Кказит тIитIайхту, редакциялийн зунсса гъирарай бувкIминнавухсса ца бия ПатIимат Рамазановагу. Тани ва ДГУ-лул студент душ бия. Амма Казбек Мазаевлун, «ЧIавалачин» оьрчIансса журналданул редакторнан, ПатIимат танияцIакулва кIулну лявкъуна. Цанчирча журналданийн ванил макьалартту, назмурду дучIайсса диркIун тIий. Казбеклун хIаз бивзун бия школ душнил циява «нагу зучIан чичлачисса щюлли душ бура» учаву.

[dropcap]Б[/dropcap]юхъулул даража ххал бан ялув бивхьусса бурж ПатIиматлул хъинну дакI дакьинну биттур бувна. Цаппара хIаллава, университетраву дуклайгу бунува, жу кьамул бувссия ПатIимат штатравун. ПатIимат най бунува чIалай бия ялун личинсса гьунарданул заллу бушиву. ЧIивину бунува оьрмулухсса циллалусса буругаву дусса бушиву, асардал авадан­сса дакIнил заллу бушиву. ЧIалай бия ялагу лакку билаят, лакрал тIабиаьт кIулсса, ххирасса хIакьсса лакку душ бушиву. Ни­ттил маз ххирасса, ганил нахIу-нацIушиву асар хьусса, мазрал каши-кьудратрая хавар бусса, лакрал литература, поэзия кIулсса, му кIулшиву цила макьаларттаву ишла дан усттарсса бушиву.

Кказитрал даву личIи-личIисса ди­кIайссар. ДикIайссар материал хъинну хъирив лавну, анализ дурну, цаламургу, цаманалмургу пикри «шахьан бувну» дузал дан аьркинсса. Мукунми журналистътал мудангу нажагьссар гьарцагу кказитрай. «Илчилий» чан ба­къая мукунсса журналистътал. Миннава ца яргмур ПатIиматгу бия. Редактор хIисаврай, ялтту буклакисса чIумал, ПатIимат Рамазановал текст на нара ду­ккин ласайссия, цанчирча ттун кIула ги­кку ттула дакIнинсса тирхханну лякъиншиву. Ттунна хIисав къархьусса мяъна-хIисав ганил аьч дурну дикIантIишиву. Нава ганил гьунарданул ххари баншиву. ДакI дарцIуну бикIайссияв, га тирхханну гьарцагу кказит бувккунал дакIнийн дучIантIишиврий.
МахIатталшиву дакъар яла ПатIимат ххуйсса, бюххансса шеърирдал заллу бушиврийгу. Асардал къявхъа тIи­сса дакIниву шеърирду къаляхълай бикIайссарив. Ччя-ччяни зумух ласай ПатIиматлул цила дакIния къалагайсса учитель, лакрал цIанихсса шаэр МахIаммад-Загьид Аминовлул цIагу. Ганал дарсирдаягу, ганая лавхьхьумуниягу мудан бусраврайнма гъалгъа тIун бикIай.

ПатIиматлул гьунар бия кказит­рал даву, ганил коллектив цила оьтту-ттурчIайнусса кулпатран ккалли баву. Кказитрал чIявусса дустал, аьркин багьни чIарах бацIанми, ка кIидахIинми ПатIиматлул хIарачатрайнугу хьуссар.
Гьарцанналгу оьрмулул ххуллу кулпатрава байбишай. ПатIиматлул нину-ппу, жула чIявуминнал кунмасса, шяраваллил агьлу, хIакьсса захIматчитал бия. Амма, щак бакъар, ПатIиматлул дакIнил хазна, оьрмулухсса ябитаву, инсантуращал­сса жура- журардайсса арарду, алвагьсса нитти-буттая, уссур-ссунная лархьхьусса душиврийн. ЧIяву махъ бакъа­сса, увкумур калима кIусса, бигьа бакъасса оьр­мулул сасан дурсса дия ванил нинугу. Цила кулпатращал архIал ПатIиматлун цила буттал шяравалугу, шяраваллил зункIулливгу, ар-майданнугу, ратIру-ккутIругу ххирар. Мигу гьурттуну дур ванил чивчумуниву. Махъ бакъа, шяраваллил жяматгу, чIивитIуя, къари-къужлуйн бияннин, ванил дакIнивасса яла гъилими, ттюнгъами асардал чанна лахъан бувсса мукъурттин хас хьуну бур.

[dropcap]Ш[/dropcap]аэр, журналист увкуну, ПатIимат дакI кIюласса ттюнгъа душгу бакъа­ссар, явара. Аьркин багьни, кIукIлусса такьвалий, хъинну кьянкьасса ихтилатгу байссар. Цила цIаний бакъача, коллективраву, лагма-чIарах багьсса иширттал хIакъираву.

ПатIимат Рамазановал гьунар яла аргъиравумур чIун дур. Ялун личинми гьунардугу ттигу чансса бакъассар. Так чан къабаннав лакраву ПатIиматлулгу, лакку мазралгу, лакку литературалулгу, журналистикалулгу ххуллий зузиминнал чIарав бацIанми. Муния неъмат ласун шайми.
ПатIимат Рамазанован тIурча, хIа­кьину, махъ бакъа, «Илчи» кказитрал пахруну хъанахъисса, чIа тIий бура вания тихунмайгу тIайлабацIу. ЧIяву хьуннав ина чивчумуних мякьсса, муния неъмат ласун шайсса, мунил кьадру кIулсса лакрал агьали.

[dropcap]В[/dropcap]а ялагу, ПатIимат, ххирай, ттула итта­лу хъунма хьусса душ, цIакьсса пишалул усттар, барча тIий бура вил юбилей! ЧIа тIий бура вингу, вил аьзизсса арснангу цIуллу-цIакьшивугу, талихI-тирххандарай гьан бансса, щалихханнинсса оьрмугу.
Качар ХIусайнаева