Октябрьданул 27-нний Москавлив, Аьрасатнал Президентнал Дагъусттаннал Постпредствалий хъуннасса уттарашинна дия, баллай бия лакку мазрайсса гъалгъарду, шадсса яхши-хаш. Ва кьини Москавлив ва лагма-ялттусса шагьрурдай яхъанахъисса лак батIлай бия лакку мазрайсса диктант чичин.
Гьашинумур мероприятие хас дурну дия халкьуннал шаэр, дагъусттаннал литературалул классик Сулайман Стальскийн 155 шин шаврин ва лакрал машгьурсса шаэр, прозаик, таржумачи, литературовед МахIаммад-Загьид Аминовлун 85 шин шаврин.

Диктант дайдишин хьхьичI Постпредствалул жанахIраву ялун букIлакIисса хъамал кьамул буллай бия миллатрал лаххиялувусса жагьилтал ва душру. БавтIцири тамашалий бия тай гьантрай, Дагъусттаннал культуралул ва мазурдил кьинилун хасну, «Дагъусттаннал зунттаву» тIисса цIанилу дурсса художниктурал суратирттал выставкалий. Куннан кув ккаккаврия ххари хъанахъисса агьалинал диктант чичлантIисса зал щапI куну бувцIуна. Диктантрал сиптачитурал ттурша инсаннаяр ххишаласса къаучIанссар тIисса пикри буссия, дукIу Расул ХIамзатовлун хас дурну чичлачисса диктантрайн КьатIаллил билаятирттал литературалул библиотекалул (ванийн кутIану «Иностранка» учай) залданувун ттуршуннияр ххишаласса агьлу къабавтIувкун. Ца-кIий тIий ккалай, кIиттуршунниха ливчусса инсантал бия залдануву. ЩябикIансса кIанттурду биял шайссияв, бу-буний бавцIунма бия. Цахъис чIал хьусса кьуя инсан залданувун уххан къаивтуна, Постпредствалул хъуниминнал тIалавшинна мукунсса дия. Амма чIал хьуми къабуххавриясса къумашиву щукрулийн кIура ларгуна га ссят, инсаннал ша ласунсса кIану бакъа зал буцIайхту.

Диктантрал программа дачин дурну бия «Дагестан» ГТРК-лул Лакрал редакциялул хъунмур редактор, Дагъусттаннал культуралул лайкь хьусса зузала Тамара Закарьяева. Ванил кутIану бувсуна гьашинусса диктантрал сакиншинначитал ПостпредствалуцIун Москавуллал Культуралул центр ва Мариян Илиясовал цIанийсса «Дараччи» фонд бушиву ва диктантгу Сулайман Стальскийн ва МахIаммад-Загьид Аминовлун хас дурну душиву.

БавтIцири барча буллалисса махъру лавхъуна «Дагъусттан» МЦК-лул президент, техникалул элмурдал доктор, профессор, академик, ракетардал ва космосрал техникалул билаятрал ца яла хьхьичIунма пишакар, аьлимчу, Аьрасатнал элмурдал лайкь хьу­сса ишккакку Арсен ХIусайновлул ва Постпредствалул отделданул хъунаманал хъиривмур, Синергия университетрал психологиялул кафедралул профессор, психологиялул элмурдал доктор Зоя Хановал.

Аьдатрайн бувну, мероприятиялул хъиндайдихьу дурна лакрал гимн «Буттал кIану» учаврийну. Хъирив Тамара Закарьяевал махъ буллуна диктант дуккин, «Дагъусттан» МЦК-лул президиумрал член, Постпредствалул Жяматийсса советрал член Басират Билаловахьхьун. Ва агьали хIадур хьуншиврул диктант ккалай бунува, активистътурал дарчIуна бланкру, кIиягу шаэрнал суратругу дусса, «Лакку мазрал диктант – 2024» тIисса чичругу дусса эмаратсса ручкарду ва МахIаммад-Загьидлул суратгу, лакку мазран хас дурсса назмугу дусса исвагьисса блокнотругу.

