ГьунчIукьатIув
Лакрал мюрщи щархъавух ГьунчIукьатIувгу хьунни цIусса дуккаврил шин дайдишаврин, КIулшивурттал кьинилун хас дурсса шадлугърайсса линейка.
Вания яла ххарими ва ванищал хIала цаймигу асарду бувхми бия школалул оьрмулувунсса цалчинсса ва сикъавсусса шаттирду ласласисса мюрщулт.
Шадлугъ дайдирхьунни Аьрасатнал Федерациялул ттугъ гьаз баврия ва гимн лахъаврия. Вания махъ ГьунчIукьатIрал дянивмур даражалул школалул директор Малик Къушиевлул цалла каялувшиву дуллалисса коллектив, дуклаки оьрчIру ва вайннал нину-ппу барча бунни дуккаврил цIусса шинал дайдихьулущал, чIа увкунни цинявннанмагу тIайлабацIу, нахIушиву. Байбихьулул классирттал учитель Сарижат Къушиеван ванал дуллунни райондалул администрациялул чулухасса грамота.
Хъирив махъ буллунни цалчинмур классравун наниминнахьхьун. Нитти-буттал чулуха вай барча буллалисса махъ лавхъунни ПатIима Хинчаловал. Махъ буллунни вайннал цалчинсса учительница Сарижат Къушиевахьхьунгу. Цалчинсса занг рирщунни школалул выпускниктурал ва цалчинмур классрал оьрчIал.
Гьашину ГьунчIукьатIрал школалий цалчинмур классравун лавгунни 3 оьрчI: Амира Хинчалова, ХIажи Рамазанов ва Умайзат Юсупова. Школалул гьашинусса выпускрал классравугу (11-мур класс) бур вайкссава оьрчIру: Муслим Айдиев, Султан Кьурбанов ва Заур Чавтараев.
Цалчинмур сентябрьданул шадлугъ хIадур дурну дия Сарижат Къушиевал, Тамара Ибрагьимовал, Асият Маммаевал ва Анисат Къушиевал.
КIундив
Дуккаврил цIусса шинал цалчинсса занг КIундиннал школалий рирщунни 20 оьрчIан. Вайннавух 1-мур классравун бувкIсса кIива оьрчIан ва 11-мур классравусса ца оьрчIан.
КIулшивурттал кьинилун хас дурсса линейкалий махъ лавхъунни школалул директор Абакар Гуйдалаевлул. Ларгсса дуккаврил шин хьхьичIунсса хIасиллайну тIайла дуркминнан ванал дуллунни грамотартту. Вайннавух марцIсса ххювардай классру щаллу бувсса 4 оьрчIангу: Ризван АтIалоьмариевлун ва Аьзиза МухIабуттаеван (1-мур класс), Мунда Уздановлун (4-мур класс), Аьлихан ХIусайновлун (5-мур класс).
Шадлугърал линейкалийн бавтIсса педагогтурал коллектив, дуклаки оьрчIру ва нину-ппу дуккаврил цIусса шинащал барча буллалисса, вайннан цIуллушиву ва тIайлабацIуртту чIа тIисса ихтилат бунни КIундиннал шяравусса Аьрасатнал халкьуннал аслийсса культуралул центрданул директор Даниял ХIажиевлулгу.
Шадлугърайсса линейкалия махъ хьунни «Агьаммуниясса ихтилатру» («Разговоры о важном») тIисса цIанилусса дарс. Ванил темагу дия «Инсаннан дуккаву ссан аьркинссар?!» тIисса. Ванил спикер, шяраваллил активист, СВО-лийсса талаталтран кумаг буллалисса волонтер Низами Умаровлул оьрчIащал бунни дуккаврил, цIу-цIусса кIулшивуртту ласласаврил, ца кIанай къабавцIуну, хьхьичIунмай бачаврил инсаннал оьрмулуву бугьлагьисса агьамсса кIанттун хас бувсса ихтилат.
ОьрчIру ватан ххирану, патриот зумуну тарбия баврил ххуллийсса даву хIисаврай шиккун оьвкуну бия школалул выпускник, хъунама лейтенант Ансар МахIмудовлуйнгу. Цалва ихтилатраву ванал кIицI лавгуна Ватан дуруччаврийн школалул парталухава хIадур хъанан аьркиншиву.
«Собери ребенка в школу» акциялул лагрулий райондалул администрациялул чулухасса, дуккавриву аьркин дуванмунищалсса портфеллу буллуна цалчинмур классравун бувкIминнан.
Бадрижамал Аьлиева
