КIулсса куццуй, ларгсса бигьалагай кьинирдая шийннай гъилахъаннин жулла республикагу гьуртту хъанахъиссар «Большие семейные выходные» проектравух. Ва проектрал лагрулий дакIний личIанну ва мюнпатранну кIилчинсса бигьалагай кьинирдур тIайла дуккайсса жулла республикалул хъун шагьрулий ялапар хъанахъисса оьрчIал, вайннал нитти-буттал ва республикалул хъамаллурал.
Аь. Тахо-Годил цIанийсса Дагъусттаннал Национальный музейравун ва ларгсса бигьалагай кьини бувкIсса цалчинсса хъамаллуран ккаккан дурна музейрал экспозициярду.
Хъирив музейрал зузалтрал, Буйнакскийл кIичIиравун ва Сулайман Стальскийл цIанийсса паркравун зюннав-дачIулущал ва бала-гьалайрдащал бувккун, ккаккан дурна зунттал хъаннил яннарду ва лачакру. Вай бивуна музейрачIату арх дакъа ва чIумал най диркIсса кофелул фестивальданийнгу.
Национал музейраву генеральный директорнал хъиривмур Жамиля Дагировал бувккуна халкьуннал прикладной искусствалийн багьайсса «Сургинские фантазии» цIанилусса лекция. Шиккура дия ва темалийн дагьайсса, дуруххавриву ва щащавриву ишла дувайсса кьай-кьуй ва чIярусса цаймигу затру дусса выставкагу. Жамиля Дагировал бусаврийн бувну, ва выставкалий дирхьусса затру дартIун дур хьхьичIра СсурхIиял тархъансса обществалувун духлай диркIсса, Ахъушиял райондалийсса 10 мащилий.
Музейраву ва кьини хьуна цIа дурксса фотограф Пазил Аьлиловлул суратирттал «Зунттал щарнил ххаллилсса сурат» цIанилусса фотовыставка, мукунна луттирдал выставкагу.
ОьрчIру хъунмасса гъирарай гьуртту хьуна аквагримрал, шахматирттай буккаврил, чария личIи-личIисса къалипру баврил ва цаймигу мастер-классирттавух.
* * *
Музейрал бигьалагай кьинилийнсса (21-мур июль) программа
17:00 – 18:00 ссятраву – Музейрал экспозициярттайхсса экскурсия
18:00 – 20:00 ссятраву – пейзаж дишаврил «Аrt House» цIанилусса творчествалул студиялул чулухасса мастер-класс
18:00 – 20:00 ссятраву – Элмийсса библиотекалул фондравасса ва музейрал луттирдал выставка
18:00 – 20:00 ссятраву – хъаннил яннардал ва лачакирттал «Зунттал щарнил ххаллилсса сурат» цIанилусса фотовыставка
18:00 – 20:00 ссятраву – ОьрчIал творчествалул стол
18:00 – 20:00 ссятраву – ОьрчIансса аквагрим
18:00 – 20:00 ссятраву – «Национал лаххиялул поэзия» тIисса лекция, викторина
18:00 – 20:00 ссятраву – «Мусил ххаллай щащаву» тIисса мастер-класс
19:00 – 19:30 ссятраву – лачакру дутаврил мастер-класс.
Бадрижамал Аьлиева