Цамургу ххуйсса даву: ва мероприятиялун хасну цIуницIа дунияллийн буккан бувну бия МахIаммад-Загьидлул «Аькьилнал дагьани» тIисса оьрчIансса ва чIаважагьилтурансса хавардал лу. Ва 1981-ку шинал Дагучпедгизрал итабавкьусса лур. Шаэрнал душнил, филологиялул элмурдал кандидат, Дагъусттаннал университетрал дагъусттаннал филологиялул преподаватель Ххазина Аминовал бавтIсса цIусса хавардугу ххи бувну бия, ва лугу диктантрайн бувкIцириннан ххуйва-ххуйсса ссайгъат хьуна. Диктантрал текстгу хъиннува ххуйну мероприятиялуцIун бавкьусса, МахIаммад-Загьидлул «Ниттил маз» тIисса текст бия. Ниттил маз сан къабуллалисса, мунивусса мукъурттих куртIну къулагъас къадуллалисса инсаннан урттул щурщугу, бургъил паргу, щинал жюржугу хIисав къашайссар тIисса мяъна-мурадрайсса. Дунияллий мазру чIявунугу, цавагу мазраяр лакку маз къуркъасса ягу мискинсса бакъашиврия бюхханну бусласисса. Укунсса мукъурттийну къуртал хъанахъисса: «Лахьхьияра жулва ниттил маз! Жула буттахъал аьрипсса калимартту. Миннул жуятува бантIиссар ххуйсса инсантал!».

Хъунмава-хъунмасса ккуркки столданух кIану къавхьуми, никирттай чIапIив дирхьуну чичлай бия билаятрал хъуншагьрулий лакку диктант. Чичлачиминнаву чIявусса бия жагьилтал. Диктант чичлай бакъахьурчагу, чIявусса мюрщисса оьрчIругу бия кьини ярг дан бувкIсса.

Диктант чирчусса чIапIив датIайхту, МахIаммад-Загьид Аминовлул творчествалия, дагъусттаннал литературалул хIакьинусса кьинилия куртIсса доклад бувна шаэр, аьлимчу, таржумачи, Ккавкказуллал Чичултрал клубрал ва Аьрасатнал Чичултрал союзрал Дагъусттанналмур отделениялул хъунмур Миясат Муслимовал. Ванил ихтилат ялавай щаллуну булунну. МахIаммад-Загьидлуя шаэрная хIисаврайгу, цала учительная хIисаврайгу бувсуна «Илчилул» журналист ПатIимат Рамазановал. Шаэрнал назмурду дурккуна студентътурал ва дуклаки оьрчIал, яла мюрщиминналгу. Вайннал суратирттащалсса оьрчIансса «ЧIимучIали» чIал къабанну. «Мукьал бувцIу я хханссар» тIисса назму дурккуна ДГТУ-рал ФИСвЭиУ-лул кIилчинмур курсирал студент Артур Рамазановлул. Москавуллал областьрайсса Люберецкий райондалул Октябрьская школалул 7-мур классрал дуклаки душ АхIмадова СултIанатлулгу дурккуна шаэрнал оьрчIансса назму. Программа, мяйжаннугу, ярг дурна чIавасса назмурду ду­ккултрал. Бархъаллал шяраваллихасса назму дуркуна Исмяил ва Идая АхIмадовхъал, ХIусайнова Аминал дурккуна «ЧIев-чIев тIий дур кIюрх», Рамазанова Софиял – «Ча бувкру, читIрий!», Ибрагьимов ХIамзал – «Дакьаврихасса балай». МахIаммад-Загьид Аминовлул мукъурттий «Ниттихасса балай» увкуна Дагъусттаннал лайкь хьусса артистка ва Культуралул лайкь хьусса зузала Загьидат Муслимовал. Шиккува кIицI лаганна, Загьидат дукIусса диктантрайгу гьуртту хьушиву, кIу къабивзуну, гьашинугу шяравучунал кьини ххуйва-ххуйсса балайрдайну хъун дан бувкIшиву. Халкьуннал артист Шамсуттин Къаплановлул увкуна «Хъусращи» тIисса балай. Шиккува бусанна, Шамсуттин Къаплановлул ва халкьуннал артистка Саният Рамазановал магьирну ккаккан бувшиву Лакрал театрданул «Вассалам, вакалам» спектакльданувасса парча. Ва МахIаммад-Загьидлул хъярчийсса хавар гьануну лавсун хIадур бувсса музыкалул къямадияри. Цуппа хаваргу цила чIумал лайкь хьуссар «Золотой теленок» тIисса сийлийсса литературалул премиялун. Ва хаваргу, ваницIун авторнал цаймигу хъярчийсса хавардугу таржума бувну бивкIссар болгариянал, польшанал, немецнал, франциянал ва цаймигу кьатIаллил билаятирттал мазурдийн, совет билаятрал хъярчийсса литературалул антологиялувунгу багьссар.

