Дагъусттаннай экономикалул ва социал сфералул цифралуцIун дархIусса давурттал даража 2024 шинал биян буван ккаккан бувну бур 70 процентрайн, ва тIайла бацIлай бур «Цифралул экономикалул» задачарттайн.
ХIакьину цифравизациялул бутIа хъанахъиссар республикалун агьаммурну. Ванил чIалачIи буллалиссар махъсса шиннардий лябукку хъанай бушиву. ХьхьичIуннайшиву хъиннура ххуйну чIалай дур национал проектирдал структуралуву лябуклакисса бутIраву.
2023-ку шинал Дагъусттаннай цифралуцIун дархIусса давурттал ккаккия (показатель цифровой зрелости) 62 процентраяр лахъ хьуну дур, шивун духлай дур паччахIлугърал управление, дуккаву, цIуллушиву дуруччаву, шагьрулул хозяйство ва строительство, жяматийсса транспорт.
2021-ку шиная шийннай Дагъусттаннал бартдигьлай бур Цифралул трансформациялул стратегия, гьар шинах гьаз дуллай мунил агьамшиву.
Методикалул рекомендациярттал лагрулий элмийсса ва бизнес сообществардугу хIала-гьуртту бувну, 2030-ку шинайннин сакин дурну дур 9 яла агьамми сектордансса цифралул трансформациярттан хасъсса предложенияртту.
Цифралул давурттал даража региондалий лахъ буллай буссар чIирисса шяраваллал ялапарлувтал ххуйсса связьрал дузал буллалавугу хIисаврайн ласлай. Пландалий бур 2030-ку шинайннин интернетрал дузал дуван Дагъусттаннал 500 мюрщи шяравалу, хаснура зунттал районнай.
Нацпроект «Цифралул экономика» бартдигьлагьиссар экономикалуву ва социал бутIраву цифралул технологияртту анаварсса бущилий зузи даву, лавайсса даражалул технологиярттал бизнесрансса шартIру дузал даву, глобал рынокрай билаятрал конкуренция духIаврил даража лахъ баву, национал мюхчаншиву цIакь даву ва инсантурал оьрмулул даража лахъ баву мурадрай.
Нацпроектру бартдигьлагьиссар АьФ-лул президент Владимир Путиннул хIукмулийн бувну 2019 шиная шийннай.
АьФ-лул паччахIлугърал управлениялул цифралул трансформациялул бутIуву кьамул дурссар 2030-ку шинайннинсса цIусса лябуккулул стратегия.
Агьаммур мурадрал ккаккияну хъанахъиссар социал мяъна дусса хIаллихшиннал электрон журалийсса бутIа 2030-ку шинайннин гьарза баву 95 процентрйн биянцIа.
Ванил агьамми масъаларттавасса цаппара хъанай бур «Госуслуги» щаллу даврил чIун чан даву, властьрал циняв даражардал органну электрон журалийсса документооборотрайн бучIаву ва ведомстварттал дянивсса хIала-гьурттушиву бигьа даву.
Масалдаран, «Госуслуги онлайн» проектрал мурадну хъанай бур 2024-ку шинал электрон журалул 60 хIаллихшиндалия 2030-ку шинал бучIан 100-ннийн.
«Типовое облачное решение системы электронного документооборота» проект бартдиргьуну махъ 2030-ку шинал циняв кIанттул цилакаялувшиврул ва мукунма паччахIлугърал ва муниципал идарартту бучIантIий бур электрон документооборотрайн ва ми гьуртту хъанантIий бур цасса цифралул майданнив.
ХIасан Аьдилов
