Совет аьрал Авгъаннава буккан бувну 35 шин шаврин хас дурсса мероприятиярттал лагрулий, Къумукьнал театрдануву хьунни авгъан дяъвилул ветерантурал суккушиннарал активистътуран наградартту дуллалисса шадлугърал мажлис.

Ва тIитIлай, ихти­лат бунни Дагъусттаннал ХIуку­матрал председательнал хъиривчув, генерал-майор, авгъан дяъвилул гьурттучи Рамазан ЖахIпаровлул.
– Совет аьрал Авгъаннал билаятрая буккан бувсса кьини цинявппагу та дяъвилий жанну дуллуми дакIнийн бичайсса, цала аьралий буржгу чувшиврий лавхъун зана хьуми лахъа-хъун байсса кьинир. Тай шиннардий совет аьралуннал, жула билаятрал дазурду дуруччаврицIун, Авгъаннал халкьуннангу хъунмасса экономикалул ва гуманитар кумаг був­ссар. Дяъви нанисса шиннардий дурссар ттуршрахъул километрарду ххуллурдал, аэропортру, фабрик-заводру, школарду ва больницарду. Тай захIматсса кьинирду лахъан багьсса авгъан дяъвилул ветерантал кьини дурксса чIумал цимилагу жула паччахIлугъралгу, жяматралгу чIарав бавцIуссар. 1999-ку шинал гужирдал структурардащал цачIу республика дунияллул террористътурая дуручлай бивкIссар. ХIакьинусса кьинигу, жула билаятран Украиннал аьрщарай нацизмалущал талан багьсса чIумал, авгъан дяъвилул ветерантал билаятрал мурадру буручлай бур, – увкуна Рамазан ЖахIпаровлул.

Дагъусттаннал ХIукуматрал хIукмулийну, чIярусса шиннардий дачин дурсса жяматийсса даврихлу ва жагьилсса ник Ватан ххирану тарбия давриву чялишсса гьурттушинна дуллай тIий, авгъан дяъвилул ветерантурал суккушиннарал активистътуран дуллунни ХIурматрал грамотартту.
Мажлисрай гьуртту хьуна Дагъусттаннал ХIукуматрал Пред­седательнал хъиривчув Мус­лим Телякавов, миллатрал поли­тикалул ва диндалул иширттал министр Энрик Муслимов, захIматрал ва социал лябуккулул министр Мурад Казиев. Мероприятиелул сакиншинначи хьуна Авгъан дяъвилул гьурттучитурал ва инвалидтурал ветеран организациярдал координационный совет.
Наградартту дуллуну махъ Дагъусттаннал артистътурал ккаккан дурна ххаллилсса концерт.