Лакрал театрдануву ххаллилсса даражалий хьунни Дагъусттаннал лайкь хьусса артист, балайчи, музыкант, композитор ва аранжировщик Арслан Шагьмардановлул юбилейран хас дурсса концерт.

Ва кьини залдануву бия артистнал балайрду ччянива лакрал халкьуннал маданиятрал кодну хьушиврун ккалли буллалисса тамашачитал.

Шагьмардановлул балайрдаву мудан асар хъанай дур буттал улклухсса дазу дакъасса ччаву, миллатрал дянивгу ми мунияту бур машгьурну. Бугу дакIнин бюхханну, оьтту-ттурчIавун, аькьлу-кIулшилул куртIнивун биянну учай. Цанбакъарча буттал улклухсса ччаву ва къюву Арсланнун цаннагу чIивинияцIа асар хъанай диркIун дуну тIий ниттил ПатIиматлул балайрдаву. Гьамин, ниттил шеърирду хьуну бур Арсланнул музыкалул дунияллухсса ябитаврил гьануну.
ЧIивисса ПатIиматлун дакI­ния къаларгун дур гуж-къиялий буттал мина кьаритан бувсса кьини, ххуллийх дурхIуцири хIасрат. Ми асарду бусса оьр­мулий цищалагу лавсун, творчествалувугу аьч бан бювхъуну бур, бавманал дакIнива къабукканну.
Ванил шеърирдаву цачIун хьуну бур дакъа хьусса ватандалухсса мякь, буттахъал аьпалул хIурмат, кьянатсса бухьурчагу, яру батIин къашайсса зунттахсса ччаву. Мунияту ххира хьухьунссар миллатран ниттил мукъурттин цала макьан чирчуну тIутIисса Арсланнул балайрду.

Концерт дайдирхьуна экрандалий Арсланнул «Жан, ясай» тIисса халкьуннал макьандалухун ниттил мукъурттийсса ТтурчIиял шяраваллихасса балайлухун эяллай дарцIусса щар ккаккан дуллалисса видероликрая. Зума кунма баллай бия Арсланнул чIу, якьамасса макьандалухун, вичIидирхьуминнал яру мукьал нани банну, хханхха ххябуклаки банну. Балай къуртал хьунцIа янила къабувкьунни 1944 шинал лакрал миллатрал ялун дирсса яла оьмур кьини, эяллай дарцусса мукьцIаллий мукьра шяраваллил кьадар. ЦIунилва-цIунилгу кIура баен буллай бияв, гьамин, га кьини бявкьухьунссар лакрал миллатрал алши тIисса пикрирдайн – буттал аьрщаращал руцари хьусса дахIаву, хъамабитлати­сса ни­ттил маз.
Га хьхьуну Арсланнул увкунни ца ниттил ПатIиматлул бакъасса лакрал миллатрал цIанихсса шаэртурал язи-язими мукъурттийсса балайрду. Цалагу лях-лях кIицI лавгунни цала творчествалуву ххуллу бувгьусса гьарцагу шаэрнал, композиторнал, музыкантътнал цIарду. Цуя ца хъамакъаивтун, жуятува яла лавгмигу аьпалувух бивхьуну, жущалва буминнайнгу барчаллагьрай. Тамашачиталгу бахIлай бия балайчинацIун ччянива ххира хьусса балайрду.

Арслан Шагьмарданов барча унни Лакрал райондалул бакIчи Зураб Куччаевлул, ЦIусса­лакрал райондалул бакIчинал хъиривчу Амир Султановлул, Дагъусттаннал Жяматийсса палаталул хъунаманал хъиривчу Ссапарбаг Аьбдуллаевлул, Лакрал театрданул каялувчи Бадрижат МахIаммадхIажиевал ва хъунама режиссер, Аьрасатнал лайкь хьусса артист Аслан МахIаммадовлул. М. Илиясовал цIанийсса «Дараччи» фондрал каялувчи Гульшан Хасаевал, Дагъусттаннал Музыкантътурал союзрал хъунама Хан Башировлул, ТтурчIиял шяраваллил вакил Зайнуллагь Мирзоев.

Махъру лахълахъими кIицI лаглай бия Арслан Шагьмардановлул яргсса хасшиву ва нажагьсса гьунар, лайкь хьуну ушиву вичIидихьултрал хIурматран. ЯтIулсса ххуттай кIицI лаглай бия Арслан Шагьмарданов цала щала творчествалул ххуллий дакI тIайлану ливчIун ушиву халкьуннал магьирлугърайн, балайрдайн, макьаннайн.
Арсланнул цалагу кIицI лавгунни халкьуннал музыкалул ва балайрдал цала оьрмулуву агьамсса кIану бугьлай бушиву: «Ттул творчествалунсса яла хъунмур награда – зул яру чIалачIавур, жула миллатрал магьирлугърал ляълу-жавгьарну хьусса вай балайрду яхьунтIиссар зун дакIний буссаксса, зу вичIидихьлай буссаксса. Ттул ниттил кьариртунни ттуву яла агьаммур – щала миллатрал рувхIанийшиву, буттал аьрщарахсса ччаву. Жува чув бухьурчагу, дакIмур даин ТтурчIайри дусса. На тIурча, буттахъал аьпагу, ватандалухсса ччавугу дихьлай ура макьаннаву. Ниттил мазгу, буттахъал макьаннугу уттавану дуссаксса жувагу уттавассару.

Юбилейный вечерданул исват бунни Шагьмардановлул творчество дузал хъанай дакъашиву, анжагъ, балай учаврийну ва макьанну чичаврийну. Ва ур тарихрал аьпа цIусса никирацIун базлай. Учин бюхъанссар, ванал балайрдайхчил цал ххишалану ххира хъанай бур жунма жула буттал кIану куну.
Юбилейрал концертрай гьуртту хьунни републикалул цIанихсса музыкантътал, балайчитал.
Мажлис бачин бувну бия Дагъусттаннал лайкь хьусса артистка Саният Рамазанова. Артистнан буллунни Дагъусттаннал культуралул министерствалул ва Лакрал театрданул чулухасса ХIурматрал грамота ва Барчаллагьрал чагъар. Бусравсса балайчинахь авадансса творчествалухлу барчаллагь тIий, тамашачиталгу, цIу-цIусса балайрдайн умуд бихьлай, батIул хъанай бия.