ОЬРГЪАШИВУРТТУ
ЧIикIунтIалун – цIу
[dropcap]А[/dropcap]ьрщараву натрий биялну бакъасса чIумал, чIикIунтIалул чIапIив хъахъи лаглан бикIайссар. Мукунсса чIумал хъинсса кумаг хьунтIиссар цIил щиная. Щинал 10 литIралийн 60 грамм цIил хIисавну дутIияра хьуну нанисса чIикIунтIалул чIапIайн. Укунсса щин пурх учаврил му ххяххия цаппарасса зиянчитураягу ххассал дувантIиссар.
Помидорданун – йод
Помидордан, оьргъашиву хIисаврай, дахьва хьусса пара дуз къашайссар. Пара бичлай бухьурчагу, лахъи лавгсса, чIун ларгсса аьркинссар бичин. Хъунмасса мюнпат помидордан хьунтIиссар щинал 10 литIралийн йодрал 3-4 кIунтI бувтIуну дуртIусса щиная. Сезондалул лахъишиврий укунсса щин кIийлла дуртIуну хъинссар: цалчин – рассада дургьуну 3 нюжмардувун, кIилчин – къатIри тIутIайх бичайхту.
Дрожжигу – мюнпатиран
Оьргъашиву хIисаврай ххяххиярттан дрожжилиягу мюнпат хъунмассар. Щинал 2 литIралий (37 градус дусса) дяххан дувара сагъсса дрожжи (30 грамм), бичияра ялун бачIи стакан хIувусса качарданул ягу дишияра цаппарасса къусри къаканай лув ларсса мураппалул. Гъилисса кIанай дирхьуну, дитияра щараннин. Щинал 10 литIралий дяххан дурну, ахъувусса ххяххиярттал чIапIайн дутIияра.
Нисвартун кумагран – чимусул ккири
Хъахъи лаглай, ххуйну къаххяхлахисса нисвартилун кумаг хьунтIиссар чимусул ккирттарая. Гъилисса щинал бадралийн бичияра чимусул ккирттарал ца стакан. ЦIарай бивхьуну, щаран бикIайхту, кIира ссятрайссагу диртун, дутIияра ми щин нисвартул къатIрайн.
Чимусун цинма – нашадур
Ххяхлахисса чимусун азот биял къахъанахъисса чIумал, хъахъи лаглай, кIяла лихлан бикIайссар. Му азотрал буччин бан нашадурданул (нашатыр) кумаг хьунтIиссар. Щинал 10 литIралийн дутIияра нашадурданул 3 хъунна къуса ва ахттакьун чIумал дутIияра ми щин чимусуйн.
ХIадур бувссар
Бадрижамал Аьлиевал