Сентябрьданул 11-нний Москавлив Аьрасатнал вице-премьер Александр Новак хьунаавкьунни Дагъусттаннал бакIчи Сергей Меликовлущал.

Хьунабакьаврил лагрулий ххал бивгьуна 2036 шинайннин Дагъусттаннал энергосистема лядуккан даврил комплексъсса программа хIадур даврил масъалартту.
Ванияр хьхьичIгу Сергей Меликовлул гьаз бувну бивкIссар ва масъала, цIусса программа аьркинну душивугу кIицI бувну. Ванал тIимунийну, ва цIанасса программа махъун дагьну дур республикалий хьусса дахханашивурттаяр.
Мунияр ххишалагу, гьаз бувна региондалул Электросетирдал комплекс кIинтнил зурдардийн хIадур буван аьркиншиврул масъалагу, мукунма энергетикалул ва ЖКХ-лул предприятиярттал экономикалул лябуккулул масъаларттугу.
Александр Новаклул региондалул властирдан тапшур бувна федерал ведомстварттащал цачIу хIадур буван МахIачкъалаллал, Каспийскаллал агломерациялул цIинцIал сортировкалул комплексру ва инфраструктуралул проектру щинал дузал баврицIун, щин экьигьан даврицIун ва электросетирдацIун технологиялийну дахIаврийнсса арцу итадакьаврил масъалартту.