттаннал халкьуннайн», – увкуна ванал.
«Нити» проект дузрайн буккан бувну бур «Культуралул сиптарду» тIисса Президентнал фондрал ва Дагъусттаннал Патриотътурал жяматийсса советрал чIарав бацIаврийну.
Кино ххал дурну махъ, ххаллилсса концертрал программа ккаккан дунни Татам Мурадовлул цIанийсса Дагъусттаннал филармониялул артистътурал.
Имара Саидова