Ларгсса нюжмардий Аьрасатнал Виричу НурмахIаммад ХIажимахIаммадовлул нину Сапижат Мазаева Дагъусттаннал делегациялущал бивунни Липецкалийн. Ванил бувсунни цилва аьрххилул гьанумур мурад бивкIшиву Липецкалийсса «Защитники Отечества» фондрал вакилтуращал, СВО-лул Вирттаврал ниттихъащал хьунабакьинсса ва Усмань шагьрулий дуллалисса НурмахIаммадлул цIанийсса лачIун буккаврил щаллагу Аьрасатнал турнирданий гьуртту шаву.

Ва турнир хьуссар «Гуж уссурвалшиврувур» тIисса цIанилу. Липецкалий хьусса ккуркки столданий на бусав Дагъусттаннай СВО-лий талатиминнан ва миннал кулпатирттан цукунсса ка-кумаг буллай буссарив, цукунсса къулагъас дуссарив миннал къайгъурдах. Вирттаврал ниттихъащалсса хьунабакьавурттал ттуйн мудангу бюххансса асар биян бувай, ниттихъал дакIру хьунмур буслан багьай. ЯхI къабувнугу чара бакъахьувкун. Хьунабавкьура Курскаллал областьрал имам Ися Салимсултановлущалгу. Жу бивру тиккусса мизитравунгу, шагьрулул библиотекалийнгу, Дагъусттаннал Культуралул центрданийнгу. Барчаллагьрай бура Да­гъусттаннал агьали цачIун бувсса, Липецкаллал жяматийсса «Ттул Дагъусттан» ккурандалул хъунаманайн, ХIажиев ХIасбаллуйн, турнир лавайсса даражалий тIайла ду­ккансса хIарачатрахлу, ванала хъиривчунайн Мельгунов Евгенийнайнгу.

Щалва билаятраясса машгьурсса спортсментал бувкIун бия турнирданий гьуртту хьун, 23 региондалия 270 спортсмен. Ххув хьуминнан дипломру, кубокру, арцуйнусса бахшишру дуллай бия. Усманский райондалул хъунамагу ия. Гьар шинах дувавансса пикри бушиву буслай бия. Спортраву хьхьичIуннайшивуртту ккаккан даврицIун, СВО-лий цалчинсса Аьрасатнал Виричунал цIа ларсъсса хIаписарнал аьпалул хIурмат ккаккан бувансса давур тIисса махъру тикрал буллай бия. Ттула арснал аьпалун хас дурсса турнирданул чIявусса агьлу цачIун бувну бушиву асар къахьунсса иш бакъая. Мукунма барчаллагьрай бура, аэропортрай навагу хьунабавкьуну, ттухава хIурматрай бивкIсса Ватандалул инсантурайнгу».

ПатIимат Рамазанова