Байбихьулул школагу къуртал бувну, 4-мур классравун бувккун, сентябрь зурул 1-нний цалчинсса дарс дайдишиннин ялугьлай буру. Школалул цинявппа учительтал жун ххуйну кIулссия. Гьарица мюрщи щархъай кунма, куннал куннащал маччашиву, хIалашиву дакъасса цукIуй акъая. Жухьра дарс къадиширчагу, школалийгу гьарица кьини ккаклай бия. Ци чулийгу, цумур дарсирал цума учитель икIавивав тIисса пикрирду бия.
Расписаниялийн бувну, цалчин дия литературалул дарс. Жун кIулссия оьрус мазрал ва литературалул дарс Шагьриман ХIажиевнал дихьлантIишиву. Занг рищайхту, учительница классравун бувххун, иминну бивзрув увкуна. Жул гьанавиххишивугу га цIана дакъа-къатIа хьуна. Учительницал цинявппагу суаллахьхьун гъирарай, цаннаяр ца ялтту буклай жавабру дуллан бивкIру. Учительницал, цила зумуну иминну пишгу куну, жу циняв аькьлу-кIулши дусса оьрчIру бушиву кIицI лавгуна. Жунгу дурчIуна жула агьамшиву.
Дарсирал дайдихьулийва жувун гьавас бувтсса учительницал цIувххуна: «Бургияра чIавахьулттийх, ци чIалай дур зун тийх?». Жун, тия чулийсса къатрал магъи дакъа, цичIав хIисав къархьуна.
– Ялагу?
Яла жун ххал хьуна школалул къатрал хьхьичIсса кIива хъюртул мурхь. Цанний вяркъул кюру щавщун бия. ЧIун-чIумуй вяркъу чIурду буллан бикIайва, халкьуннал тIийкун, жяматрахь ххарисса хавар баяншиву буслай.
Жул классрал чIавахьултту шяраваллил ккурчIайн бурувгун бия. Цахъиc хIаллава жун баллан бивкIуна ккурчIай щябивкIсса къужрал хавардугу, гайннахь бивзрув-бурув тIисса щинав нанисса хъаннил чIурдугу.
Хъирив учительницал жухь бургияра ссавних увкуна. Ссав дия чаннану някIну.
– Жула къатта-къушлил ялувсса ссав ляличIиссар, кIаниву цила тIилисин буссар. Буттал къатлул ялувсса ссавнин жула мазгу, макьаннугу кIулссар. КIанил жула оьрмулуву ца агьамсса кIану бугьлагьиссар, ххуйшиврул, гъилишиврул, чаннал ва жула умуд-хияллал бакIщаращир, – увкуна учительницал. Ганих вичIи дирхьуну, жу махIаттал хъанай бивкIру, цукунни, жунна гьантлун ацIийлла вай гьарзат ххал хъанай дунура, ссалчIав хIисав ласлай къабивкIсса тIий.
Ва кьинисса литературалул дарсирая байбивхьуну, жун лагма-ялттусса дуниял цIунилла-цIунил тIитIлан диркIуна, мунил караматшиву асар хъанан диркIуна.
Утти жун бувчIуна: литература – му так нукIузаманнавунсса аьрххи бакъашиву, литературалуву инсаннал цIанамургу, бучIантIимургу аьч хъанай бушиву, литературалул дуниял ххарисса ва пашмансса цикссагу асардацIун дархIусса душиву. БувчIуна, чичултраща кунма, жущавагу жула хияллу дакIниву ябувну, ми дузрайн буккан бан бюхъантIишиву.
ЦIана, чIявуми цала тарихрая, мархрая арх буцлацисса, ниттил маз хъамабитлатисса чIумал, ттун дакIнин дагьай «Мукъул мархха» тIисса темалийсса оьрус мазрал дарс. Доскалий учительницал чивчуна шанма махъ: родник, Родина, родственник. Шанмагу мукъуя аьш дирхьуну, ялув «род» тIисса аьмсса мархха ккаккан бувна. Яла учительницал увкуна: «Инсаннал мархха-ххун, агьлу-авлад, тухум яшайссар, агана га «цала щаращува» щин хIачIлай ухьурча, цала Ватан дуручлай ухьурча, мачча-гъаннал хIурмат буну ухьурча». «Цала щаращува» щин хIачIлай… Му цукунни. Най дунура къадурчIуна жун вай мукъурттил мяъналул куртIшиву.
Кулпатрал, агьлу-авладрал, буттал улклул, вила миллатрал ва мазрал тарих. Ми кIулшиврувур инсаннал дакIнил кьудратгу, яхI-къириятгу. А.С.Пушкиннул увкусса куццуй: «Самостоянье человека, залог величия его».
