Аьрасатнал Экономикалул министерствалул департаментрал каялувчи Камил Бексултанов увкIунни ЦIуминалийсса ЦIуссалакрал райондалийн. Ванал аьрххилул мурад бия «Развитие Северо-Кавказского федерального округа» тIисса АьФ-лул паччахIлугърал программалул лагрулий буллалисса объектру ххал бигьинсса.

Камил Бексултановлул ххал диргьунни ЦIуссаккуллал шяравусса инфраструктуралул агьамсса проектру. ДакIнин бутан, гьашинусса шинал ЦIуссаккуллал шяраву цIу дуккан дуллай дуссар кIичIирттал ва ххуллурдал сетьру. Мукунна дайдирхьуну дуссар ЦIуссаккуллал 2-мур школалул блокрал строительство.

ЦIуссаккуллал шяраву Бексултанов ивунни щин марцI дайсса сооружениярттал ва гъарал щин нани дайсса канализациялул строительство дуллалисса площадкалийн.
Объектру, сооруженияртту ххал диргьуну махъ, ведомствалул каялувчинал тIалав бунни 2026 шинал ахирданийннин, ва объектрал цалчинмур бутIувун духлахисса, кIичIирттал ва ххуллурдал сетьру цIу дуккан дуллалисса давуртту къуртал даву. Му бакъассагу, кIилчинмур бутIувун духлахисса давурттугу чялиш дуккан даву.

Хъирив Камил Бексултанов увкIунни ЦIуссаккуллал 2-мур школа гьарта-гьарза баву мурадрай дуллалисса строительство ххал дигьин. ЦIуну буллалисса блок бур 604 оьрчIансса кIану бусса, шиву бур актовый зал, кIива спортзал ва ттизаманнул шартIру хIисавравун ларсун бувсса пищеблок. КIулсса куццуй, ЦIуминалийсса щархъавусса школардай яла гьарзану оьрчIру заназимур бур ЦIуссаккуллал шяравусса школа. Школалул пристройка даврийну, оьрчIан ца сменалий дуклансса сант ххишала хьунтIий дур.
КIицI лавгсса объектру ххал бивгьуну махъ, Бексултанов увкIунни ЦIуссаккуллал шяравусса «Непоседа» тIисса садикрайн. Ва бувну бур 2023 шинал «Развитие СКФО» тIисса паччахIлугърал программалул лагрулий.

Цимурца хIисавравун ларсун, хъирив лавну, объектру ххал бивгьуну махъ Бексултановлул дунни совещание.
Шикку кIицI лавгунни строительствалул давриву аьлтту хьусса диялдакъашивуртту ва бунни хасъсса маслихIатру.

Имара Саидова