Нюжмаркьини МахIач­къалалив Поэзиялул театрдануву хьунни Украиннал аьрщарай нанисса хасъсса аьралий операциялий ватандалул мурадру буруччаврил ххуллий чувшиврий жан дуллусса ттул ссил арс, Аьрасатнал аьралий гужирдал чIавама сержант, Чувшиврул Ордендалул кавалер Алик Гъазиевлул аьпалун цIа кусса пасихIну лакку мазрай назмурду дуккаврил конкурсрай ххув хьуминнан бахшишру дуллалисса мероприятие. Ва сакин дурну дуссия Ватан Дуруччул шинал лагрулий. Алик жуяту лавгунни кулпат бувну хъунма хIал къалавгун, наслу махъ личIан нясив къавхьуну. Мунияту ччай бия аьпалунсса ци-дунугу проект дан. Давугу лакку мазрацIун дархIусса духьувкун, дакIнин багьуна, хъирив нанисса никирал чаннасса ва паракьатсса оьрмулул ххуллий жан ххира къадурсса ссил арснан цIа куну, лакку мазрай пасихIну назмурду дуккаврил конкурс сакин дан ва му тIайла дан СВО байбивхьусса кьинилул хьунийн.
Хъунмасса барчаллагь ттул аьзизсса коллективран, ттул пикри хъин чулийгу ккавккун, чIаравгу бавцIусса. Укунмагу вай шанна шинал мутталий ттул къюву ва дакIнил хIал бувчIлай бушиврухлу. Ттун хъинну ламу­сгума хъанай бур, та оьзру хьусса кьинилия шинмай на тIайла-гьайлану даврийн буккан бувара. Ва чIумул манзилданий жул хъунамагума аххана хьунни, амма цанналагу, я Руслан Башаевлул, я Руслан Къардашовлул, цалагу къаувкуссар ттухь, хIатта ттуйнма нава бучIансса чIун хьуну духьурчагу, цанна даврийн къабукIлакIисса куну.
Ва конкурс баян буллали­сса чIумал ттул цукунчIавсса щак бакъассия ттула чIарав бацIан хIадурми чансса къабикIантIишиврийн. ДакIнил щялмахъ къабувсунни. Конкурс баян бувсса кказит канивун ласавривун, лакран акъа чара бакъасса Ссапарбаг Аьбдуллаевлул, «миллатрал ххярагьала» учара на ванайн даингу, лакрайн багьайсса цавагу иширал чIарах къауккайсса уну тIий – оьвкуну бия Руслан БашаевлучIан, зуруя зуруйн даврил хIакьлих ялугьлагьисса инсанная мукунсса харж буккан битан ламусъсса ишну чIалай бур, му конкурсрал харжлугъ на ттуйнна ласувияв, мунин къаччан къабикIарча, куну. Ванал дуллусса зувиазарда къурушрах ттуща бювхъунни ,кIилчинмур ва шамилчинмур кIанттурдансса премиягу кIи-кIиазарда къурушрал ххи дурну (цIубутIуй кIилчинмур кIану бувгьуминнан ххю-ххюазарда, шамилчинмур кIану бувгьуминнан шан-шаназарда къуруш дулунсса пикри буссия, ду­ллуссар ару-арулазарда ва ххю-ххюазарда), ряхва мукьилчинмур кIанугу булун, вайннан шан-шаназарда къуруш дулун.
– Ттуя ци кумаг аьркинссарив ламус къабувну буси, – хъиривва оьвкуна ттула гъанчу, ДР-лул аьрщарал ва хъуслил ишир­ттал министрнал хъиривчу Эмиль Ттаттаевлул. Муни ттунгу пикри хьуна конкурсрай ххув хьуминнансса бахшишру лахъа-хъунсса даражалий дуван. Ванал кумаграцIух щаллу дурссар Поэзиялул театрданул технический дузалшин.
– Конкурсрал сакиншиндарангу винма хIисаввагу бакъа къачIивисса харж буккантIиссар, дакIнихтуну вил чIарав бацIан хIадурну буссара, – оьвкуна Бакуя ПатIимат Штанчаевалгу.
Конкурсрайн шеърирду ккалаккими Телеграм-каналданий бихьлай байбишавривун, ялун бувккунни гьурттучитуран цала чулухасса премияртту дулун ччимигу. Цалчина-цалчин – ми­ллатрайн багьайсса цумур-цагу ишираву хъуннасса хъар цай­нна ласайсса Лакрал райондалул бакIчи Юсуп МахIаммадов, Дагъусттаннал Информациялул ва печатьрал агентство, «Этномедиахолдинг «Дагестан», Алик аьралий бурж лахълай ивкIсса аьралий часть, ттула шяравудуш, МахIачкъала шагьрулул депутат Бэлла Багъдуева, СВО-лул Аьрасатнал цалчинсса Виричу НурмахIаммад ХIажимахIаммадовлул ппу, шанна Чувшиврул ордендалул кавалер Энгельс ХIажимахIаммадов, Ккуллал райондалул бакIчи Шамил Рамазанов, «Сила матерей» ккурандалул хъунмур Сапижат МахIаммадрасулова.