Шагьриман ХIажиевнал хъунмасса захIмат бишайва жун гъалатI бакъа чичин лахьхьин бан. Ялув бавцIуну бикIайва жу луттирду буккин бан. Гьарица дарсирай личIи дайва гъалатIирттал ялув зунсса чIун (работа над ошибками). Классравусса ва шардайнсса давурттал личIи-личIисса тетрадьру бикIайссия. Гай бавтIун, ххал бувну махъ, жу дуцIин дайссия гъалатIирттал хIакъиравусса шанна колонка дусса таблица:
1.ТIайлану чивчусса махъ;
2.БувчIин баву;
3.Мисаллу.
Гьай-гьай, му даву жу гъирарай къадайссия. Яла, шинну ларгун махъ, бувчIуна му цуксса жунна аьркинсса даву диркIссаривгу, учительницал бихьлай бивкIсса захIматрал кьадругу. ХIисав дарча, гьарица классраву 25-30 оьрчI. Цила кулпат, хозяйство, багъ-бахча.Шагьриман ХIажиевнал захIмат дузрайн бувккунни учин бюхъанссар. Ванил дарсру дирхьусса чIявуми инсантал буслан бикIай, цивппа дуклакисса институтирттаву, техникумирттаву, хIатта Москавливссагума, махIаттал хъанан бикIайва, зунттал шярава бувкIсса оьрчIал гъалатI бакъа чирчусса давурттай тIий.
Шагьриман ХIажиевнал дирхьусса гьарицагу дарсирал жуву цIу-цIусса кIулшивуртту ххишала хьун дайва, дарсирайн дагьайсса дакъасса, оьрмулуву дучIи лякъинссагу.
Ганил тарбия дурссар дахьва жагьилшиврувун бухлахисса оьрчI-душвавраву яхI-къирият, мяърипат, узданшиву, тIайлашиву.
Литературалул дарсирдай гьарицаманахь персонажнал хIакъиравусса цаламур пикри бусансса ихтияр дуссия, га чIявуминнуцIун къабавкьусса бухьурчагу. Цал-цал, класс кIи-шан бивщуну, гужсса бяст-ччаллу шайссия.
Шеърирду жу лахьхьайссия караматсса кьяйдардай. ХьхьичIва бакIравунмагу къабуххайссия шеърилул кIива-шанма ххуттаву щаллусса дуниял, диялсса образру лякъин бюхъайшиву. Учительницал ккалакки байвав жу рольлу дургьуну. ЦIана «театральная педагогика» тIий бур, жул дарсирдай му танийра ишлану дуссия. Сайки циняв шеърирду, прозалувасса хъунисса парчри учительницал дакIних буккайва. Литературалул произведениярттайн бувну дайссия постановкартту. Жуву артистшиврул гьунардугума ялун личайва.
Хъуними классирттаву Шагьриман ХIажиевнал жухь Дагъусттаннал литературагу дишайва. Гьарица дарсирая Дагъусттаннал литературалул аваданшиврул, жула чичултрал, шаэртурал гьунардал махIаттал бувну буккайссияв. Дунияллул литературалуву ца яла жагьилма драматург Гьарун Саэдов ушиву, драма «Къалайчитал» мунал 20 шинаву чивчушиву кIул хьусса чIумал, жун хъунмасса пахру багьуна ва жула миллатрал арс ушиврия. Му пахру бансса ишгу бур. Шекспирдул цалчинсса драма чивчуну бур 26 шинаву, Островскийл – 27 шинаву.
Шагьриман ХIажиевнал бия авадансса, пасихIсса маз. КIула чIявусса учалартту, цIанихсса аьлимтурал, чичултрал афоризмарду. Мукун дюхханну дурчIин дайва гьарица дарс, га тачIав бакIрава къадуккансса кьяйдалий. Ца-ца чIумал, хъярчийсса рихшант дурну, хъяхъи бувну, таза буккангу байссияв.
Дакъая жул учительницаву цукунчIавсса дакI хъуншиву, цама ккалли къааву. Ца-ца чIумал пикри буллан бикIара, кIулъявав Шагьриман ХIажиевнан цуксса магьирсса, гьунар бусса учитель-тарбиячи бивкIссарив цуппа тIий.
Жун мудан дакIний дикIантIиссар ххирасса учительницал чаннасса симан, аькьилшиврул вибувцIусса яру.
Шагьриман ХIажиевна
ххирасса цинявппагу
учениктурал цIания
Диана Исяева
