ЦIуссалакрал райондалий хьунни «Работа России. Время возможностей» цIанилусса Щалагу Аьрасатнал вакансиярттал ярмаркалул кIилчинсса ятап. Агьали давурттал дузал баврил ярмаркалул гьантрай ЦIуссалакрал райондалул агьали давурттал щаллу баврил центр Культуралул управлениялул зузалтращал архIал кьамул буллай бия даврий бацIан ччисса ягу пиша баххана бансса мурадрай кIулшивуртту ласун ччисса агьали.

Ярмаркалул лагрулий личIи-личIисса журалул инсантуран, агьали давурттал дузал бан ччиминнан, захIматрал рынокрайсса партнертуран, мукунма давурттах луглагиминнан цанна-цаннасса мероприятияртту дурна.
Агьали давурттайн кьамул бансса кIанттурду бур райондалул администрациялий, ЖКХ-лий, УСЗН-лий ва КЦСОН-лий, мукунма кIира СПК-лий – Ножайюртуллал райондалийсса Гагариннул цIанийсса ва Гилани шяравусса «Дружба» тIисса СПК-дай.
– Щалагу Аьрасатнаву нанисса вакансиярттал ярмаркалия мюнпат бур даврих луглагиминнангу, зузалтрах луглагиминнангу. Ванийну кумаг хьунтIиссар давурттах луглагиминнан цанна ччисса даву лякъин. Зунсса инсантурах луглагиминнащагу бюхъантIиссар даврий бацIан ччиминнащал контракт чичин, – увкуна ЦЗН-лул директор СултанхIусайн Асбаровлул. Ярмаркалий 10 инсаннал бувсуна цачIарасса давурттая. Вайннал бусласимунийн бувну, цIана 15 инсаннансса вакансияртту дур. Мероприятиялий ия даврих луглагисса 65 инсан. Ччясса чIумул мутталий вайннавасса цаппара давурттал дузал бантIиссар.