Ноябрьданул 13-нний Дагъусттаннайн увкIунни Аьрасатнал президентнал кумагчи, Аьрасатнал Хьхьирил коллегиялул председатель Николай Патрушев. Ванал Дагъусттаннал бакIчи Сергей Меликовлущал ва Каспийск шагьрулул мэр Борис Гонцовлущал архIал тIутIив дирхьунни, 1996-ку шинал оьрмурдацIа бувсса Каспийскаллал дазурду ядуллалисса кьюкьлул аьралитурансса монументрачIа.

ДакIнин бутанну, Лениннул цIанийсса кIичIиравусса урчIра зивулийсса къатри пIякь учин дурну 67 инсан ивкIушиву. Тайннал аьпалун стеллагу дацIан дурну душиву, паркгу бувшиву. ТIутIив дирхьуну махъ, Патрушев ва Меликов хьунабавкьунни Аьрасатнал аьралий хьхьирил флотрал (ВМФ) главнокомандующий Александр Моисеевлущал. Шикку гьаз бунни Каспийлийсса Аьрасатнал дазурду цIакьну дуруччаврицIун бавхIусса масъалартту. Хъамал бивунни Каспийскалив ФСБ-лул Погрануправлениялул жамирдал базалийнгу, ххал диргьунни аьралий дежурство цукун най дуссарив. Николай Патрушевлул гьаз бунни хьхьирил флотрал даву сантирай ва лябуккулий хьхьичIуннай даврил ххуллийсса цаймигу агьамсса суаллу.