ДР-лул ХIукуматрал председатель МахIаммад Рамазановлул сентябрьданул 12-нний Минцифралул къатраву ВКС-рал низамрай дунни ДР-лул финансирттал ва экономикалул ккаккиярттал хIакъиравусса батIаву.

Масъала ххал бигьавривух гьуртту хьунни министерстварттал, ведомстварттал ва муниципал сакиншиннардал каялувчитал. Премьер-министрнал бувсунни финансирттал ва экономикалул ккаккиярттал хIакъиравусса батIавуртту дуллантIишиву гьарца нюжмардий.

«ЧIумуя чIумуйн бишланну щалагу Аьрасатнал рейтингирттаву республикалул бугьлагьисса кIанттун кьимат. Ми рейтингру ккаккан дурну дур «Губернатор» тIисса дашбордрай. Микку чIалачIи бувну бур цIанасса чIумул контрактациялул ва касса щаллу баврил даража (текущий уровень контрактации и кассового исполнения), мукунна ДР-лул бакIчинал ва ттул тапшурлугъру бартдигьаву. Жула хьхьичIсса масъала хъанахъиссар ми ккаккиярттал мониторинг дузал даву, цила чIумал ялун личин буллалаву дузал буван захIматсса масъалартту ва ччясса мутталий лякъаву ми дузал бувансса ххуллурду», – кунни МахIаммад Рамазановлул.