Июнь зурул 17-23-нний Санкт-Петербурглив хьунни «Лучшая дошкольная образовательная организация – 2024» тIисса Щалагу Аьрасатнал Х-мур конкурсрал финал. Конкурсрал мурад бия школалийн гьаннинсса оьрчIан кIулшивуртту дулаврил программа щаллу дуллалисса идарарттал даража гьаз баву.

РяхцIаллий урчIва региондалиясса школалийн гьаннинсса кIулшивуртту дулаврил идарартту гьуртту хьуна фестивальданий. Дагъусттанная конкурсрал финалданий гьуртту хьуна «Золотой ключик» тIисса оьрчIал багърал каялувчи, жула лаккудуш Муслимат Султанова. Ва цуппагу чIявучин ххуйну кIулсса, чIярусса шиннардий Каспийскаллал администрациялул бакIчинал хъиривчуну зий ивкIсса ЦIущарниясса НухI АхIмадовлул душри.
Пленарное заседание тIитI­лай, ихтилат бувна Аьра­сат­нал Федерал Мажлисрал ПаччахIлугърал Думалул депутат, «Воспитатели России» тIисса Щалагу Аьрасатнал жяматийсса организациялул каялувчи Лариса Тутовал.
Хъирив оьрчIал багъирдал каялувчитурал цала-цала презентациярду дурна.
Фестивальданул лагрулий хьуна личIи-личIисса мероприятияртту. Вайннул хIасиллайн бувну, хьхьичIунсса оьрчIал багърал каялувчи хIисаврай Муслимат НухIовналгу лавсуна конкурсрал диплом ва мусил медаль, мукунна ванин дуллуна Щалагу Аьрасатнал конференциялул гьурттучинал сертификат, Щалагу Аьрасатнал даражалий педагогнал опыт ккаккан бан бюхъайшиврул свидетельство, пишалул даража гьаз баврил удостоверение. Зий хъунма хIал къавхьунугу, уттинингу вай гьуртту хьуну бур Аьрасатнал ва республикалул конкурсирттай, фестивальлай, лайкь бувну бур личIи-личIисса дипломру.
«Золотой ключик» бур ца яла хъунмамунин ккаллисса, авурсса, ттизаманнул циняв шартIру дузал дурсса оьрчIал багъ. Ва зий кIира шин хьуну дур. ХIакьинусса кьини шиккун занай бур сайки 300 оьрчI, зий бур 80-ннийн бивсса инсантал.
– Санкт-Петербургливн фестивальданийн бувкIсса каялувчитал чIявуми оьрчIру чансса бушиврий шикаятрай бия. Садикирттайн оьрчIру кьамул бан цичIав захIматшиву дакъассар, кIанттурду биялну буссар тIий бия. Заннайн щукру, жучIава ттигу чIявусса оьрчIру буллай бур, – тIий бур Муслимат.
Зузалтрая тIурча, цIана вайн­начIа биялну бакъар музыкалул пишакартал ва тарбиячитурал кумагчитал.
Муслиматлул бусласимунийн бувну, багъраву зузисса циняв педагогтал лавайсса даражалул пишакартал бур, цивппагу жагьилсса оьрмулувусса. Пишалул даража гьаз баврилминнуцIун, вайннал цинявннал бувккуну бур медициналул цалчинсса кумаг баврил курсругу. «Золотой ключик» багърал коллективрал цимилагу гьан бувну бур хасъсса аьралий операциялийн гуманитар кумаг. Аьралитурал барчаллагь тIисса видеообращениягу дуркIун дур вайнначIан.
Муслимат, оьрмулул жагьилсса бунугу, каялувчинал, сакиншинначинал гьунаргу, бюхъу-бажаргу бусса, итххявхсса душ бур. 1994-ку шинал Каспийскаллал 7-мур школа-гимназиягу къуртал бувну, ва бувххун бур Дагъусттаннал педуниверситетрал чил мазурдил факультетрайн. Шиккува педуниверситетраву бувккуну бур аспирантурагу. Ва бур педагогикалул элмурдал кандидат. АцIния арулла шин дурну дур Муслиматлул Дагъусттаннал педуниверситетраву зий. Ва бивкIун бур ингилис мазрал кафедралул доцентну. Яла, ласнал даврицIун бавхIуну Росприроднадзорданул хъунаманал къуллугърайсса, Султановхъал кулпатран цаппара шиннардий Дагъусттанная гьан багьну бур. Занахьуну махъ, Медуниверситетравун оьвкуну, шикку Дунияллул халкьуннал дянивсса отделданий зий бивкIун бур чил билаятирттал студентътурансса таржумачину, архIала Каспийскаллал 6-мур школалий завучшивугу дуллай. Цуппа зий бивкIсса кIанттурдай лайкь дурсса наградарттугу чансса дакъар Муслиматлул. Миннувух бур Дунияллул халкьуннал дянивсса элмийсса конференциярттай гьуртту хьуну лавсъсса дипломругу.
2022-ку шинал Каспийскаллал ва МахIачкъалаллал дянив­сса авлахърай цIусса оьрчIал багъ тIитIайхту, тиккунсса каялувчи ххал уллай, Муслиматлулгу цила резюме гьан дурну дур. Цинявннава ва язи бувгьуну бур. Цийнна дурсса вихшала ванилгу зия къадурну дур. Ххаллилсса коллективгу сакин бувну, нитти-буттащалгу маз лявкъуну, ччясса чIумул мутталий вайннал сад школалийн гьаннинсса кIулшивуртту дулайсса хьхьичIунсса идарарттал сияхIравун багьну бур. Муслимат бур цила давугу ххирасса, оьрчIахгу ччаву дусса пишакар.
ОьрчIан тарбия ва кIулши­вуртту дулаврил даврихсса ччаву Муслиматлун чIярусса шиннардий Каспийскаллал 4-мур школалий учительну зий бивкIсса цила ниттия Светлана Зиявуттиновная дирхьунссар. Дуккавриву итххявхсса бур Муслиматлул цилами оьрчIругу. Арс, лавайсса кьиматирттай школагу къуртал бувну, Аьрасатнал университетрал судрал иширттал факультетрай Москавлив дуклай ур. Хъунмур душ дуклай бур Да­гъусттаннал университетрачIасса юридий колледжраву. ЧIивимур – школалий. Ванилгу цалсса циняв ххюварду бур. Умуд бур, мукунма къуртал банссар школа тIисса.
Муслиматлун чIа тIий буру ттиния тихуннайгу ххуйсса ккаккияртту ва хьхьи­чIуннай­шивуртту.
Андриана Аьбдуллаева