1999-ку шинал августрая тIайла хьуну чIявусса тIарду бия дунияллул халкьуннал дянивсса террористътал ЦIуссалакрал райондалийн ххяххаврил хIакъираву. Миннувух дия сентябрьданул 5-ку кьинигу, гьаман му кьини террористътурал гьужум бувна Липецкаллал ОМОН бивкIсса спортзалданийн. Боевиктуран кIулну бивкIун бур ми паракьат хьусса кIану, хъунмур рищавугу миннайх дурну дия. Амма гара чIумал талатавривух хIала бувххун бивкIссар жула ФСБ-лул ва РОВД-лул отделлугу.
Сентябрьданул 5-нний кIюрххила бандитътурал хьхьичIалу кьуркьуссар ФСБ-лулгу, РОВД-лулгу, Связьрал узелданулгу цачIу. ФСБ-лул отдел бия райцентрданий клубрал чIарав. Хьхьунил ссят 11-нний жуща бюхълай бакъая миннащал дахIаву дуван. Яла Липецкаллал ОМОН-лущал хIала-гьурттуну зий ивкIсса ца кIанттул ялапарлувнал кумаграйну жуща бювхъуна миннащал дахIаву дуван. Миннавух бия щавуртту дирссагу. Калпуширттал чIира зевххуну, жуща хьуна РОВД-лул къатравун буккан бан, щавурду дирмигу, ливчIмигу .
Муния махъ липецкаллал оьрчIал ФСБ-лул ва РОВД-лул зузалтращал цачIу дайдирхьуна боевиктуращалсса талатаву. Ссят 12 хьусса ппурттуву амру бувна – шярава буккан. Му чIумалнин шяраваллил ялапарлувтал буклай бия талатаву нанисса кIанттурдава. Сентябрьданул 5-нния 6-ннинсса хьхьунил 2 ссятравун жяматрал цалчинмур группа тIайла бувккуна Хасавюртуллал чулийнмай. ЛивчIми буклай бия Чапаево шяраваллил чулийнмай, Чачаннал чулийнмай, лагма буклай, мунияту ххуллу кIилий хъунма хъанай бия. Цайми ххуллурду лякъин жун кумаг буллай бия Чапаеволиясса шама инсан. Жу РОВД-лул зузалт бачIарду 10 –10 инсанная сакин хьусса группардайх. ТтучIагу хьуна 19 инсан. Утти жуща бюхълай бия жуйвану жува къуццу буллан.
ХьхьичIунмай бачиннин Чапаево постраяту кIункIу барду блок-пост. ЖучIа бия 2 БМП ва Виваллил аьралуннал 10 инсан. Щавурду дирсса инсантал жущалва зунттал чулийнмай буцин бюхълай бакъая, мунияту хIукму хьуна ми БМП-лий Хасавюртуллал чулийнмай буккан буван. Миннаща бювхъуну бия цаламинначIан буккан.
Жува тIурча, ЦIуссалакрал ва Казбекуллал районнал дазуйх хьуну, бувкру ЦIуссаккуллал шяраваллил штаб бусса кIанайн ва гьуртту хъанай буссияв тиккусса талатавурттавух. Яла дяъвилул иширттавух хIала-гьуртту хъанай бия федерал гужру. Дяъвилул иширттай каялувшиву дуллай ия генерал Виктор Казанцев.
Боевиктурал полевой командиртурал Хаттаблул ва Басаевлул пикри бухьунссия кIанттул агьалинал цацIунма кабакьинссар тIисса, амма кIанттул агьали миннайн къарши бувккун, ххит буккан бувна, бандитътал чIявусса бунугу.
Бищун хIадур бувссар
ХI. Аьдиловлул
