Аьралитуран ссайгъатру гьан бунни

Хасъсса аьралий операциялийминнан гуманитар кумаг гьан буллай, ЦIуссалакрал агьалиналгу цала бутIа бихьлай бур ххувшаву гъан давриву. Ноябрьданул 19-нний ЦIуссалакрал райондалия лавгунни аьралитурансса ссайгъатирттащалсса кIива хъуни машина. Миннува ца тIайла бувккунни Новостройрая.
Хасъсса аьралий операция байбивхьуния шийнмай райондалул педагогтал, дуклаки оьрчIру, нину-ппу чялишну гьуртту хъанай бур аьралитуран гуманитар кумаг тIайла буккаврил давриву. Ва ххуллухь вайннал гьан бунни дука-хIачIанмур, гъилисса янна, щин, чара бакъа аьркинмур дирхьусса 200-нния ливчусса къуршив, 6 азарда кило дусса кьай. Ми дакъассагу, тIайла дурккунни генератор ва окопный чирахъру бусса 17 къурши. Акциялуву гьуртту хьуминнал мурад бур захIматсса шартIирдайсса аьралитурал тагьар чанссарагу бигьа даву, миннал дакI даву, мукунма цинявппагу жува ххувшаву ласуншиврийн вихну бушиву ккаккан баву. Жула аьралитал хьхьичI ххуттай бавцIуну талатисса чIумал, цаягу инсаннаща чулий ацIан къашайссар.Тайннан жула аякьа асар хьун аьркинссар.
Гуманитар кумаг тIайла буккавриву гьуртту хьунни ЦIуссалакрал райондалул бакIчи МаматIи ХIамзатов, ванал хъиривчутал, райондалул администрациялул ва кIулшивуртту дулаврил сфералул зузалт, дуклаки оьрчIру.
– Гъан-маччами бакъассагу, щалагу райондалул агьлу ялугьлай буссар жула оьрчIру сагъ-саламатну, ххувшавугу ларсун бучIаннин. Аьралитуран жулва кумаг аьркинссар, му жува уттиния тихунмайгу буллантIиссару. Ва давривух гьуртту хъанахъисса цинявннахь барчаллагь тIий ура, – увкунни МаматIи ХIамзатовлул.

Аьралуннаву къуллугъ буллан лавгунни

Октябрьданул 1-нний Аьра­сатнаву дайдирхьунни ссуттилсса призыв. Жагьилтал аьралуннавун буцлантIиссар декабрьданул 31-ннийн бияннин. Хасавюрт шагьрулул, Хасавюртуллал ва ЦIуссалакрал районнал аьралий комиссариатрайн цIуллу-сагъшиврул тагьар ххал дан букIлай бур призывниктал.
Призыврал комиссиялул давриву гьуртту хъанай бур ЦIуссалакрал райондалул бакIчинал хъиривчу Макьсуд ХIамидов, аьралий комиссар Абакар Давудов ва м.ц. Вай гьантрай аьралуннаву къуллугъ бан лавгунни Гьамиящиял шяравасса Илиясов АьбдулхIажи, уссурвал Муса ва Жамал Гойтимировхъул ва цаппара цаймигу. Вай тIайла буккан бувкIун бия гъан-маччами, дустал. КIицI лаган, призывниктал хьхьичIва кунма ца шинайссар къуллугъ буллантIисса.

Гуманитар кумаграл акция

ЦIуссалакрал райондалул школардугу гьуртту хьунни «ВседляZащитников» тIисса, аьралитуран гуманитар кумаг батIлатIисса акциялуву.
Ванил мурад бия хасъсса аьралий операциялий талатисса жула жагьилтуран кумаг баву бакъассагу, дуклаки оьрчIаву ва жагьилтураву ватандалухсса ччаву тарбия давугу. Акциялул сакиншинначитал хьунни «Альтаир» тIисса оьрчIавусса гьунарду ялун личин байсса ва мукунсса оьрчIан кабакьу бай­сса региондалул центр ва «Юнармия» тIисса Щалагу Аьрасатнал жяматийсса суккушиндарал региондалул отделение. Райондалий хьусса акциялуву гьуртту хьунни КIулшивуртту дулаврил управлениялул зузалт, дуклаки оьрчIал нину-ппу, «Цалчинминнал суккушиннарал» активистътал.
Акциялул лагрулий батIлай бия аьралитурансса гуманитар кумаг: зия къашайсса дукия, гъилисса янна, окопный чирахъру. Дуклаки оьрчIал мукунма чивчунни аьралитурачIансса ча­гъардугу.

Къатри ласунсса сертификат дуллунни

ЦIуссалакрал райондалул Соцзащиталул управлениялий ЦIуссамехелтIиял шяравасса мушакъатсса оьрчI бусса ниттихьхьун дуллунни къатри ласунсса субсидиялул сертификат. Шикку гьуртту хьунни райондалул бакIчинал кумагчи Идрис Аьлиев, Соцзащиталул управлениялул хъунама Басир ХIажимурадов ва управлениялул зузалт.
Басир ХIажимурадовлул кIул бунни мероприятиялул гьурттучитал Дагъусттаннал захIматрал ва социал лябуккулул министрнал амрулущал ва кIицI лавгунни ЦIуссалакрал райондалий най душиву социал кумаг аьркин багьлагьисса категориялул инсантал къатта-къушлил дузал баврил давуртту. Федерал бюджетрава къатри ласунсса субсидиярттан итадаркьуну дур 1546306 къурушру.
Идрис Аьлиевлул райондалул хъуниминнал ва цала чулуха сертификатрал заллу хьусса нину барчагу дурну, буллунни мунихьхьун Дагъусттаннал ЗахIматрал ва социал лябуккулул министерствалул свидетельство. БувчIин бунни му ишла даврил низам. Хамидовалгу цила чулуха барчаллагь увкунни ЗахIматрал ва социал лябуккулул министерствалул ва райондалул каялувчитурахь, Социал защиталул управлениялул хъуниминнахь чIярусса шиннардийсса цила хиял бартлаган кабакьу баврихлу.
Андриана Аьбдуллаева