Ялу-ялун машгьур хъанай дур жулла республикалий июльданул 8-нний кIицI лагайсса Кулпатрал, ччаврил ва дакI тIайлашиврул кьини. Ва ххуллухьгу ва кьини республикалул хъуншагьрулий ва муниципалитетирттай хьунни чIярусса шадлугъру.
МахIачкъалалив «Аьрасат – ттул тарихри» цIанилусса Тарихийсса паркраву хьуна Аьрасатнал «Знание» Обществалул Дагъусттаннайсса филиалданул хIадур дурсса шадлугъ. Шикку гьуртту хьуна «Знание» обществалул лектортал, ОьрчIал ихтиярду дуруччаврил Дагъусттаннайсса вакил Марина Ежова ва цаймигу. Кулпатрал, шивусса цIуллу-цIакьсса арардал агьамшивриясса бия ва кьинисса лекциярдугу, бувсса ихтилатругу. Ххал дуруна «Сказ о Петре и Февронии» тIисса мультфильмгу.
Вания тинмайгу, июльданул 20-ннийнин, ва обществалул спикертурал Аьрасатнал циняв субъектирдай ккалантIиссар кулпатрансса, ичIуваминнащалсса ва гъан-маччаминнащалсса арарду цIакь даврин хас бувсса лекциярду.
Шагьрулул агьалинахь ва кьини барча дуван Сулайман Стальскийл цIанийсса паркравун бувккун бия Центральный библиотекалул ва шагьрулул 10-мур, 16-мур библиотекарттал зузалт. Вайннал бачIлай бия ва кьинилул тарихрая бусласисса, кулпатраву нахIу-хIалимшиву чIа тIисса мукъурттищалсса буклетру. Шиккура хIадур дурну дия кулпатравусса арардайн багьайсса психологиялул луттирдал выставка. Луттирду цивппагу чIюлу бувну бия ва байрандалул агьаммур лишанну хъанахъисса кIяла тIутIайну (ромашка).
Шагьрулул ЦТКНР-лул филиаллаву ва муниципалитетирттал Культуралул къатраву ккаккан дурна концертру, хьуна ккуркки столлу, бувккуна лекцияртту.
Бадрижамал Аьлиева