Декабрьданул 17-нний «Дагестан» РИА-лул площадкалий хьунни ДР-лул энергетикалул ва тарифирттал министр Марат Шихаьлиевлул, «Россети Северный Кавказ» – «Дагэнерго» ПАО-лул филиалданул директорнал кIанайма Арсен ХIажиевлул ва филиалданул хъунама инженер Сяид Султановлул пресс-конференция. Муний миннал бувсунни декабрьданул 1-мур кварталданий цакуну гужсса марч сукку шаву ва марххала буллалаву сававну Дагъусттаннал электросетирдал комплексраву технологиялул низам зия хьуну диркIшиву. Вай ишру сававну чани левщун бия республикалул 4 шагьрулий ва 25 райондалий.
Сяид Султановлул бувсунни махъсса бигьалагай кьинирдай республикалий гьавалул тагьар зия шаврицIун энергетиктал цукун зий бивкIссарив.
– ЖучIан бувкIуна МЧС-лул информация гьавалул тагьар зия хьун най душаврил ва марч гуж хьун най бушаврил хIакъираву. Регламентрайн бувну, жун багьуна давуртту анаварсса низамрай дачин дуван: анаварсса низамрай аьркинну бия, цинярда техника ва зузалт хIадур бувну, лирсса технологиялул низам цила кьаралданийн дуцин, – увкунни Сяид Султановлул.
Ванал тIимунийну, декабрьданул 13-нний, маркIачIан ссят 10 хьусса чIумал, букIлан бивкIун бур технологиялул даву лиллай душаврил хIакъиравусса информация, миннувух – 110 ва 35 кВт-рал даражалийсса электропередачарттал ххаллаву ток бакъашиврул хIакъиравуссагу.
– Жул хIукму хьуна личIинурасса даврил низамрайн бучIан кIюрххил 6 ссятраву. Му чIумал зузи бувну буссия захIматсса тагьарданул чIумал даврихун бичайсса циняв бригадартту, – кунни ванал.
Султановлул тIимунийну, чани лещаврил ца яла хъунмур савав диркIун дур токрал ххаллу руцаву.
«Гьавалул тагьар захIматсса диркIнугу, жуща бювхъуна ахттакьуннил 7 ссятравун чани левщун бивкIсса циняв муштаринал къатри чаннал дузал дуван. Авариярттал зараллу бухлаган буллай бивкIссар 92 бригада – 276 инсан, зий диркIссар 92 техника», – бувсунни Султановлул.
Марат Шихаьлиевлул бусаврийну, энергетиктураща бювхъуну бур гьавалул тагьар зия шаврицIунсса циняв хъунисса аварияртту духлаган дуван чIаххувсса регионная кумаг тIалав къабувна.
Пресс-конференциялий ихтилат бунни мукунма Арсен ХIажиевлулгу. Ванал тIимунийну, аварияртту хьусса кIанттурдайн лавгун бивкIсса зузалтрал гьан буллай бивкIун бур цалла дурсса давурттая бусласисса фото ва видеоматериаллу, шагьрурдая дакъасса, зунттал районнаягу.
ХI. Аьдилов