БавтIцири барча буллалисса ихтилатру бувна Мариян Илиясовал цIанийсса «Дараччи» фондрал хъунмур Гульшан Хасаевал, вава фондрал Москавливмур филиалданул хъунмур, «Дагъусттан» МЦК-лул президиумрал член Мариян Кьаландаровал, шаэр, прозаик, публицист, ДГТУ-лул кьатIаллил билаятирттал мазурдил кафедралул хъунмур Нажават Абуевал. Ванил дурккуна цилла лакран хас дурсса оьрус мазрайсса назмугу. Гульшан Хасаевал дуллуна, кIицI лавгсса фондрал чулухасса Мариян Илиясовал цIанийсса арцуйнусса премия Москавливсса вузирдаву хьхьичIунну дуклакисса студентътуран: ХIабибуллаев Рамазаннун (Н.И. Пироговлул цIанийсса Аьра­сатнал медициналул университетрал (РНИМУ) 6-мур курс), Багъирова Рукьижатлун (Дунияллул халкьуннал дянивсса арардалсса буллалисса Москавуллал паччахIлугърал институтрал (МГИМО) 2-мур курс, ва Аьрасатнал кьатIаллил иширттал министерствалул университетри) ва Къаллаев Саэдлун, Аьрасатнал паччахIлугърал университетрал юридический факультетрал 4-мур курс). Юристътал хIадур байсса паччахIлугърал вузру Москавлив цаймигу бухьувкун, аьщуйн щун буванна, Саэд дуклакимунин «университет правосудия» учайшиву ва ванал щаллагу Дунияллул халкьуннал лагрулийсса элмийсса конференциялий 2-мур кIану бувгьушиву, паччахIлугърал финансирдал системалул цифровизациялул тема ххал дигьлагьисса элмийсса ярмаркалий.

ЧIярусса шиннардий Москавлив лак цачIун буллалисса ххуй-ххуйсса давуртту дуллалаврихлу «Дараччи» фондрал чулуха ххуйсса ххаржан пишкаш дунни Арсен ХIусайновлунгу. МахIаммад- Загьидлул мукъурттийсса «Лаккуй» тIисса балай увкуна Филатовлул цIанийсса 15-мур шагьрулул азарханалул хIакин-невролог Кьурбанова Зареттал. Лях-карах лакрал «Къиссу» ва цайми къавтIавурттугу ккаккан дурна Дагъусттаннал культуралул лайкь хьусса зузала Хайбулаева ПатIимат каялувшиву дуллалисса «Рассвет» ансамбльданул. «Лезгинка Денс» тIисса цамур къавтIалтрал ансамбльданул (ванил каялувчигу Дагъусттаннал культуралул лайкь хьусса зузала МухIаммаднур Султанов ур), Лаура Билаловал ва Шамил МахIаммадовлул ккаккан дурна чутсса къавтIаву. Лаура Билаловагу шаэрнал шяравудуш бур, цалчинмур медициналул институтрал хъаттиралусса, В.Д.Поленовлул цIанийсса 1231-мур школалий дуклакисса.

Ниттил маз ва культура гьаз дуллалисса мероприятирттал агьамшиврий чIурчIав дуллали­сса ихтилат бувна, гьунар бусса жагьилсса художница Асият Шяпиевал. Сулайман Стальскийл оьрмулул ххуллия ва творчествалия бувсуна филологиялул элмурдал кандидат, ДГУ-лул дагъусттанннал литературалул кафедралул преподаватель Аминова Ххазинал. Сулайман Стальскийл «ОьрчIрув» тIисса назму дурккуна Москавуллал 2001-мур школалул дуклаки душ Билалова Дианал. Лакрал байран цайминнал балайрду бакъасса дикIайхрав, Аьрасатнал хъуншагьрулий? Даргиял мазрайсса балай увкуна МГУ-рал тарихрал факультетрал аспирант Аьлиева Наидал, яруссаннал балай увкуна Кьурбанова Зареттал. ЧIяруя байрандалий бахшишругу. «Дагъусттан» МЦК -лул чулухасса «За верность Дагестану» тIисса медальлу дуллуна Арсен ХIусайновлул Гульшан Хасаеван, Тамара Закарьяеван, Загьидат Муслимован. Барчаллагьрал чагъарду буллуна Миясат Муслимован, Ххазина Аминован, Саният Рамазанован, Шамсуттин Къаплановлун ва ттун, «Илчилул» журналистнан.

