Мартрал 27-нний Къумукьнал театрдануву хьунни Дунияллул халкьуннал театрдал кьинилун хас дурсса шадлугъ.

Театрдал ишккаккултрахь пишакаршиврул байран барча дуллай, ДР-лул культуралул министр Зарема Буттаевал кIицI ларгунни Дагъусттаннал театрдал хьхьичIунсса ккаккияртту, республикалул магьирлугърал брендну хьусса яргсса премьерартту ва фестивальлу.
– Ва ляличIисса датар, цилгу дусса цинна хасъсса агьамшиву ва цинявппагу театрал пишардал агьали ца кулпатравун цачIун буллалисса. Ва хъунма махъ бакъар, мазру ва театрду чIявусса Да­гъусттаннай мукун бугу-буссар. Шикку цумур-цагу профессионал театрданул мархри халкьуннал театрданува наниссар, цила ляличIисса аьдат­ру магьирлугърал хасшивуртту душивруцIун буттал кIанттул ва дунияллул театрал школардал аьдатругу ларсъссар, –увкунни министрнал.
Ванил мукунма кIицI лавгунни жула ттизаманнул Театрал сообщество – му душиву театрал магьирлугърал усттартурая, никирая никирайн дахIаву цIакь дуллалисса династиярдая, творчествалул жагьилтурая сакин хьусса ккуран. Гьамин, вайннал бушиву хIакьину цала гьунардайну, кIулшивурттайну ва усттаршиврийну театр хьхьичIунмай буллай, театрал тамашачи тарбия уллай, хъун хъанахъисса никираву театрданухсса ччаву тарбия дуллай, республикалул халкьуннал мазру ва магьирлугъ ядуллай.
– КIицI къалавгун къабучIир хIакьину ДР-лул Магьирлугърал министерствалул хьхьичI бавцIусса мурадругу: идарарттал материал-техникалул база ххуй бансса, пишакарсса кадрардал дузал бансса, театрал зузалтрал захIматран кьимат бищунсса.
«Культура» миллатрал проектрал ва «Культура малой родины» тIисса «Единая Россия» партиялул проектрал лагрулий паччахIлугърал буллалисса ка-кумаграцIух шинал бакIрах машан ласайссар чIунин ва чаннан аьркинсса матахI, сахIналул янна, республикалийн бучIан буллай буссар билаятрал цайми регионнаясса ва кьатIаллил билаятирттаясса хьхьичIунсса режиссертал, Да­гъусттаннал театрдал репертуарду авадан хъанай дуссар ярг-яргсса, цIусса постановкарттайну. Цумур-цагу театрданун цийва асар хъанай буссар Федерал центрданул чулухасса кумаг, – ххи бунни Зарема Буттаевал.
Муния махъ министрнал паччахIлугърал ва ведомствалул наградартту дуллунни хьхьичIунсса зузалтран. ХIурматрал грамотартту ва Барчаллагьрал чагъарду буллуминнавух бур Лакрал театрданул жагьилсса ва гьунар бусса актрисахъул – Рукьижат МахIаммадова, Жамила Закарьяева ва костюмирттал цехрал зузала Hукьижат Къапланова.
Хъирив театрал магьирлугъ машгьур даврил, магьирлугърал дахIавуртту цIакь даврил ххуллийсса Дагъусттаннал театрал ишккаккултрал даврия бувсунни Аьрасатнал халкьуннал артист, Дагъусттаннал Театрал ишккаккултрал союзрал хъунама Айгум Айгумовлул.
– Аьрасатнал президент Владимир Путиннул билаят хьхьичIунмай баврил ххуллий къуллугъ буллалиминнал сияхIрай хьхьичI ххуттай даин кIицI лагай магьирлугъ ва театргу. Мунийн бувну, жуйра дуссар хъуннасса жаваблувшинна, жува буржлувссару хьхьичIуннай дуллан жула билаятрал маданият ва магьирлугъ, – увкунни ванал.
Хъирив хьунни аьдатравун багьсса «традиционный капустник». Шикку республикалул пишакарсса театрдал артистътурал ккаккан бунни хъярчийсса номерду.