Ларгсса нюжмардий ДР-лул Культуралул министерствалул коллегия хьунни, ларгсса шинал дурсса давурттал хIасиллу дуллалисса ва дуванмунил хIисав-сан дуллалисса.
Коллегиялул давривух гьуртту хьунни ДР-лул ХIукуматрал председательнал хъиривчу Муслим Телякавов, ДР-лул культуралул министрнал буржру биттур буллалисса Зарема Буттаева, ДР-лул Архитектуралул ва градостроительствалул комитетрал председатель Назир ХIусайнов, ДР-лул туризмалул ва халкьуннал художествалул канил пишардал министрнал буржру биттур буллалисса Расул Ибрагьимов, цаймигу министерстварттал ва ведомстварттал вакилтал, культуралул органнал каялувчитал.
БатIаврий агьаммур доклад бувна Зарема Буттаевал. Ванил цилва ихтилатраву чIурчIав дурна пандемиялул чIумал культуралул зузалтрал дурсса давурттай. Гихунмай, гьарцаннуй цайва-цайва бацIлай, министрнал бувсуна региондалул ва федерал даражарттайсса проектирдая, миннул лагрулий щаллу дуван бювхъумуния. Дуванми давурттавух ванил кIицI лавгуна Дагъусттаннал филармониялул духми къатри гихуннайгу дакьин дуллантIишиву, Филармониялун цIусса къатри дувансса участок ккаккан даву, мукунма Табасараннал ва Азирбижаннал театрдансса къатри дуллалаву. Агьамми давурттавух ванил кIицI ларгуна ДАССР-данул ттуршра шинал юбилейран хасну уттинин дурми (республикалул муниципалитетирттай ва хъуншагьрулий, Федерациялул Советраву хьуми) ва вания тиннай дуванми.
Муслим Телякавовлул цалвамур ихтилатраву гьаз бунни культуралул идарарттал материал-техникалул базалул, зузи кадрарду хъунив хъанахъаврил, шяраваллал культуралул къатри даврил ва миннул модернизациялул ва цаймигу масъалартту.
Докладру ялагу бувна ДР-лул культуралул министрнал цалчинма хъиривчу Мухтар Кьурбановлул, культуралул министрнал хъиривчу Мурад ХIажиевлул, Оьруснал театрданул директор Тимур МахIаммадовлул ва цайминналгу.
БатIаврий республикалул культуралуву захIмат буллай, хьхьичIуннайшивуртту ккаккан дурминнан дуллунни ДР-лул Культуралул министерствалул чулухасса барчаллагьру ва хIурматрал грамотартту.