«Дагъусттан» МЦК-лул вице-президент, медициналул элмурдал доктор, профессор Щайх­аьлиев Астемирдул кIицI лавгуна, лакку мукъул ва лакрал культуралул хIакьсса байран хьушиву ва кьини Постпредствалий, мазгу, культурагу ядаву гьарцанная хъарну душиву. Мероприятиялийсса цалва асардая бувсуна гьар шинах диктант марцIну ххювардай чичайсса Анфиса Билаловал ва МахIаммад Мурсаловлул. Ванал, МахIаммад-Загьид Аминовлул творчествалун бюхттулсса кьимат бишлай, кIицI лавгунни, Аминовлул шеърирдаву цанма хIисав хьушиву, цуксса кутIасса хха бурив, муксса куртIсса мяъна душиву. Ахирданий, МахIаммад-Загьидлул ссил, Рамазанова Кьурбан-ПатIиматлул, хъунмасса барчаллагь увкунни мероприятиялул сиптачитурахь, сакиншинначитурахь, ва лавайсса даражалий тIайла дуккан хIарачат бувцириннахь, кIу къабивзуну МахIачкъалалиягу, Москавлиягу, Москавуллал лагма-ялттусса шагьрурдаягу бувкIцириннахь. БавтIцири хъамалу бунни лакку дукрардал урцIухун бавтIун, концертрал программагу дяличIан къариртуну. Ххуйра-ххуйсса дукьрахIан дурну дия, диктантрал давриву чялишну гьуртту хьусса, гьармуниву паргалсса, Москавлив жагьилтуран лакку маз лахьхьин буллалисса, шеърирду чичаврил гьунаргу бусса Ххадижат ЦIаххаевал. «Баттерфляй» фабрикалул нацIу-кьацIулул кьуцуртту биян бувна ЦIувкIуллал вакилтуралгу. Аьрайн гьавккури, кьаркь дикI хIаласса буркив, бакъухъ – гьарзат, ччя-ччяни ичIура къадайсса дукрарду дия. Цал уттигу чIурчIав дуванна, диктантрайн бувкIшиврий хъуншагьрулий­сса лак бакъагу, чIаххуврайсса шагьрурдаямигу. Тула шагьрулий яхъанахъисса хIакин Зарема Аьлиева, масалдаран, дукIугу бия. Гьашинугу бувкIун бия, лакку мазгу, буттал кIанугу ххирасса инсан бухьувкун. БувкIун бия арснащал, Тула шагьрулийсса паччахIлугърал университетрал юридический факультетрал студент Аьлиев Азнаурдущал. «Вайксса жагьилтал ва оьрчIру къабатIинсса ххива, ттул душнил арс Ибрагьимов ХIамзагу уссия лакку мазрай назму ккалай, жула ялун нанисса наслулувун ниттил мазрахсса ччаву рутаву мурадрай дуллалисса даврил барачат бакъа къабикIайссар, ялу-ялун сий гьаз хъанай дур Москавливсса лакку диктантрал, гьуртту хъанахъиминнал аьдадгу хъун хъанай дур, ялунчIингу вава гъиралий, ччавулий цачIун батIинсса цIуллушиву дулуннав», – тIий бур Зарема Икрамовна. «Бакъассар ттун бивкIу ва дунияллий, Лакрал яхI ва намус сагъну буссаксса!», – увкуну бур МахIаммад-Загьид Аминовлул танийва. ЧIявусса агьлу батIавугу, лакрал яхI ва намус сагъну бушиврул лишанни, бюхттулсса шаэртурал хIурмат бушиврул лишанни. БавтIцириннал пикрирду буккултрал хьхьичIун ласуннин, диктантраясса ттулва информациялул кьисса къуртал буванна шаэрнал цайми мукъурттийну: «Нагу ва аьрщарай уттавассара, Ушиврул барчаллагь дакIний буссаксса!». Аьрасатнал хъуншагьрулий МахIаммад-Загьид Аминовлун хасну ва авторсса диктант чичавугу, ва буниялттунгу уттавану ушиврул барашиннар.

