Дагъусттаннайн апатIру ливксса гьантрай, республикалул шагьрурдан ва районнан кумаг бунни Аьрасатнал Виричу НурмахIаммад ХIажимахIаммадовлул цIанийсса «Патриот» тIисса ихIсандалул фондрал.
Вай гьантрай «Патриот» фондрал ЦIуссалакрал райондалийн тIайла дурккунни дезинфекция дайсса «Сабисепт-М» растворданул 370 литра. Инсантурал къатта-къуш, кIулшиву дулаврил ва цаймигу идарартту щинавун бювкьсса кIанттурдай лахъай азарду ппив хьун къаритаву мурадрай, фондрал буллалисса кумаг хъуннасса агьамшиву дусса хъанахъиссар. Дезинфекция дайсса сурсатру хьхьичIра-хьхьичI дулунни ЦIуссалакрал райондалийсса школардан, садикирттан ва цIуллушиву дуруччаврил идарарттан.
Райондалул администрациялул тIалавшиндарайн бувну, байбивхьунни классру, группарду, жанахIру, столовыйртту, санузельлу марцI буккан буллай. Мукунма, идарарттал каялувчитурая тIалав бунни, санитария дуруччаврил ялув кьянкьану бацIан аьркиншиву ва иш багьсса чIумал аьркин дансса дезинфекция дайсса сурсатирттал луртан дишаву.
Вай иширттаву цахара дурсса аякьа бусрав хьусса ЦIуссалакрал райондалул каялувчитурал барчаллагь баян бунни «Патриот» фондрал учредитель Энгельс ХIажимахIаммадовлуйн.
– ЦIанасса ппурттуву ва агьалинан хъуннасса агьамшиву дусса кумаг хьунни. Лахъайсса азарду ппив хьун бюхъайсса, нигьачIаву дусса ппурттуву, «Патриот» фонд чIарав бавцIуну, агьали азардая мюхчан бунни, – увкунни МаматIи ХIамзатовлул.
Шиккува кIицI лаган, ЦIуссалакрал райондалул агьалинан бакъассагу, щалагу республикалун бусрав хьунни гуманитар акциярдавух чялишсса гьурттушинна дуллалисса фондрал давуртту.
