Хъунмур редактор Хамис Шамиловал бувсуна журналданул дизайндалул хIакъиравусса дахханашивурттая, чIиви бувсса журнал канил бугьангу, буккингу, жущалва аьрххилий ласунгу къулайсса бушиврия. Дагъусттаннал Информациялул ва печатьрал агентствалул каялувчи Аьбдуразакь Жамалуттиновлул кIицI лавгуна, ниттил мазру ябуваврил ххуллийсса даврицIун, журналданул хъуннасса даву дуллалишиву республикалул культуралул ляличIишиву, кулпатирттал ирс-ххазинарду кьиматрай ябаврил цIанийгу.
Презентациялий гьуртту хьуна Дагъусттаннал Информациялул ва печатьрал агентствалул каялувчинал цалчинмур хъиривмур Наида МахIаммадова, Халкьуннал Мажлисрал депутат Елена Ельникова, «Историко-культурное наследие» ДРОО-лул каялувчи Парзият Бах1андова, «Дагестанский аул» музей-заповедникрал директор Зумруд Сулайманова, Дагъусттаннал Чичултрал союзрал председатель Марина АхIмадова-Колюбакина, Дагъусттаннал технический университетрал кафедралул хъунмур, чичу Нажават Абуева ва цаймигу бусравсса хъами. ДакIнийхтуну барча буллай буру щалва редакциялул коллективгу, лакралмур выпускрал редактор Аьжа АьбдурахIмановагу, чIа тIий буру журналданун цIу-цIусса хьхьичIуннайшивуртту ва тIайлабацIу.

ПатIимат Рамазанова