Басират Билалова:
– ДукIусса диктантрай сахIналийн балай учин бувксса ПатIима-Лакиял, жулвагу къалувсса шаэртал бунува, жулвами хьхьичIунну бакъар жунма, циванни МахIаммад-Загьидлун хас дурну къадувайсса укуннасса даву, учаву ттун кьувтIуна. Расул ХIамзатовлун хас дурну щалва билаятрай чIярусса мероприятияртту дуллай бия, ХIукуматрал программа, тIалавшинна дия, угу-урхха бюхттулсса даражалул шаэр. Амма жунма жулвами чичулт хьхьичIунну бикIан аьркинни. МахIаммад-Загьид ттул ниттиуссу ур. Ттул учитель ур. Диктантрайн хIадур хъанахъиминнаву хъар ларсмигу ттущал архIал дуклай бивкIсса, лакрал миллатрал агьамсса давурттай зузисса Тамара Закарьяева ва ПатIимат Рамазанова бур. Ттун, жула бюхттулсса учительнал хIурмат ккаккан бувансса хъит учирча, ялунчIин тIисса пикри багьуна. Утти, щукрулий бура ва даву дюхъан дурну бакIуйн дуккан дуван бюхъаврия. Ттулва чIарав бавцIуцириннайн дакIнийхтуну барчаллагьрай бура. Шайкун ва даврил чIарав бавцIунни Гульшан Хасаева, жулваминнал цIарду кIицI къалагланна. Гьарма, хIала увхма, увкIма – ва давриву бутIа бивхьумари. Шайкун ва даврил чIарав бавцIунни Гульшан Хасаева. МахIаммад-Загьид Аминовлул цIа личIаву мурадрай шаймур буллалимурди. ЩябикIансса кIанттурду бакъанугу, шанна-мукьра ссятрай бавцIуну бивкIунни агьали, цаягу инсан увккун къалавгунни, вагу МахIаммад-Загьидлул аьпалул хIурматри.

Миясат Муслимова:
– ХIакьину мероприятиялийн бувкIми, ниттил маз ябаву буржну чIалачIисса инсанталли. Хъунмур никирал агьлугу, дянивсса оьрмулувумигу, му бурж бувчIлачIимири. Агарда жува цIана бакIрай къабацIарча, чIал хьуну лякъингу бюхъайссару. Къабигьасса масъалари жулва хьхьичI бавцIуну бусса: лакрал халкьунначIан лакку маз зана бувансса! Мунияту жува батIаву, маз яшаву мурадрайсса агьамсса давур. Чичрулийнусса маз ябуван ччисса хъитри. Цумур-цагу миллатрал кьимат бусса гъалгъалийнусса маз ябуварчанни, куннащал кув ниттил мазрай гъалгъа тIий бухьурчанни. Амма хьхьичIра-хьхьичI халкьуннал цIа личIайсса тарихраву, агарда халкьуннал культуралуву ша кьабивтуну бухьурчанни. Культура тIурчарив, хьхьичIра-хьхьичI, чичрулул мазри, гьайкаллур. Жулва луттирдал гьайкаллур, ппухълуннал ирс-ххазиналул гьайкаллур. Фольклорданул луттирдур, гьай-гьай. Халкьуннал рувхIанийсса ххуйшиву ккаккан дуллалисса, халкь бюхттул буллалисса жулва шаэртурал ва чичултрал произведениярттур. Мунияту жува хIазран бакъару МахIаммад-Загьид Аминовлул поэззиялия гъалгъа тIутIисса. Жунма кIулли, гьашинусса шин, жулла литературалул тарихраву ца цIакьсса кIану бувгьусса так ца Сулайман Стальскийл юбилейрал шин дакъашиву. Щалла дунияллун ва шаэр аьч увсса, чIявусса мазру кIулсса, ххаллилну оьрус мазрайн дагъусттаннал шаэртурал произведенияртту таржума бувсса, Дагъусттаннал агьалинангу дагъусттанналми классиктурал цIарду кIул дурсса Апанни Къапиевлулгу юбилейрал шинни. Жулва биялалиймур, жущава бан шаймур лакку мазрал цIаний, лакрал литература ккалаккавур. Литературалуву яхьуну дунутIий жулва миллатрал яла язимур, лараймур, лайкьмур рувхIанийсса хъус-ххазина. Жува кувний, МахIаммад-Загьид магьирну оьрус мазрайн таржума увну акъар тIий, къумашиву кIидачIлан бикIару. Мяйжанссар, бур мукунсса буруккин. Амма жуна кIулли МахIаммад-Загьид Аминов лакку мазрай чичлай ивкIсса гений хIисаврай.

