Лавайсса даражалийсса хIадуршиннардащал дуккаврил шин дайдирхьунни ЦIуссалакрал райондалул щархъавусса школардай. Гьашину райондалийсса 23 школалийн бувкIунни 7500 оьрчI, миннава 840 – цалчинмур классравун.

ЦIусса дуккарил шин дайдихьулул кьини ЦIуссаккуллал ва ТIюхчардал шяраваллаву тIивтIунни гьануцIакул бакьин буллай бивкIсса школарду.

Райондалул школардал дуклаки оьрчIру барча буллалисса шадлугъирттай гьуртту хьунни ЦIуссалакрал райондалул хъунама МаматIи ХIамзатов, Дагъусттаннал Халкьуннал Мажлисрал, законнал, паччахIлугърал строительствалул, кIанттул цила каялувшиврул ва регламентрал комитетрал хъунама Артур Исрапилов, ЦIуссалакрал райондалул КIулшиву дулаврил управлениялул хъунмур Светлана Къудаева. Райондалул администрациялул вакилтурал барча дунни дуклаки оьрчIахь, учительтурахь ва нитти-буттахь цIусса дуккаврил шин.

– ХIакьину райондалийсса цинявппагу дуккаврил идарарттай най дур цIусса дуккаврил шин дайдишаврин хас дурсса шадлугъру. На ттула цIания дакIнийхтуну бурча буллай бура педагогтал, дуклаки оьрчIру ва вайннал нину-ппу. ЦIуссалакрал райондалул школарду кIулшивуртту дулаврил чулуха мудангу хьхьичIунсса сияхIрай буссар. Хъуннасса вихшала дур вания тихуннайгу дуклаки оьрчIал хьун дуллалисса ккаккиярттал ххари булланшиврий, – увкунни Светлана Къудаевал.

ОьрчIахь дакIний личIансса насихIатру буллалисса ихтилатру бунни учительтурал ва нитти-буттал.Цалчимур классравун наниминнал дурккунни назмурду, увкунни балайрду. Аьдатравун багьсса куццуй, ЦIуссалакрал райондалул школардай КIулшивурттал кьини дайдирхьуна Чувшиврул ва къучагъшиврул дарсирдайну.
Вай дарсирдай оьрчIахь бувсуна Буттал кIанттул цIанийсса дяъвилий къучагъну талай бивкIсса вирттаврая, Украиннал аьрщарайсса тагьардания, хасъсса аьралий операциялул агьамшиврия ва жула аьралитурал чувшивурттая.