Декабрьданул 6-нний МахIачкъалалив 1-мур Ц1увкIуллал жяматрал ва Мариян Илиясовал цIанийсса «Дараччи» фондрал сипталийну «Илчилул» журналист ПатIимат Рамазанован Дагъусттаннал халкьуннал шаэрнал цIа дулаву барча дуллалисса байран дунни.
ЦIукIан, цIукIул, Хъун ЦIувкIул ЧIявуминная хьусса,
Вил базурду чантI куну, ина тIутIайх бичиннав!
ПатIимат! Лакрал пахруй – жул шеърирдал щаращий,
Вил дакIнийсса хияллу, КIа Заннал бартбигьиннав!
Жула Шалласу
Декабрьданул 6-нний МахIачкъалалив 1-мур Ц1увкIуллал жяматрал ва Мариян Илиясовал цIанийсса «Дараччи» фондрал сипталийну «Илчилул» журналист ПатIимат Рамазанован Дагъусттаннал халкьуннал шаэрнал цIа дулаву барча дуллалисса байран дунни.
ПатIимат барча буван бувкIцириннавух бия Республикалул ХIукуматрал хъунаманал хъиривчу Нариман АьбдулмутIалибов, Дагъусттаннал Халкьуннал Мажлисрал депутат Артур Исрапилов, Лакрал райондалул бакIчи Юсуп МахIаммадов, Республикалул Жяматийсса палаталул хъунаманал хъиривчу Ссапарбаг Аьбдуллаев, генерал-майор Муслим Даххаев, Дагъусттаннал адвокатътурал палаталул вице-президент Бакри Бакриев, Минтрансрал отделданул хъунама Зиябуттин ХIажимирзаев, жяматийсса ишккаккулт Шалласу Шалласуев, Сайпуллагь Аьбдуразакьов, Расул Кьаландаров, Башир Сант1уев, техникалул элмурдал доктор, профессор, академик АьбдурахIман Халилов, философиялул элмурдал доктор Асият Буттаева, профессор, чичу Нажават Абуева, Мах1ачкъалаллал Советский райондалул хъунаманал хъиривмур Фируза Рамазанова, ДГТУ-рал декан Земфира Ражабова, «Дагестан» ГТРК-лул лакрал редакциялул хъунмур редактор Тамара Закарьяева, Республикалул Диагностический центрданул хъунмур х1акин Заира Къапланова ва цайми-цаймигу бусравсса хъамал.
«Дараччи» клубрал хъунмур Гульшан Хасаевал ва ванил хъиривмур Динара Маммаевал кIицI лавгуна ПатIимат, гьунар бусса журналистгу, шаэргу бушивруцIун, «Дараччилул» дуллалисса давурттавух мудангу чялишну, гьуртту шайсса бушиву, ванил чивчумуних мудангу агьалинал къулагъас дикIайшиву.
Халкьуннал чичу Мирза Давыдовлул ПатIимат лакрал литературалувун найбунува бувхшиву, ванил куртIсса, инсантурал дакIурдивун бюххансса асарду биян буллалисса назмурду душиву кIицI лавгуна.
Мажлисрал ахирданий сакиншинначитурахь барчаллагь тIий, ПатIиматлул кIицI лавгуна ва кьинисса байран так ца цихавасса хIурматри тIий бакъашиву, лакрал поэзиялул, журналистикалул кьимат бищаву хъанахъишиву ва, буккулт ва кьадру кIулми буссаксса, лакрал поэзиягу бикIантIишиву.
Шалласу Шалласуевлул, ПатIиматлул назмугу дакIних дурккуну, ванил творчествалуву хъунмур кIану буттал аьрщарахсса ччаврил, Ватандалул бучIантIимунил ялувсса буруккинттарал бувгьуну бушиврий чIурчIав дурна.
Мероприятие дачин дурсса Супиян Оьмаровлулгу кIицI лавгуна, цайми миллатирттал чичултрал дянивгу ПатIиматлул гьунарданун ва инсаншиврун мудангу лахъсса кьимат бищайшиву.
ЦIувкIуллал Жяматийсса советрал каялувчи, профессор МахIаммадбаг ХIусайхановлул кIицI лавгуна ПатIимат Рамазанова буттал аьрщарах ччаву дусса, шяраваллил цIа-кьини гьаз дуллалисса инсан бушиву, ванил творчество шяраваллил агьулданун ххирану душиву.
Дагъусттаннал халкьуннал шаэрнал цIа барча даврицIун, Артур Исрапиловлул кIицI лавгуна, хъунмасса тIайлабацIуну ккалли буллай ушиву ПатIимат лакку мазрай чичлай бушиву. Цанчирча, ниттил мазрай чичлачимигу, ккалаккимигу цалнияр цал чан хъанай най буну тIий миллатраву.
Юсуп МахIаммадовлул бувсуна ялун нанисса цIусса шинал Гъумук ПатIимат цуппагу гьурттуну ванил творчествалун хасъсса чIири-хъунсса байран дан ччай бушиву.
ДР-лул Печатьрал ва информациялул агентствалул каялувчинал хъиривмур Наида МахIаммадовал ПатIиматлун дуллуна Агентствалул чулухасса ХIурматрал грамота.
ХIакьсса лакку балайрдайну байран чIюлу дуруна Дагъусттаннал халкьуннал артистътурал Луиза Шахдиловал ва Рашид Багатаевлул, республикалул лайкь хьусса артистка Загьидат Муслимовал.
Мажлисрал ахирданий, сакиншинначитурахь барчаллагь тIий, ПатIиматлул кIицI лавгуна ва кьинисса байран так ца цихавасса хIурматри тIий бакъашиву, лакрал поэзиялул, журналистикалул кьимат бищаву хъанахъишиву ва, буккулт ва кьадру кIулми буссаксса, лакрал поэзиягу бикIантIишиву.
Залму АьбдурахIманова
