Вай гьантрай «Дагестан» РИА-лий хьунни «Движение Первых» тIисса организациялул грантирдал проектру бартдигьаврил хIакъиравусса пресс-конференция. Конкурсрал лагрулий оьрчIан кумагрансса ва лябуккулунсса социал проектирдал буххин бюхъайва сайки 15 миллион.
СКФО-лул Студентътурал футболданул лигалул «Лига первых» тIисса проектрал автор ва каялувчи Рамазан Гъазиевлул бувсуна цала мурадрая.
– Жул проектрал цачIун буллай бур СКФО-лул 7 регион, цачIун буллай бур оьрмулул 14-18 шиннавусса жагьилтал — вузирдал ва ссузирдал студентътал. Жу лавгру чIявусса колледжирттавун ва ккавккунни оьрчIру машхул хъанай бушиву футболданухун. Амма минначIа дакъар аьркинсса шартIру, мунийн бувну жул пикри хьунни ва турнир дуван. ЧIал къавхьуну, ноябрьданий, жу ва дайдишинну. Гьарца субъектрай хьунтIиссар региондалул ятIап ва батIул дувантIиссар 10-12 команда. Финалданул ятIап хьунтIиссар МахIачкъалалив ноябрьданул 10-12 нний, – увкуна Рамазан Гъазиевлул.
«Родина зовет» тIисса юнармейтурал кьюкьлул муниципал слетрал проектрая бувсуна Каспийск шагьрулул Расул ХIамзатовлул цIанийсса 13-мур лицейрал директорнал оьрчIру тарбия баврил советник Заира Мисрихановал. Ванил тIимунийну, ва грантрал конкурсрайну дуккаврил учреждениярттаща бюхълай бур цала проектру бартдигьаврицIун кабакьин.
– Жу кIилчин гьуртту хъанай буру конкурсрай. Ва дур школалий дуклаки оьрчIру патриотшиврул ххуллий тарбия баврил проект.
ОьрчIащал зузисса давугу духьувкун, ттулла даврил анализ дурну, ттун бувчIунни ттинин къадиркIшиву юнармейтурал кьюкьрансса проектругу, мероприятиярттугу. Ва куццуй хIасул хьуссар проектрал мяъна-мурад. Шанна кьинилул мутталий оьрчIру-юнармейтал кIул хьунтIиссар хъинну хIаз бизансса лекциярттащал, гьуртту хьунтIиссар личIи-личIисса мастер-классирттай ва конкурсирдай, – куна Заира Мисрихановал.
ДР-лул «Движение Первых» Региондалул отделениялул советрал председатель Людмила Саидовал бувсуна грантирдал конкурсрал гьурттучитуран ккаккан дурсса шартIирдал хIакъираву.
– Гьашину кIилчинни хъанахъисса Щалагу Аьрасатнал грантирдал конкурс «Движение Первых». Конкурсрал лагрулий дурххуну диркIссар 3 миллиардраяр ххишаласса арцу, мукунма 8 млн Дагъусттаннал чулуха жула ххув хьуминнан.
Конкурсрай гьуртту хьуншиврул дуллуну дия 15 азарда заявка. Жу хъинну ххарину буру жула проектру ххув хьуминнувух душаврия. Вай хъинну аьркинссар жула региондалунгу, билаятрангу, – куна Людмила Саидовал.
