Вай гьантрай кьурчIисса хавар бувкIунни Чараваллал шяравасса ХIасановхъал кулпатрал ялун, Кьурбанаьлил ва Кабиратлул арс Аьбдуллагьлул хасъсса аьралий операциялий виричушиврий жан дуллуну дур тIисса. Аьбдуллагь ия Ватан дуруччаврил ххуллий хIукму кьамул бувсса къучагъсса аьралитуравасса ца.

Увну ур Аьбдуллагь 1995 шинал январьданул 1-нний ЦIуссалакрал райондалийсса Чараваллал шяраву. 2013 шинал хьхьичIунсса хIасиллай къуртал бувну бур ЦIуссаккуллал дянивмур даражалул школа. Аьбдуллагь ивкIун ур дуккаврил ва спортрал чулухунай итххявхсса, школалул жяматийсса давурттавух чялишну гьур­тту шайсса, гьунар бусса жагьил. Школа къуртал бувну махъ, дуклан увххун ур Дагъусттаннал паччахIлугърал шяраваллил хозяйствалул академиялул автомобильлал факультетрайн.
2023 шинал сентябрь зуруй контрактгу чирчуну, лавгун ур хушрай аьралий бигарду бартбигьлан. Къуллугъ буллай ивкIун ур Запорожский областьрай. Нигь-ццах дакъа, яла захIматми бигарду бакIрайн ласлай, талай ивкIун ур. Щавурду-цIунцIияртту хьусса гьалмахтал ххассал буллалисса ппурттуву цимилгу цала оьрмулун нигьачIаву дусса иширттахьхьун агьайсса ивкIун ур. ­Мукун, ца чIумал оьсса бита-ххитавурттахьхьун иривсса ппурттуву, Аьбдуллагьлуйн кIусса щаву дирну дур. Амма, махъаллил къавхьуну, бартбигьлай ивкIун ур аьралий бурж. Та ппурттуву дирсса щаву хъин дуллай хьуну бур 7-8 барз. Хъин хьуну, ччаннай авцIуну махъ, Аьбдуллагь цIунилгу зана хьуну ур аьралий гьалмахтурачIан.
Ва ия гьалмахтурал цIаний жан дулун махъаллил акъасса, кьянкьасса хасият дусса, вихшала дишин лайкьсса жагьил. Мукунсса хасият дусса жагьил сий дуну ия аьралитурал дянивгу.
2024 шинал ноябрьданул 10-нний Константиновкалий ва Елизаветовкалий хьусса артиллериялул къизгъинсса битавурттаву кIусса щаву дирну, оьрмулуцIа хьуну ур ва. Аьбдуллагь ХIасановлул чувшиврун бюхттулсса кьимат бишлай, Аьрасатнал президент Владимир Путиннул хIукмулийн бувну, аьпалул хьуну махъ ванан Къучагъшиврул орден дуллунни.
Имара Саидова