Капитальный ремонтрал программалул лагрулий МахIачкъалаливсса чIяву квартирарду бусса кIирайра къатрал лажин чул бакьин бан тIий бур. Му бакъассагу, И. Казака кIичIиравусса 122 «А» къатрал магъигу цIу дуккан дансса пикри бур.
ЦIанасса чIумал подрядчиктурал организациялул бригадарду, цIусса магъи дишинсса хIадуршиннагу дуллай, подъездирттавусса бухсса чIавахьулттивгу ликлай бур. Акаевлул цIанийсса кIичIиравусса 9-ми къатраву къуртал дунни чIиртту дякъия кIучI буллалисса давуртту. Программалул пландалийн бувну, «Строитель» ООО-лул (подрядчиктурал организация) шикку цIу дуккан дантIиссар токрал системагу.
– Къатрал лажин чул бакьин баву ва магъи даххана даву капремонтрал программалий яла агьамми давурттан ккаллину дур. Вай давурттайну къатрал чIалачIингу ххуй хъанай дур. ХIисав дара, циксса инсантуран асар хьунссар, цикссаннал итталун дагьанссар капремонтрайну хьусса чIалансса дахханашивуртту. Мунияту жу мудан бувчIин буллан бикIару агьалинан, капремонт миннан бигьа-рахIатшиву даву мурадрайсса душиву, – тIий ур Дагъусттаннал Капремонтрал фондрал хъунама МахIаммад Аьлиев.

Андриана Аьбдуллаева