Цалчинмур ЦIувкIуллал школалий цIусса дуккаврил шин хъун дуван батIай шяраваллил агьлу. Школалий дуклаки оьрчIру чанну бухьувкун, жулла ратI жура хъун дуван тIисса зумуну. Ва дуклаки оьрчIал ва учительтурал дакIру таза дуккан дуван. Байраннихха! Дуклаки оьрчIру чанну бушиврул тахсир я оьрчIай цайва, я учительтурай бакъахьувкун. Щил ци учирчагу, оьрчIру чансса классирттаву дарсру дихьлан захIматссар учительтурангу, оьрчIан цанмагу къабигьассар.

Ца классраву дуклай буссару учин ца оьрчI-душвагу чIарав бакъахьувкун. Ва зунттал мюрщисса шяраваллайн, аьщуйн щуну учиннив, личIи-личIисса багьантту сававну чIири лирчIсса чIявуминнуйн дурксса ялгъузсса кьини дур хIакьину. Мяйя дуклаки оьрчI ур ЦIувкIуллал школалий гьашину. Директор Фируза ХIусайновал кIицI лавгсса куццуй, хIарачат байсса бур учительтурал ва кьини дакIний личIансса байран кьини хIисаврай тIайла дуккан. Фирузал бувсунни ва кьини шагьрурдаягу бувкIшиву ЦIувкIуллал агьлу, райондалул администрациялул вакилталгу.

«Жу школалий Совет Союзрал кIийла Виричу АхIмад-Хан Султаннул цIанийсса музей буван хIадур хъанай буру, муниха зий буру, патриот асарду хьхьичIунну тарбия баврих къулагъас мудангу дуссар. Умамат ХIусайновал «Ххувшаврил память дакIурдивур» тIисса доклад бувна. Ххадижат Ссаламовал тIурча – культура, мазру ябаву агьамсса даву душиву аьч буллалисса доклад. Дуклаки оьрчIал дурккунни оьрус мазрайсса ва лакку мазрайсса назмурду. Шадлугъ къуртал дуварду концертрал программалийну.

Агьали ххалайн бувккун ка цIаравусса чIун духьурчагу, ва кьини школалул чIарав бацIан бувкIми чансса бакъая, оьрчIру ва нитти-буттахъул рязину ливчIунни. Цинявннайн барчаллагьрай бура. Школалий цумур-цагу байрандалийн хIадур хъанахъисса иширттавугу шяраваллил агьулданул хъуннасса гьурттушинна дувай», – увкунни Фирузал.
Буттал шяравусса школалий оьрчIал тяхъасса чIурду бушиврия ххари къахьунсса цу уссар?
ТIайлабацIусса дуккаврил шин хьуннав, оьрмулувугу гьармуниву тIайлабацIу баннав!

ПатIимат Рамазанова