Цала баймур мунал бувссар лакку мазрай. Вари агьаммур. Цалва миллатран кьабивтссар мунал цалва бюхттулсса гьунар. Таржумачитал буккантIиссар, таржумарттал ялув буруккин буллансса аьркиншинна дакъассар. Думур, жучIанна дирмур бусраврай ядулланну, диял къахъанахъимунил къумашиву къадуллай. Жува ляличIисса заманнай яхъанай буру. Пашмансса заманнай. Техникалул итххявхсса, рувхIанийшиврул чулухарив – лап лащинсса. Жунна хъамаритала хъанай дур мяърипатрал идеалданул хIакьсса мяъна, дурчIала. Дуцин. Жунма аьлтта чIалай, кIичIирттан лайкь бакъа­сса, криминал иширттавух хIаласса инсантурал цIарду дизлай бур, лайкьми инсанталлив чулинмай буллай бур. Ци кьаританну жура оьрчIан? Цукунсса тIайламур, хIакьмур? Жува жулва жагьилтал бяйкьин буварду, къагьаз буванми гьаз буллай, къалпсса авторитетру хьхьичIунмай буллай, лайкьминнал, аьдлулий хIакьминнал кьадру къабуллай. ХIакьсса шаэрнал поэзия – ларайсса тIайлашивур. Хъуни хъанахъисса, зат лаласун, ссаву ци буссарив бувчIин хIарачат буллалисса жагьилтурал чул бищунсса тIайлашивур. Агар халкь тIайламуния арх бувцуну бухьурча, ми махIрум хъанахъиссар рувхIанийсса ххуйшиврия. Литературалувун увкIсса гьарцагу хъунасса шаэрнал, мяърипатрал даража лавайсса шачIанттуйн гьаз дуллалиссар. МахIаммад-Загьидлулгу гьаз дурссар. Бургияра, Дагъусттаннал агьалинан бакъагу, щаллагу дунияллун цукун аьч бувну бурив ххаллилсса таржумарттайну Оьмардул Батырай, МахIмуд, Ккурккуллал Щаза. Цукун ххаллилну таржума бувну бурив Ккурккуллал Щаза, интонация, ритм, бюхттулсса поэтессал дакIнивун увххуну, капливун бувтун, пасихIну, бюхханну! Таржумалул даврил ххуллу-ххуттай МахIаммад-Загьид Аминовлул гихуннай дачин дурссар Апанни Къапиевлул даву. Ванащал архIал хIасул бувссар таржумарттал школа, дагъусттаннал таржумарттал бюхттулсса культура. Цумур даврийн буккарчагу, ссавун куртI хъанарчагу, гьар кIанай МахIаммад-Загьид ур цIушинначи, реформатор. Шаэр, чичу, журналист, аьлимчу, жяматийсса ишккакку, ах­ттарчи, цумур хъу, марща ласурчагу, гьармуниву цила бювхъусса махъ кьабивтсса усттар. Назмурду чичаврил хIакъиравусса ванал захIматругу литература ахттар дувавриву биялсса бутIа бивхьусса хьхьичIуннайшивур. МахIаммад-Загьид Аминовлул цавунна ларсун дур щалла дуниялгу, дунияллул культурагу.

