Сайки 15 шин хьуну дур Къаравалиевхъал кулпатрал Красноярскаллал крайрайсса Норильск шагьрулий ялапар хъанай.

Тимур ур ЧIурттащиял шяравасса, Радмила – Щаратусса. Кулпат бивзун бур Норильскалийн 2011-ку шинал. Тимур зий ур строительствалул давурттай инженер-гидротехникну, Радмила тIурча, оьрчIал багъраву тарбиячину ва шиккувасса Профсоюзрал комитетрал хъунмурну. Къаравалиевхъал шанма оьрчI бур. Хъунмур душ дуклай бур 8-мур классраву, арс – ряххилчинмуниву, чIивимур душнин Миясатлун арулла шин дур. Ва оьрчIал багъравун занай бур. Яла-яла, ва кулпатрая ци учин ччива чирча, Дагъусттанная архну бунугу, кулпатраву оьрчIругу, нину-ппугу гъалгъа тIий бур лакку мазрай.

Вай гьуртту шай тийх дуллалисса цинярдагу культуралул мероприятиярттай Дагъусттаннал, лакрал майданнугу тIивтIуну, жула ­аьдатругу, багьу-бизугу цайминнан ккаккан буллай. Къаравалиевхъал кулпатраву цаягу инсан акъар жяматийсса давур­ттавух гьуртту къахъанахъисса. Чялишсса гьурттушинна дай Тимурдул ва Радмилал оьрчIру дуклакисса школалийсса ва оьрчIал багъравусса спортрал ва цаймигу личIи-личIисса мероприятиярттай ва конкурсирдай, шагьрулул фестивальлай. Мунияту кулпат бусравнугу бур гъурбатрай. Гьарица шинах школалул, оьрчIал багърал ва цаймигу идарарттал чулуха вайннан дулай Грамотартту ва Барчаллагьрал чагъарду. Миннувух дур оьрчIру ххуйну тарбия баврихлу дуллуссагу.
Гьарица шинах Норильскалий, Шагьрулул культуралул центрданий, чIявусса миллатирттал, регионнал вакилталгу гьуртту хьуну, лахъа-хъунну кIицI дувай Аьрасатнал халкьуннал цашиврул кьинилун хас дурсса «Халкьуннал дусшиву» тIисса творчествалул фестиваль. Гьашинусса фестивальданий мяйва миллатрал агьлу гьуртту хъанай бия: ­удмурт, оьрус, адыгей ва цаймигу. ­Да­гъусттаннаясса бия лазгигу, лакгу. Лакрал культура, аьдатру ккаккан дуллалисса программалул хъар щала цайнна лархъун, Къаравалиевхъал ккаккан дунни ххаллилсса программа. Миллатрал яннагу ларххун, му дачин дурну бия Тимур ва Радмила. Вайннал бувсунни Дагъус­ттаннал миллатирттая, лакрая, жула аьдатирттая, дукрардая. Яла-яларив, тамашачитуран ххуй бивзунни пасихIну лакрал гимн ккалаккисса аьнтIикIа Миясат. Явара, ванил телефондалувух ттухьгур дурккусса. Барчаллагьри оьрчIаву миллатрахсса ччаву дирхьусса, гъурбатрайгу лакку маз ябуллалисса ниттин ва буттан.
Шиккува кIицI лаган, вайннал гьарица шинах Норильскалийн «Илчи» кказитгу букIлакIи байссар.
Сант дагьну дунура, Крайний Севердания Къаравалиевхъул барча тIий бур цинявппагу ватанлувтурахь ялун нанисса ЦIусса шин. ЧIа тIий бур цIуллушиву, ххаришивуртту, ужагъирай барачат.