Колледжран – Виричувнал цIа
Дагъусттан Республикалул кIулшиву дулаврил ва элмулул министр ЯхIия Бучаев ивунни Каспийскалийсса С. Орджоникидзел цIанийсса Машиностроениялул ва сервисрал колледжравун. Ва аьрххилул мурадгу бия колледжран Совет Союзрал Виричув МахIаммад ХIажиевлул цIа дулаврицIун бавхIусса.
Ва дуккаврил идаралун Виричувнал цIа дулунсса пикри ххал бивгьуссар колледжрал аьмсса батIаврий.
– ХIакьину колледжрал хъунмасса лябуккулий щаллу дуллай бур машиностроениялул, сервисрал ва хьхьирил транспортрал кIулшиву дулаврил программартту. Виричувнал-подводникнал цIаниллив цачIун буллай бур тарих, пиша ва билаятрал бучIантIимур. Ва сипта бакIрайн дуккан дуван хьурчан, колледжрал ларсун бачинтIиссар дакI кьянкьашиврул, пишакаршиврул ва Ватандалийнсса тIайлашиврул лишанну хьусса инсаннал цIа, – тIий ур министр.
ЦIусса рейсру
Ва шинал гъинттул МахIачкъалалия Кироврайн самолетру лехлантIиссар.
«Nordwind AirIines» авиакомпаниялул «Икар» компаниялущал цачIуну зузи дуллай бур «Махачкала – Киров» маршрутрайсса рейсру. Вайннул лагрулий «Embraer 190» самолетру нюжмардий кIийлла леххавантIиссар. КIивагу шагьрулул дянивсса ссавнийн гьаз хьуминнал ххуллий гьан дувантIий бур сайки 3 ссят.
Рейс зунтIиссар июньдалия тийннай.
Аьралийтуран – яла ххуйми гьивчру
Зумаритаврил байрандалийн жулва аьралийтуран СВО-райн республикалия 200 тонна гьивчул тIайла дурккунни.
Ва зуруйсса хъунмасса чирилул даврил сиптачиталну хьунни МахIарамккантуллал райондалул «Сад» КФХ-рал багъманчитал. Вайннал жулва аьралийтуран гьан бунни яла нахIуми ва хъунмасса хIаллай зия къашайми сортирдал гьивчру. Ватандалиясса, аьзизсса аьрщараясса гьивчул, щак бакъа, аьралийтурал дакIру гъили данссар.
Къурув бувккунни
Жулла республикалул хъузалт бувккунни къурув, дайдирхьунни аьрщарацIун дархIусса интнил давуртту.
Гьашину вайннал 369 азарда гектарданий дугьантIиссар ятту-гъаттаран дичинсса, инсантурал дуки-хIачIиялуву ишла дувансса ахънилсса, багъ-бахча, къама ва цаймигу культурарду. Ва дукIунияр 13 азарда гектарданул ххишаласса хъанахъиссар.
Къурнил давурттавусса хъуннамур хъар дагьлай дур республикалул ряхра райондалийн: Къизлардал, Хасавюртуллал, Тарумовскаллал, Нугъайнал, Бабаюртуллал ва Лаващиял. Вай районнай республикалул дугьайсса аьрщарал аьмсса лагрулул дачIиннуяр ххишаласса дур.
Байрандалул гьантрай – украсса парковкарду
Республикалул хъуншагьрулийсса багьлухсса парковкарду байрандалул гьантрай укра дикIантIиссар.
Ва хавар баян бунни МахIачкъала шагьрулул Транспортрал управлениялул. Мартрал 19-20-нний укунманий машинартту арцух бацIан бувайсса кIанттурдай вайннул заллухъруннаща уква кьабитан хъанай бур цанма аьркинссаксса хIаллай.
АцIния цая художникнал выставка
Мартрал 16-нний МахIачкъалалив Расул ХIамзатовлул цIанийсса Национальный библиотекалий хьунни цайнува цивппа хьусса художниктурал-любительтурал цачIусса «Ттул Ватан – Дагъусттанни» тIисса выставка.
Ваний хьуминнаща бюхълай бия республикалул шагьрурдаясса ва районнаясса къапишакарсса 11 художникнал дирхьусса 60-нния лирчусса караматсса суратру ккаккан. Ва выставкалий суратру дирхьусса художниктуравух ур ГьунчIукьатIрал дянивмур даражалул школалул директор Малик Къушиевгу. Выставкалиягу, ванал суратирттаягу гьарта-гьарзану бусанну кказитрал хъиривмур номерданий.
Выставка хьунни Дагъусттан Республикалул Культуралул министерствалул ва Республикалул Халкьуннал творчествалул къатлул сакиншиндарайну, Республикалул «Самородки» тIисса арт-проектрал лагрулий. Выставка дикIантIиссар мартрал 25-ннин.
Театрал ишккаккултрал цIусса каялувчи
Ттигъанну хьусса Дагъусттаннал Театрал ишккаккултрал союзрал съездрай ва жяматийсса организациялул цIусса каялувчи увчIунни.
Мукун, тти Дагъусттаннал Театрал ишккаккултрал союзрал председательнал къуллугъ биттур буллалиссар ПаччахIлугърал республикалул оьруснал М. Горькийл цIанийсса театрданул директор Тимур МахIаммадов.
Ихтилатру хьунни ттинин чIярусса шиннардий ва къуллугъ лайкьну бачин бувну ивкIсса Айгумов Айгум Эльдаровичлухь барчаллагь тIутIисса ва цIусса каялувчинан тIайлабацIу чIа тIутIисса.
Дагъусттаннал музейрду – язиминнувух
«Музей 4.0» конкурсрай ххув хьуну, жулла республикалул кIива музей билаятрал регионнал хьхьичIунсса музейрдавух хьунни.
Ва хъанахъиссар Потаниннул Фондрал «Музей без границ» тIисса ихIсандалул программалул конкурс. Ванийн бувкIссар билаятрал 75 региондалул 332 идаралиясса 355 аьрза. Ххув хьуссар 19 идара, вайннува 2 Дагъусттаннаясса: МахIачкъалаллал тарихрал музей ва Каспийскаллал краеведениялул музей. МахIачкъалаллал тарихрал музей ххув хьуссар «Музей+театр» номинациялий «Место действия – Махачкала» проектрайну. Каспийскаллал краеведениялул музей ххув хьуссар «Культура участия» тIисса номинациялий «Даешь, Двигатель!» тIисса проектрайну.
Вай проектирдал лагрулийсса цалчинсса шадлугъру хьунтIиссар ва шинал майрай.
Бадрижамал Аьлиева
