Мартрал 22-нний Новостройрал ЦIуссалакрал шяраву цIуну бувсса тазиятрал къатлуву дунни райондалул жяматран­сса ифтар. Зумаритавал чIун хьувкун бавтIунни тамансса инсантал, ифтарданий гьуртту хьунни ­сайки циняв шяраваллал бакIчитал ва цаймигу вакилтал. Таман­сса инсантал бувкIунни цайми кIанттурдаягу.

МахIачкъалалия бувкIунни хIурмат лавайсса хъамал: ХIажи Султанов, Ссапарбаг Аьбдуллаев, Шалласу Шалласуев ва ­цаймигу.
Мубараксса Кьуръандалувасса хIадисру бувккунни хIапиз Адамлул.

Ихтилатру­ бунни МахIачкъа­лаллал Имамтурал советрал председатель Даниял Умаиловлул, ЦIуссалакрал райондалул бакIчи МаматIи ХIамзатовлул, ДР-лул Жяматийсса палаталул председательнал хъиривчу Ссапарбаг Аьбдуллаевлул, ДГПУ-рал ректорнал советник Давуд Тумалаевлул, райондалул жяматрал чулухасса вакил Зайнулла Мирзоевлул, ЦIуссалакрал райондалул Имамтурал советрал председатель Мансур Хаваевлул.

МаматIи ХIамзатовлул ихтилатраву бувсунни ЦIуссалакрал шяраву тазиятрал къатта буллай бивкIминнал, кумаг бувминнал цIарду ва барчаллагь увкунни шяраваллил мизитрацIун ваксса ххуйсса, хъунмасса къатта бувминахь, чIарав бавцIуминнахь, кабакьу бувминнахь. Мансур Хаваевлул ихтилат хас бувну бия жагьилсса ник тIайласса ххуллий тарбия даврин.
Махъру лавхъун махъ ЦIусса­лакрал район­далул оьр­­му­луву ва давурттаву хьхьичIуннай­шивуртту дурминнан дуллунни наградартту.
ХIасан Аьдилов