Дуклаки оьрчIру бакъассагу, сентябрьданул 1-сса кьини дуккаврихун багьунни студентъталгу. Вайннавух Дагъусттаннал паччахIлугърал медициналул университетрал лечебный факультетрайн дуклан бувхсса, Ккуллал райондалийсса ЧIяйннал шяравасса МахIаммадлул душ, Милана Рамазановагу.

Лахьхьу-цархьхьу МахIачкъалаллал 13-мур гимназия марцIсса ххювардай къуртал бувсса, лавайсса баллай ЕГЭ-рду дуллусса, «За особые успехи в обучении» мусил медаль ларсъсса Миланал хъуннасса ххаришиврущал, чаннасса асардащал тIиртIунни университетрал нузру, ва вузрал бухкIуллийх лавхъун, цукссагу гъан хьунни хIакин хьунсса цилва ччянияцIавасса хиялданучIан.

– 1-мур сентябрьданий хьусса шадлугърайсса линейкалий бавцIусса чIумал ттун бувчIунни шичча байбихьлахьишиву медициналувунсса ттулва цалчинсса шаттирду. Инсантурал цIуллу-сагъшиву дуручлансса, оьрмурду ххассал буллансса за кIулсса лавайсса даражалул хIакин хьуншиврул ттун кIулли хъунмасса захIмат буван аьркиншиву. На кьамул дуллай бура нава язи бувгьусса пишарал цинярдагу захIматшивуртту ва хIадурну бура, шачIанттул хъирив шачIану битлай, ми духIан. КIулли ттулва хиялданучIансса ххуллу лахъисса бушивугу, ттуяра хъуннасса тIалавшинна душивугу, – тIий бур Милана.

Школалий дуклакисса шиннардий Миланан, циняв дарсирдал лавайсса кьиматру бивкIхьурчангу, яла-яла ххирану диркIссар химиялул, биологиялул ва чил билаятрал мазрал дарсру. Занай бивкIссар личIи-личIисса кружокирдайн, гьуртту хъанай бивкIссар школалул ва шагьрулул жяматийсса оьрмулувух. Ванил цуппа чIалачIи бувссар хьхьичIунсса сиптачи ва творчествалул инсан хIисаврайгу. Мукун Миланал наградарттал ххуржинттаву чIярур, хьхьичIунсса дуккаврихлусса дакъассагу, цайми-цайми хIурматрал грамотарттугу, свидетельстварттугу, дипломругу. Милана бивкIссар Дагъусттаннай ва ванил кьатIув цIа дурксса «Счастливое детство» къавтIаврил ансамбльданул солистканугу. Мукунма, оьрмулул 6 шин хьуния занан бивкIун, музыкалул школалий марцIсса ххювардай къуртал бувссар фортепианолул классгу. Укун гьарцагу чулуха гьунар бусса, итххявхсса душ бур ва.

Миланал буттал, хIакин Рамазанов МахIаммад Мусаевичлул, ниттил, педагог Рамазанова (Багатырова) Залинал, ниттил буттал МахIаммадрашидлул, амудадахъал Къараванил ва Баниятлул ва дуккин бавриву, ванин тарбия дулавриву бувсса хIарачат, бивхьусса захIмат бакIуйн бувккунни. Вайннал Миланаясса ххаришивугу, пахругу чIивисса бакъар. Вай цалва асарду кьюлтI буллайгу бакъар:
– Жу ххарину ва пахрулий буру жулва душнил, арснал душнил ва душнил душнил хьхьичIуннайшивурттая. Барчаллагь ванин жунма укун ххаллилсса асарду пишкаш баврихлу. Миланагу, ва кунмасса цайми жагьилталгу барча буллай цIусса дуккаврил шинащал, чIа тIий буру вайннан цIакьсса цIуллушиву, дуллалимуниву цимурцаннуву тIайлабацIу, ххари-хъиншивуртту, – тIий бур вай.

ВайннацIун бакьлай, жувагу чIа учинну жулва жагьилтуран цIу-цIусса хьхьичIуннайшивуртту, яла-яларив – дуклангу, зунгу, занангу – дунияллийсса паракьатшиву, нахIушиву.

Бадрижамал Аьлиева