* * *
Лакрал райондалул бакIчи Юсуп МахIаммадовлул тапшурлугърайн бувну, «Память гор» ДРОО-лул филиалданул каялувчи Юнус Эфендиев ва администрациялул хьхьичIунсса специалист Загьидат Майранова бивунни СВО-лий талатисса ва ватандалул мурадру буручлай жанну дуллусса аьралийтурал кулпатирттавун, цIухху-бусу бунни аьркинмунил, хьунадакьлакьисса захIматшивурттал ялув. Вайннахь бия аьралийтурал ичIуваминнансса Россельхознадзорданул отделданул начальник, Гъумучатусса Закир Къапиевлул чулухасса ссайгъатругу.

* * *
Аьрасатнал Жагьилтурал кьинилул шадлугъирттал лагрулий Дагъусттаннал ХIукуматрал председатель Аьбдулмуслим Аьбдулмуслимовлул республикалул жагьилтурал организациярттал вакилтуран дуллунни паччахIлугърал наградартту. Вайннавух Дагъусттан Республикалул ХIукуматрал чулухасса Барчаллагьрал чагъарданун лайкь хьунни Культуралул, жагьилтурал политикалул, туризмалул, спортрал ва ЦБС-рал центрданул директорнал хъиривчу Малик ХIусмановгу. Ва къакIулсса, ванал дуллалисса даву итталун къадагьсса инсан Лакрал райондалул щархъаву акъахьунссар.

* * *
«Память гор» ДРОО-лул Лакрал райондалийсса филиалданул председатель Юнус Эфендиевлул СВО-лул гьурттучитуран буллалисса гуманитар кумаграхлу Барчаллагьрал чагъарду буллунни Россельхознадзорданул управлениялул отделданул начальник Закир Къапиевлун, райондалул администрациялул юридий суаллал ва кадрардал даврил отделданул начальник КьурбанмахIаммад Дандамаевлун, Гъази-Гъумучиял оьрчIал багърал хъунмур Лиана Исмяилован, «Лакрал район МР» ЛМА-лул директор Рима Исмяилован, райондалул администрациялул хьхьичIунсса специалист Загьидат Майранован, МФЦ-лул Лакрал райондалийсса филиалданул хъунама Амин Чутуевлун, «Солнышко» оьрчIал багърал хъунмур Зулайхат Макьсудован. Вай булун хьхьичI бувсса ихтилатраву ванал ляличIиссава барчаллагь баян бунни райондалул бакIчи Юсуп МахIаммадовлуйн ва Дагъусттан Республикалул Халкьуннал Мажлисрал депутат Марат Илиясовлуйн.

* * *
Лакрал райондалул администрациялий хьунни «Мариян Дандамаевал цIанийсса Гъумучиял искусствардал школа» идаралул директорнал къуллугърайнсса конкурс. Ванийн рирщуну дия шама инсаннал цIа. Конкурсрал комиссиялул заседаниялул хIасиллайн бувну, ва къуллугърай битан язи бувгьунни Акаева Залихха Шамиллул душ.

* * *
Июльданул 8-нний Аьрасатнаву кIицI лагайсса Кулпатрал, ччаврил ва хаин къашаврил кьини жулла республикалул кулпатирттал дянив хьунни яла цIакьмур кулпатрал цIа ласаврил цIанийсса бяст-ччал. Ши­кку 1-мур кIану бувгьунни Кьубиял шяравасса Сагидовхъал кулпатрал.

* * *
Гъази-Гъумук М. Маннаровлул цIанийсса дянивмур даражалул школалучIа тIивтIусса дяхттасса «Дусшиву» цIанилусса лагерьданийгу хьунни Кулпатрал, ччаврил ва хаин къашаврил кьинилун хас дурсса шадлугъ. Ши­кку хьунни цIакьсса кулпат сакин баврийн ва буруччаврийн багьайсса, кулпатрал агьамшивриясса ихтилатру, асфальтрай сурат дишаврил конкурс. ОьрчIал увкунни кулпатрахасса балайрду, дурккунни назмурду. Ва шадлугъ лагерьданул каялувшиндаращал архIал хIадур дурну дия Центральный библиотекалул зузалт Анджелла Ибрагьимовал ва ПатIимат ЛухIуевал.

* * *
Щардал школалий тIивтIусса лагерьданийн заназисса оьрчIру тарихийсса кIанттурдайнсса экскурсиялий лавгунни. Вай бивунни Гъумук Совет Союзрал Виричув Якьув Сулаймановлул гьайкалданучIан ва Славалул аллеялийн.
Вания махъ оьрчIал сайр бунни Жагьилтурал паркравух. Ваниннин хьхьичIмур аьрххилий ва лагерьданул оьрчIру бивссар Муса Маннаровлул цIанийсса музейравун.

* * *
Июльданул 11-нний Гъази-Гъумучиял Центральный библиотекалул зузалтрал «Дусшиву» тIисса гъинттулсса оьрчIал лагерьданийн заназиминнащал дунни «Беда по имени наркотики» тIисса цIанилусса батIаву. Ва даврил агьаммур мурадгу бия цIуллу-цIакьсса оьрму машгьур баву, наркотикирттал инсаннал бакIрачIан буцлацисса хъуни-хъунисса балардая бусаву. «Ци кIулли вин наркотикирттая?», «Наркотикру ишла буллалисса инсаннахсса вил ургаву?», «Ина ци бувантIиссия, агарда кIул хьуссания вила дуснал наркотикру ишла буллай ушиву?» – вай ва цаймигу суаллахьхьунсса жавабру дуллай, библиотекарь ПатIимат ЛухIуеващал оьрчIру бачин бувну бия ихтилатру.
ХIадур бувссар

Бадрижамал Аьлиевал