Октябрь зуруй щалагу билаятрай кIицI лагай Бугьараминнал кьини. Жула республикалул шагьрурдай ва районнайгу щалвагу октябрь зуруй бугьараминнал хIурмат-кьимат буллалисса тамансса мероприятиярду дунни.

Му кьинилуцIун бавхIусса мажлис хьунни ЧIяйннал шяраву Магьирлугърал къатраву. Шикку захIматрал ветерантуращал хьунабавкьунни Магьирлугърал къатлул хъунмур СалихIат Алхасова. Мажлисрай гьуртту хьунни МахIаммад Апанниев, ПатIимат СутIаева, МахIаммад Илдаров, Муслим АьвдурахIманов.
Ва кьинисса мажлисгу бачин бувна СалихIат Алхасовал, ванил бувсуна байрандалул тарихраягу.

– Июльданул 1-нний 1992 шинал Аьрасатнал Верховный Советрал Президиумрал кьамул бувссар хIукму Щалагу Аьрасатнаву октябрь барз бугьараминнал барзну баян бувансса. Му кьини баян бавринсса савав хьуссар хIукуматрал цинярдагу учреждениярттал ва жяматийсса идарарттал къулагъас дулланшиврул, миннан хъама къабитланшиврул бугьарасса инсантал ва миннал бувсса захIмат. Яла-яла, бугьара хьусса инсантурал чулухуннай ххишаласса къулагъас дулланшиврул жула жагьилтурал.
– ХIурмат бусса ветерантал! ЧIа тIий бура зун цIакьсса цIуллушиву. ОьрчIал ххари буллай битаннав, миннал дард къаккакканнав. Зул захIмат ялун нанисса никиран эбратну личIиннав, – увкунни СалихIат Алхасовал.
Жагьилминнахь насихIатру бусласисса ихтилатру бунни МахIаммад Илдаровлул ва Муслим АьвдурахIмановлул.

Имара Саидова