Гульшан Хасаева:
– ДакI ххари хъанай дия, лак цалва мархрачIан кIункIу тIий бушиву чIалай, цачIу-чIарав бушиву чIалай. Миллатрал лаххиялувусса мюрщи оьрчIал ярг дуллай дия байран. МахIачкъалалиягу хъунмасса делегация бувкIун бия гьуртту хьун. Диктантралссагу, хъамаллураха хIурмат баврил хъунмур хъаргу ларсун бия Басират ва Багьауттин Билаловхъул, Анфиса ва Камалуттин Билаловхъул, Басиратлул ва Анфисал ссурвавралгу, Генавал, Зираял, РахIиматлул, Тамарал бутIа бивхьуну бия лу итабакьингу, цайми давурттангу харх-хурж бивхьуну бия. Дуллалисса гьарцагу даву дакI дирхьуну дурну дия. Мудана куна, дуллалисса гьарцагу даврил ялув бакIцIуцIаву дуну зана-кьулу хъанай ия Арсен Буйдалаевич. Мариян Кьаландарова бакIчину, хьхьичIунну гьуртту хьунни Москавлийми «Дараччилул» душругу, Ватандалия бувкIмигу. КIу къабивзуну, лакрал кьини хъун дуван бувкIунни хIурмат лавайсса Жанна Абуева ва Миясат Муслимова, усттарну мероприятие дачин дурсса Тамара Закарьяева, ххаллилсса балайчи Загьидат Муслимова, Лакрал театрданул артистал. Укунсса ва вайннухара лархьхьусса, миллатрал цIаний дуллалисса давуртту цIу буну дувансса хIарачат буллалими, мудангу бусрав-барчаллагьран лайкьссар. Жулва хъунисса шаэртурал аьпа уттава буллалавугу, бучIантIимунил балаллиймири.

Шарип Сайдуев:
– Жу Зеленоградрая бувкIру Цалчинмур ЦIувкIуллал шяраваллил делегация, кьуя инсан. Хъуннасса ххаришиву дия, ца шагьрулий бунугу, куннан кув ччя-ччяни ккаклайгу бакъахьувкун, ккаккан, яхши-хаш бан. Амма ва ссят диктантгу чирчуну, программагу къуртал хьуну ппив хьун багьуна, щакъаливхнува ливчIунну. Уттиния тийнмай диктант чичлай байбишиннин, инсантуран хавар бусан ца ссят, дачIи ссят ккаккан дуварча, ххуйну хьунссия. ДукIура кунна, миллатирттал дукрардал урцIивгу мероприятие дайдишин хьхьичI дуккан дуварча. Махъгу зат бакъаяча, инсантал шанна-мукьра ссятрай лахъи лаглай бухьувкун, хьхьичI хъина. БукъавчIайсса махъру бакъая тIий бия диктант чивчуми, ва иширавагу чIалай бур лакку маз жагьилтуран кIулну бушиву, лахьлай бушиву, гъалатI бакъа чичин бюхъаврия ххари хъанай бушиву.

Ххазина Аминова:
– На дакIнийхтуну барчаллагьрай бура диктантрайн бувкIцириннайн. Буниялттунгу, лакраву патриот асарду гьузиххин буллалисса ва архIала дакIру цачIун дуллалисса байран хьунни. Лакку мазрал ва культуралул унгу-унгунусса байран. Хъунмасса барчаллагьрай бура, ва байран бюхттулсса даражалий тIайла дуккансса захIмат бивхьуцириннайн, Постпредствалийн, Дагъусттаннал Культуралул центрданийн, Мариян Илиясовал цIанийсса «Дараччи» фондрайн. ЛичIинува барчаллагьрай бура ва даврил сакиншиндарал хъунмур хъар цайнна ларсъсса МахIаммад-Загьид Аминовлул студенткахъайн, Басират Билаловайн, Тамара Закарьяевайн ва ПатIимат Рамазановайн. Бувсса, бивхьусса захIматрал ххаллилсса хIасиллугу чIалай дия. Барчаллагьрай бура иширайнусса, ка-кумаграйнусса гьурттушинна дурсса жулва агьулданийцириннайн, шайкун чIарав бавцIуцириннайн. Ва цал уттигу лак лагма лаган бувансса, лакрал дакIру гъилишиврул дуцIин дувансса даву хьунни, МахIаммад-Загьид Аминовлул яла хъунмур мурадгу, цанма дазу дакъа ххирасса миллатрал цашивуя, ванал цува дунияллий уссаксса дакIнива дуккан къариртссар буттал кIанттул кьадарданул къюву. Буттал улклухсса ччаврил вибувцIуссар ванал чIявуми шеърирдугу.

ПатIимат Рамазанова