Лакрал райондалий ЧIарттал шяраву цIунилгу бюхттулсса даражалий ларгунни «Щаращи» тIисса этнофестиваль. Ванил мурад бия ЧIарттал шяравалу цIу дуккан даву, жула аьдат-эбадатру ядаву, ялун нанисса ник буттал кIану ххирану тарбия даву.
Ва кьини утта дурккун дия ЧIарттал щар. Чялиш бувккун бия щарнил жямат. Тяхъану бия мюрщи оьрчIру. ЛяличIинува авурну чIалай бия буттукьирттава дуккан дурсса нукIузаманнул лачакирттавусса чIарттал душру.
Къурнил марщацI цIарай бивзун бия пулав шахьлахьисса хъуни къазанну. Лагма щархъал тIивтIуну бия цала-цала майданну.
Этнофестивальданий гьуртту хьун бувкIун бия Нижний Новгородраясса, Москавлиясса, Кировраясса бусравсса хъамал. Мастер-классру ккаккан буллай бия Бархъаллал, УнцIукIуллал ва Ахъушиял усттартал. Цала каруннил дурсса ххаржантру ва чIиллу ккаккиялун дирхьуну ия ДучIиннал шяравасса заргал Давуд-ХIажи.
Укунсса фестиваль кIилчинни ЧIарттал шяраву хъанахъисса. Ва аьдатравун дутансса пикри бур сакиншинначитуран.
Этнофестивальданул сиптачи ва сакиншинначи ур ЧIарттал шяраваллил патриот, художник, реставратор, коллекционер Калеб Шмидт. Ваная жунма уттинингу чIявуну бавссар.
Фестивальданул мурадрая бусласисса, гьуртту хьуминнахь ва чIарав бавцIуминнахь барчаллагь тIисса ихтилатру бунни цала Калеблул, ЧIарттал аксакал МахIаммад ХIасановлул, Лакрал райондалул администрациялул бакIчинал хъиривчу Абубакар Къюннуевлул, 1-мур ранграл капитан, профессор, «Дагестан» МЦК-лул вице-президент ХIусман-ХIажи Сулаймановичлул, «Солидарность и свобода» жяматийсса советрал чялишсса члентал Сарбижамал Саниевнал ва Написат Аьлисултановнал.
Абубакар Къюннуевлул райондалул администрациялул чулухасса Барчаллагьрал чагъарду буллунни фестивальданул спонсортуравасса Арсений МахIаммадовичлун. Барчаллагьрал чагъаргу, «Лакрал райондалул хIурматлувсса гражданин» тIисса бусравсса цIагу дуллунни Эльмира Ибрагьимован.
Жунма кIулссар ЧIарттал жяматрал ххуйсса кумаг буллай бушиву хасъсса аьралий операциялун. Цамуния къатIурчагума, «Солидарность и свобода» советрал цала щаршсса 1300 маскировочный къери гьан дурссар аьрайн.
Фестивальданул лагрулий Сарбижамаллул ва Написатлул буллунни Советрал чулухасса Барчаллагьрал чагъарду хасъсса аьралий операциялийминнан гуманитар кумаг буллалисса давриву чялишсса гьурттушинна дуллалисса ЧIарттал жяматрал вакилтуран.
Фестивальданул лагрулий ккаккан дунни лакрал халкьуннал аьдатру: хъамал кьамул баву,жалин дуцаву.
Хаснува авурсса хьунни жалин гъухъри майшан тIисса лахIзарду. Ми ккаккан бунни цаннияр ца исвагьисса ЧIарттал душваврал.
Фестиваль дачин дурну ия Дагъусттаннал культуралул лайкь хьусса зузала АьлихIажи Щамххалов. Дялахърулул мажлисрал хъар лавайсса даражалий лархъунни Дагъусттаннал культуралул лайкь хьусса зузала Халисат Батырбековал ва Жамиля АхIмадовал.
Калеблул дакIнихтунусса барчаллагь увкунни ва фестиваль дузрайн дуккан дан чIарав бавцIусса спонсортурахь: Ханты-Мансийский округрайсса стоматологиялул ва косметологиялул сетьрал( ЦИФРА-клиник ) директор Альбина ХIасановахь, Сургут шагьрулийсса Координационный советрал член, «Здоровое общество» НКО-лул президент, «САЛЬВЕ» тIисса стоматологиялул сетьрал директор Эльмира Ибрагьимовахь, ккарччал техникалул 3Д лабораториялул (ИМАКС) директор Расул Гъазиевичлухь, «ЭСТЕТ» тIисса стоматологиялул сетьрал директор Арсений МахIаммадовичлухь, Нижневартовск шагьрулийсса ЧIарттал диаспоралул председатель МахIаммад ХIусайновлухь.
ХIусман-ХIажи Аьлиев, 1-мур ранграл капитан, профессор:
Ттула оьрмулий на ивссара чIявусса билаятирттайн. Мукьра шин дурссар Авгъанисттаннаву, шин ва ххишалагу – Египетнаву.
Жула аьрщараяр ххуйсса кIану чувчIав бакъая. Ттун ккавкссар личIи-личIисса исвагьисса, бакIрал ххуйсса душру. Амма жула лакку-душвавраяр ххуйсса чувчIав бакъая. Нава чув ухьурчагу, ттул дакI шиккур дусса.
ДакI ххари хъанай дур шяраву жагьилсса кулпатирттал къатри дуллай, шяравалу цIу дуклай тIий. Хъиннува гьарза хьунссия шяравун бучIан ччими райондалийн газ буцирча, цаймигу шартIру дузал дарча. Мигу хьунссар тIисса умуд бур.
Абубакар Къюннуев, Лакрал райондалул бакIчинал хъиривчу:
КIинттул ЧIарттал шяравун увкIсса чIумал кIичIираву нажагьсса акъа инсан хьунакъаакьайва.
ХIакьину шиккун жямат бавтIун ккавккукун дакI ххари хьунни, ЧIарттал вайксса жямат бивкIун бурхха тIий. Цуксса ххаришиву дикIанссия вай циняв оьрчIру ЧIарттал школалий дуклай бивкIссания. Махъсса ппурттуву ЧIарттал шяраву ххаллилсса давуртту дуллай бур. Гьарица шинах гъинттул чIумал шикку лакку маз лахьхьаву мурадрайсса оьрчIансса дялахърулул центр тIитIайссар. Барчаллагь вай давурттаха зузисса, цала миллатгу, ватангу ххирасса Калеблун, Эльмира Ибрагьимован, Альбина ХIасанован. Ва хIакьинусса фестиваль барачат хьуну ЧIарттал жяматрал ялун чIярусса ххаришивуртту дияннав, шяраваллий аргъ дизаннав.
Калеб Шмидт:
Ва хIакьинусса фестиваль укунсса даражалий тIайла дуккан гьарицагу кулпатрал гьурттушинна дурссар, гьарнал цала-цала захIматрал бутIа бивхьуссар. Укун цинявппа лагма лавгун зурча, бюхъантIиссар жущава жула шяравалу цIу дуккан дан, аргъ дизан дан.
Андриана Аьбдуллаева