Мяйжаннугу, ПатIимат Штанчаевал тIийкун, сакиншиндарал даву къабигьассагу, къачIириссагу диркIун дур. Хъунмасса барчаллагь ва ишираву чIарав бавцIусса ДР-лул Культуралул министерствалун, Поэзиялул театрданун ва жула Лакрал театрданун.
Поэзиялул театрдануву гай гьантрай аварасса иш бия, цIусса оборудование дуркIун, гай ишла дан лахьхьингу бувану, духмургу дура-дуркьун лявкъуна. Хасъсса аьралий операциялий ливтIусса лакрал чиваркIуннан хас дурсса видеоролик ккаккан даншиврулъя укунсса лагрулий бахшишру дуллалисса увкукун, ца хьхьу-кьини пишакартал бучIан бувну, цIуну дуркIсса техника щурущи дансса чаран лявкъуну бия Поэзиялул театрданул директор Елена Гьаруновал.
Гьурттучитуран булунсса дипломру дузал бувуна компьютерданул хIаллихшиннардал даву сантирай кIулсса Жанна Оьмаровал, ва Лакрал театрданул каялувчинал кумагчири.
Аликлун ва СВО-лий жа­нну дуллусса чиваркIуннал ни­ттихъан хас бувсса балайрду учин бувкIуна Дагъусттаннал халкьуннал артистка Луиза Шагьдилова ва Дагъусттаннал лайкь хьусса артистка Нурианна Къаллаева.
БатIаву усттарну дачин дурну ия Дагъусттаннал Чичултрал союзрал лакрал секциялул хъунама, Поэзиялул театрданул директорнал хъиривчу Супиян Оьмаров, цувагу жул кулпатрал ччянияцIавасса хьхьичIунсса дус-ихтивар. Шиккува дакIнин бутан, Аликлул хъатIул тямадашивугу ваналъя дурсса, Хъусрахь аьпалул ула тIитIлатIисса мажлис бачин бувнугу уссия.
Конкурсрай ххув хьуминнан бахшишру дуллалисса батIаврийнгу къачансса бувкIун бия миллатравугу, республикалийгу бусравсса инсантал. На тикрал къадулланна вайннал цIарду, ттул коллега ПатIимат Рамазановал цила макьалалуву кIицI ларгccар.
ДакIнихтуну барчаллагьрай бура бувкIцириннайн, оьрчIру конкурсрайн хIадур бувсса учительтурайн, нитти-буттайн. Анжагъ, бахшиш ласунсса мурадрай бакъаяча, дакIнихтуну хIадур бувну бия, аьралий лаххиягу лаххан бувну, Хъун дяъвилул ва СВО-лул вирттавран хас дурсса стендирттачIагу бацIан бувну.
Аликлул бакIрая чIара дагьансса чара бакъассия, жул, мукьва ссил, дянив увагу усса ца арсъя. Амма ца гъинтнил кьини жул ялунгу бивуна лухIи хавар… Хавар бяйкьусса бухьуви тIий, Заннайн лабизлай най буссияв ссичIан Къизилюртлив, къапу тIивтIуну къалявкъуния тIий. Лахъишиву ция га хьхьуну ххуллулгу. Чурх чарийн бувккуна, ссил къатрал къапулучIан бавтIсса махлукьатрайнгу я щуну, къатлува яслил чIугу баяйхту. Сcил лагма лавгсса гъанчу ххябуккавай аьтIий бия, так ца на бияв «хьун къабюхъайсса ишри», «щялусса хаварди» тIий, ттулва лагма нава занай, телефонгу канища щяв къадихьлай. Зунзулчаннахь ца лахIзалийсса шанул лях лавгун бияв. ЧантI учавривун телефондалувун бурувгсса, зат чIалай дакъар, бакIрая экьиларгсса лачакгу дакьин дуллай, хIаятравун нанисса ттухь: «Ниттирссий, вил щала бакI кIяла хьуну бур», – увкунни ссил душнил. Шанул лях лавгсса га чIивисса лахIзалул мутталий ттул чанигу бухлавгун, щала бакIгу кIяла хьуну лявкъуна. Ялая хIакинтурал бусантIисса, гьамин, га чIивисса лахIзалийсса шанул бивкIшиву на ххассал бувну, шанул лях къалавгссания, бакIрал баххана хьун бюхъайссияв ина тIива.
Га хьхьуну ттун ччимур хьун бюхъайва. Каши хъуннасса Заннал цIими ххи хьуну бия. Амма видачIра хьунни дуниялгу, бухлавгунни оьрмулухсса тIингу. Учайхха, аьпа бивкIулияр ххув­ссар, куну. Тти ттунгу ванияр тихунмай ливчIсса оьрмулул гьантта – ттула ссил арсналгу, ва кунма жан Ватандалия ххира къадурсса, цаннаяр ца бакIралгу исвагьисса, чурххалгу бювхъусса жула лакрал жагьилтурал аьпа абад бансса давурттал ххуллий бутланни ливчIсса.
Зулайхат Тахакьаева