Гьарцаннал оьрмулуву дакIний личIансса лахIзардугу, хъамакъабитайсса инсанталгу бикIай. Жунгу укунсса инсантуравасса цану хъанахъиссар дарсгу дирхьусса, тарбиягу дуллусса учитель АхIмадов Залимхан Иллал арс.

Дахьва университет къуртал бувсса Залимхан Иллаевич увкIуна ГьунчIукьатIрал школалийн дарсру дихьлан ва жул классрайгу каялувшиву дуван бакIрайн ларсун дия. Гъирарай дарсру дишайва, дурчIингу дувайва, тIалавшиннагу хъиннура хъунная.
Так дарсру дишаву дакъа, цува хьхьичIну, жу, дуклаки оьрчIру, гьарцагу иширттавух хIала буххан бувайвав. Цувагу, Хъусращиян хасну, гьарца чулухунай итххявхсса инсан ия, бищайва мандолина, ла­хьхьин дуруна жун личIи-личIисса къавтIавуртту. Концерт, хIадур дурну, ккаккан дувайссия клубраву, лагайссияв чIаххуврайсса шяраваллавун, Бархъаравгума лавгсса дакIний бур. Лавгссару экскурсиялий Мияйннал шяравун – Яруссаннайн, лавхъссару Къимизулийнгу.
Вай циняв иширттавух хьхьи­чIунсса гьурттушиву дувай­ссия жул учительнал кулпат Сиянатлулгу. Ва жун жулва чIунархIал душну чIалан бикIайва, жул классрал душваврангу Сиянат бия хъунмур ссу, дус, маслихIатчи.

Тамансса шинну чIарах дурккун, Залимхан Иллаевичлущал хьунабавкьусса чIумалгу, цалва кIицI бувуна: «Ттул оьрмулул ца яла агьаммур бутIа зул шяраву ­лавгссар» куну.
Жул хIурмат лавайсса учитель, мудангу вияту рязину ва пахрулий буссару!
Вил оьрмулул 75 шин барча дуллай, чIа учин ччай буру вин цIуллушиву ва чIярусса ххуй-хъиншивуртту.
Булуннав Аллагьнал щалихханнинсса оьрму винма ххираминнал ва инава ххираминнал дянив!
Малик Къушиев,
ш. ГьунчIукьатIи

БучIанну вичIан

Шиннардил бувунни
ссутнищал савда,
Утти жул чIантIайхгу
бавкьунни бурса.
ЧIунархIал оьрчIруну
бучIанну вичIан,
Вил дакIниймур ласун,
жулвамур бусан…

ЩябикIанну вил хьхьичI,
мюрщиний кунма,
Ххуллухъингу куну,
дачIи аьсрулухь,
ЩябикIанну вил хьхьичI,
мюрщиний кунма,
Бусанну дарсругу,
танийра кунна…
Учинну балайгу, вицIун бавхIуну.

ДакIнингу бутанну
жулва хъунма класс –
ЧIирай лухIи ула,
хьхьичIра-хьхьичIсса дарс:
Миччар байбивхьусса
оьрмулул ххуллу,
Миччар байбивхьусса
хияллал манзил…

КьурбанпатIимат Штанчаева,
ш.Баку